"სახლი დავკეტეთ და წამოვედი... ძალიან გამიჭირდა, მაგრამ უპატრონოდ სიკვდილს ყველაფერი მირჩევნია" - ახალგორელების რიგი დროებით გახსნილ გამშვებ პუნქტთან: რას ამბობენ ადგილობრივები?

"გაძვირებული ფასები, გართულებული პირობები, ოჯახის წევრებს მოწყვეტილი ადამიანები, მუდმივი შიში, რომ საჭიროების შემთხვევაში, ექიმისა და მედიკამენტის გარეშე დარჩები..." - ეს არის მხოლოდ ნაწილი იმ პრობლემებისა, რის გამოც ახალგორის მოსახლეობა რამდენიმე დღის წინ, საქართველოს კონტროლირებად ტერიტორიაზე გადმოსასვლელად დროებით გახსნილ გამშვებ პუნქტს მიაწყდა. ხალხი რიგში საათობით დგას.

ე.წ. ცხინვალის რეგიონის ხელმძღვანელობის გადაწყვეტილებით, ახალგორელებს საქართველოს კონტროლირებად მხარეს გადმოსვლა 13-დან 18 ივნისამდე შეუძლიათ.

radiotavisupleba.ge-ს ცნობით, მოქალაქეებს ხშირად რიგში დგომა, საათობით, ან სულაც რამდენიმე დღის განმავლობაში უწევთ. ადგილობრივების ინფორმაციით, გამშვებ პუნქტთან ისეთი არეულობაა, ხანდახან რიგში მდგომი ადამიანებისთვის სასწრაფო დახმარების გამოძახებაც სჭირდებათ.

ოფიციალური ცნობით, ამჯერად ახალგორელებს ქართულ მხარეს გადმოსვლა ნებისმიერი დოკუმენტით შეუძლიათ, რომლითაც 2019 წლამდე, ანუ წნელისის კრიზისის დაწყებამდე სარგებლობდნენ.

იმჟამად ცხინვალის რეგიონის ე.წ. პრეზიდენტის ანატოლი ბიბილოვის გადაწყვეტილებით, გამშვები პუნქტები ქართულ მხარესთან 2019 წელს ჩაკეტეს, რასაც არაერთი ადამიანის სიცოცხლე შეეწირა. ახალგორელები ჯანმრთელობის გაუარესების შემდეგ, ჯერ ცხინვალის საავადმყოფოში მიჰყავდათ, თუმცა მას შემდეგ, რაც აღმოაჩენდნენ, რომ იქ ვერ შველოდნენ, ისევ უკან აბრუნებდნენ და წითელი ჯვრის დახმარებით, თბილისში გზავნიდნენ. შედეგად ზოგმა თბილისამდე ცოცხალმა ჩამოაღწია, თუმცა ყველას არ გაუმართლა...

ამ სამი წლის განმავლობაში, ბიბილოვის ხელმძღვანელობამ სულ რამდენჯერმე გახსნა გზა. ახალგორელების დიდი ნაწილი ქართულ მხარეს გადმოვიდა, მაგრამ უკან აღარ დაბრუნდა, რადგან, მათი თქმით, იყო შემთხვევები, როდესაც მკაცრი ზამთრის პირობებში, მარტო, ექიმის მეთვალყურეობის გარეშე დარჩენილი მოხუცები, რომლებიც მედიკამენტის შეძენასაც ვერ ახერხებდნენ, მეზობლები რამდენიმე დღის გარდაცვლილს პოულობდნენ... ასეთმა ფაქტებმა ახალგორელები შეაშინა, სახლები დაკეტეს და ქართულ მხარეს, ოჯახებთან გადმოვიდნენ. ბოლო სამი წლის განმავლობაში, რაიონში ათეულობით სახლი დაცარიელდა და ეს პროცესი გრძელდება, თუნდაც იმიტომ, რომ ბევრ მათგანს მკურნალობა სჭირდება, რისი შესაძლებლობაც იქ არ არის...

ადგილობრივების თქმით, როგორც ბოლო სამი წლის განმავლობაში, თითქმის ყველა შემთხვევაში, ახლაც, დღესასწაულის აღნიშვნის შემდეგ, უამრავი ახალგორელი შინ არ დაბრუნდება, რადგან არავინ იცის კიდევ როდის გაიხსნება გზა და როდის შეეძლებათ ოჯახის წევრების ნახვა.

"სახლი დავკეტეთ, გასაღები იქ დარჩენილ ახლობელს დავუტოვეთ და წამოვედით. ძალიან გამიჭირდა ყველაფრის დატოვება, განსაკუთრებით ბაღ-ბოსტნის, მაგრამ უპატრონოდ სიკვდილს ყველაფერი მირჩევნია... ხალხის მიმართ ასეთი უგულო დამოკიდებულებით არაფერი მოუგია ბიბილოვს. იმედია, გაგლოევი მის შეცდომებზე ისწავლის და თავისი პრინციპულობის წარმოჩენას უბრალო ხალხის ხარჯზე არ მოინდომებს..." - ამბობს ერთ-ერთი ადგილობრივი.

ახალგორელი აქტივისტი, თამარ მეარაყშვილი, ცხინვალის რეგიონში ახალ ლიდერს, ალან გაგლოევს მიმართავს და განუმარტავს, რომ ის, რაც ამ დღეებში გამშვებ პუნქტთან ხდება, არის განუკითხაობა.

მისი თქმით, ის ადამიანები, რომელთაც გავლენიანი ახლობლები არ ჰყავთ, დღე-ღამის განმავლობაში დგანან რიგში, სადაც ელემენტარული პირობებიც არ არის, არ აქვთ წყალი, ცხელა და საპირფარეშოთი სარგებლობაც არ შეუძლიათ...

"ეს ყველაფერი იმიტომ, რომ ყველაფერი არაორგანიზებულია. არიან ისეთებიც, ვინც რიგს არ იცავს და თავხედურად გადარბის ქართულ მხარეს... ასევე აღსანიშნავია, ე.წ. პრეზიდენტის თანაპარტიელი დევიძე, რომელიც გაგლოევის შტაბის წევრ ვინმე ბესტაევთან ერთად, გამშვები პუნქტის გრძელ რიგებში თავისიანებს ურიგოდ ატარებს. ირკვევა, რომ მას რაიონის ხელმძღვანელობა სურს და ქულებს იწერს. კარგი იქნება, თუ ის ადამიანების პრობლემებს გაახმოვანებს და ახალს არ დაუმატებს..." - წერს მეარაყაშვილი გაგლოევისადმი მიმართვაში.