"არ აქვს გამართლება რუსეთის მიერ უკრაინაში საერთაშორისო სამართლის სასტიკ უგულებელყოფას" - ანგელა მერკელი
გერმანიის ყოფილმა კანცლერმა ანგელა მერკელმა განაცხადა, რომ იგი, თანამდებობაზე ყოფნის დროს, უკრაინაში საომარი სიტუაციის თავიდან აცილებას ცდილობდა. მანვე დასძინა, რომ თავს არ ადანაშაულებს იმაში, რომ ამისთვის საკმარისად არ ცდილობდა.
ამის შესახებ მერკელმა გერმანელ ჟურნალისტთან ალექსანდრე ოსანგთან თანამდებობიდან წასვლის შემდეგ, პირველ სატელევიზიო ინტერვიუში განაცხადა, რა დროსაც მან უკრაინაში მიმდინარე ომზე ისაუბრა.
„დიდად სამწუხაროა, რომ ეს არ გამოვიდა, მაგრამ მე საკუთარ თავს არ ვადანაშაულებ, რომ არ შევეცადე“, - განაცხადა მერკელმა.
გარდა ამისა, გერმანიის ყოფილმა ლიდერმა დასძინა, რომ არ აქვს გამართლება რუსეთის მიერ უკრაინაში „საერთაშორისო სამართლის სასტიკ უგულებელყოფას“.
მერკელმა აღნიშნა, რომ ის უკრაინის ნატოში გაწევრიანების წინააღმდეგი იყო, რადგან მას რუსეთთან შემდგომი ესკალაციის თავიდან აცილება სურდა. გერმანიის კანცლერის განცხადებით, უკრაინა არ იყო მზად ნატოს წევრობისთვის.
უკრაინის პრეზიდენტმა ვოლოდიმირ ზელენსკიმ ადრე ანგელა მერკელი და საფრანგეთის ყოფილი პრეზიდენტი ნიკოლა სარკოზი 2008 წელს უკრაინის ნატოში გაწევრიანების დაბლოკვის გამო გააკრიტიკა და განაცხადა, რომ ეს იყო აშკარა "არასწორი გათვლა", რამაც გაათამამა რუსეთი.