"მე ვარ გამოჩენილი სცენოგრაფის მემკვიდრე, უნდა გამოვსულიყავი ტელევიზორში, რომ ბიძაჩემის ჰონორარებს ვიღებ?! - ჩემი ქალიშვილი რატომ აგებს პასუხს იმაზე, მე რას ვიღებ?!" - გოგი ხოშტარია
მე ვარ ბიძაჩემის მეორე რიგის მემკვიდრე, ჩემს დეიდაშვილთან ერთად - უნდა გამოვსულიყავი ტელევიზორში, რომ ბიძაჩემის ჰონორარებს ვიღებ?! – ასე უპასუხა საგარეო საქმეთა ყოფილმა მინისტრმა და "დროას“ ლიდერის, ელენე ხოშტარიას მამამ, გოგი ხოშტარიამ "პალიტრანიუსის“ გადაცემა "360 გრადუსში“ ბრალდებებს, რომ "დროას“ დამფუძნებლის ოჯახის წევრის ანგარიშზე რუსეთიდან, პერიოდულად, მილიონობით რუსული რუბლი ირიცხება.
გოგი ხოშტარიას თქმით, ბიძამისი, სოლომონ (სოლიკო) ვირსალაძე იყო გამოჩენილი სცენოგრაფი და თავად სწორედ ამის გამო იღებს ჰონორარს.
"მადლობელი ვარ, რომ მომეცა საშუალება, სწრაფად გაგცეთ პასუხი, რა დაფინანსებას იღებს გოგი ხოშტარია და არა მისი ქალიშვილი. ჩემი ქალიშვილი რატომ აგებს პასუხს იმაზე, მე რას ვიღებ?! ბიძაჩემი, სოლომონ (სოლიკო) ვირსალაძე იყო მსოფლიოს ერთ-ერთი ყველაზე გამოჩენილი სცენოგრაფი, ანუ არა უბრალოდ მხატვარ-გამფორმებელი, არამედ დამდგმელი სპექტაკლებში.
მე ვარ მეორე რიგის მემკვიდრე, ჩემს დეიდაშვილთან ერთად. ბიძაჩემს შვილი არ ჰყოლია, ორი და ჰყავდა. ჩვენ ვართ მეორე რიგის მემკვიდრეები, ჩვენზე იყოფა თანაბრად.
ბიძაჩემს ჰქონდა გასტროლებიც, თეატრებთან ერთად, ასევე პერსონალური მიწვევა დადგმაზე მილანში, რომში, პარიზში, ლონდონში, ტოკიოში, ამერიკაში. იქიდან რა ჰონორარი მოდის, გესმით არა?! ეს მოდის წელიწადში, დაახლოებით სამჯერ. რატომ არის ეს რუსული ფული?! უნდა გამოვსულიყავი ტელევიზორში, რომ ბიძაჩემის ჰონორარებს ვიღებ?! დავმალე?! ბანკში არ იციან?!“, - განაცხადა გოგი ხოშტარიამ.
ასევე იხილეთ: