"საქართველოში პოლიტპატიმრები არ არსებობენ, ეს დრო ჩვენ წარსულს ჩავაბარეთ" -კახა კალაძე
თბილისის მერის, კახა კალაძის განცხადებით, საქართველოს პოლიტპატიმრები არ ჰყავს. მან "ევროპის სახალხო პარტიის" რეზოლუციის პროექტი შეაფასა და აღნიშნა, რომ საქართველოს ხელისუფლება კანდიდატის სტატუსის მისაღებად ყველაფერს აკეთებს.
"კანდიდატობასთან დაკავშირებით ჩვენ ძალიან ბევრი გვაქვს გაკეთებული. შეიძლება პირდაპირ ითქვას, რომ იმ სამი ქვეყნიდან, რომელსაც წარდგენილი აქვს კანდიდატობაზე განაცხადი, საქართველო ყველაზე წინ არის ყველანაირი რეფორმებით და კონკრეტული გადადგმული ნაბიჯებით. რაც შეეხება პოლიტპატიმრებს, პოლიტპატიმრები საქართველოში არ არსებობენ. ეს დრო ჩვენ წარსულს ჩავაბარეთ, როდესაც პოლიტპატიმრები იყვნენ და განსხვავებული მოსაზრებების გამო აკავებდნენ და იჭერდნენ ხალხს. ეს არის "ნაციონალური მოძრაობის" მიერ შედგენილი წერილი და მიწოდებული EPP-სთვის",-განაცხადა კალაძემ.
მან აღნიშნა, რომ კანდიდატობის სტატუსის მიღებასთან დაკავშირებით პოზიტიური მოლოდინები აქვს. "საქართველომ ბოლო წლების განმავლობაში ყველაფერი გააკეთა იმისთვის, რომ ჩვენ კანდიდატის სტატუსი მივიღოთ, რაც ძალიან მნიშვნელოვანია. ბევრი კარგი საქმე გაკეთდა, ბევრი მნიშვნელოვანი რეფორმა განხორციელდა, ასოცირების ხელშეკრულებას ხელი მოეწერა, უვიზო მიმოსვლა არსებობს საქართველოს მოქალაქეებისთვის. ეს ძალიან მნიშვნელოვანია. რა თქმა უნდა, რეფორმები გრძელდება. ჩვენ ძალიან კარგად გვესმის, რომ საბოლოო წევრობისთვის ჯერ კიდევ ბევრი გვაქვს გასაკეთებელი, მაგრამ ჩვენ ვართ ის მთავრობა, ის ადამიანები, ვინც გამოთქვამს მზადყოფნას, რომ ეს რეფორმები განხორციელდეს", - განაცხადა კალაძემ.