ბილ გეითსი თვლის, რომ კრიპტოვალუტა და NFT "დიდი სისულელის თეორიაზეა" დაფუძნებული - რატომ უყურებს მილიარდერი ციფრულ აქტივებს სკეპტიკურად

ბილ გეითსი, მსოფლიოში ერთ-ერთი უმდიდრესი ადამიანი, კრიპტოვალუტების და NFT-ების მოყვარული არ გეგონოთ. Microsoft-ის თანადამფუძნებელი TechCrunch-ის კონფერენციაზე იმყოფებოდა, სადაც განაცხადა, რომ მსგავსი ციფრული აქტივები "100%-ით დაფუძნებულია დიდი სისულელის თეორიაზე". (ფინანსებში "დიდი სისულელის თეორია" გულისხმობს, რომ ფულის გამომუშავება ზოგჯერ ძვირადღირებული აქტივების შეძენითაც შეიძლება, თუ მფლობელი მას კიდევ უფრო "სულელ" ადამიანს უფრო ძვირად მიჰყიდის.)

გეითსმა, კონფერენციაზე ირონიულად ისაუბრა "მოწყენილი მაიმუნების" NFT-ის შესახებ და სარკასტულად თქვა, რომ "მაიმუნების ძვირადღირებული ციფრული სურათები სამყაროს უსაზღვროდ გააუმჯობესებს".

მილიარდერს "ძველებური" ინვესტიციები ურჩევნია: "მიჩვეული ვარ ისეთ კომპანიებში ფულის ჩადებას, სადაც რაიმის წარმოება ხდება", - ამბობს ბილ გეითსი.

გეითსმა ადრეც შეიტანა ეჭვი კრიპტოვალუტაში ინვესტირების ეფექტიანობაში. მან 2021 წელს "ბლუმბერგთან" ინტერვიუშიც ისაუბრა. მაშინ გეითსმა თქვა, რომ მართალია, ილონ მასკი "ბიტკოინებში" დებს ინვესტიციებს, მაგრამ ეს იმას არ ნიშნავს, რომ ყველამ მას უნდა მიბაძოს.

"ვფიქრობ, რომ ბევრი ადამიანი შეპყრობილია ამით, მიუხედავად იმისა აქვთ თუ არა საკმარისი დანაზოგი", - ამბობს მილიარდერი.

აღსანიშნავია, რომ ბილ გეითსის კომენტარის პარალელურად, ვხედავთ, როგორ დაეცა კრიპტოვალუტების საფასური. ბიტკოინმა, 2021 წლის ნოემბერში მიაღწია ყველა დროის მაქსიმუმს, 69 000$-ს. მას შემდეგ, მსოფლიოში ყველაზე ძვირადღირებულმა კრიპტოვალუტამ გაუფასურება დაიწყო.

ბოლო მონაცემებით კი მისი გასი 23 000$-ზე უფრო ნაკლებია. Crypto Exchange Coinbase-მა უკვე განაცხადა, რომ თავისი თანამშრომლების 18%-ს გაათავისუფლებს, რადგან ციფრული ვალუტის ბაზარი "ნგრევის პირასაა."

• რა არის NFT?

NFT არის ციფრული აქტივი, რომელიც გამოიყენება რეალური საქონლის ან ობიექტების წარმოსაჩენად, როგორიცაა ხელოვნების ნიმუშები ან საგნები აპლიკაციაში. კრიპტოვალუტების მსგავსად, NFT-ების უმეტესობა ბლოკჩეინის ტექნოლოგიას ეყრდნობა. კრიპტოვალუტისგან განსხვავებით, ამ საქონლის გაყიდვა ან გაცვლა შეუძლებელია იმავე ღირებულების ნივთებზე და ყველა მათგანი უნიკალურია.

მიუხედავად იმისა, რომ NFT ხელმისაწვდომია 2014 წლიდან, ბაზარი მკვეთრად გაიზარდა 2020 წელს და ახლა 2,5 მილიარდ დოლარზე მეტი ღირს. დღეს NFT არის პოპულარული გზა ხელოვნების ციფრულ ნაწარმოებებზე უფლებების შესაძენად. ერთ-ერთი ყველაზე ცნობილი NFT იყო მაიკ ვინკელმანის ნახატების კოლექცია, იგივე ბიპლი.

წყარო: cnn

მოამზადა: ანა სიბოშვილმა