"რევანში პრეზიდენტზე..." - ალან გაგლოევი სკანდალში ეხვევა: როგორ ეხმაურებიან სამხრეთ ოსეთში ინფორმაციას, რომ "პრეზიდენტი" აშშ-სა და საქართველოს ინტერესებს ლობირებს

"ალან გაგლოევი პრეზიდენტად არჩევისთანავე მასშტაბურ სკანდალში გაეხვა - არის თუ არა ის საქართველოს აგენტი, ამაზე ალბათ კიდევ დიდხანს იქნება მსჯელობა. ოპოზიციისთვის კი, როგორც რეფერენდუმის ჩაგდება, ეს თემაც დიდხანს იქნება მასზე ზეწოლის ბერკეტი..." - ასე ეხმაურება ცხინვალის რეგიონის მოსახლეობა გადაცემა Соловьев Live -თან ინტერვიუში რუსი პოლიტოლოგის, სერგეი კარაუხოვის გამოთქმულ ვარაუდს, რომ "ახალარჩეულ პრეზიდენტ გაგლოევს ქართულ და სხვა ქვეყნის სპეცსამსახურებთან კავშირი აქვს".

გადაცემის წამყვან, ვასილი სოლოვიოვთან ინტერვიუში კარაუხოვი გაგლოევს რუსეთთან შეერთების რეფერენდუმის ჩაგდების გამო, ქუჩის აქციებით დაემუქრა. მისივე თქმით, გაგლოევი საქართველოსთან ბიზნესინტერესების გამო ჩაკეტილი გზის გახსნის მომხრე იყო.

ცხინვალის რეგიონის ე.წ. უსაფრთხოების სამსახური განმარტებას ითხოვს, თუ რა იგულისხმა რუსმა პოლიტოლოგმა გაგლოევის შესახებ საუბრისას, სადაც ის "პრეზიდენტს" საქართველოსა და სამხრეთ კავკასიაში აშშ-ის ინტერესების შესაძლო ლობირებაში ადანაშაულებდა.

მათი მტკიცებით, რუსი პოლიტოლოგის პოზიცია ეწინააღმდეგება სამხრეთ ოსეთსა და რუსეთს შორის სამოკავშირეო ურთიერთობებს, რადგან რეალობასთან სრულიად შეუსაბამოა...

"ადგილობრივი კანონმდებლობით, პრეზიდენტობის ყველა კანდიდატი სპეციალურ შემოწმებას გადის, რაც გამორიცხავს უმაღლეს თანამდებობაზე იმ ადამიანის შეღწევას, რომლის ბიოგრაფიაში შესაძლოა, ანტისახელმწიფოებრივი და მართლსაწინააღმდეგო საქმიანობის ნიშნები არსებობს. გაგლოევის ბიოგრაფია და ბექგრაუნდი მსგავსი ეჭვის საფუძველსაც არ იძლევა, რადგან გაგლოევი უშიშროების ოფიცერია, ასევე, მონაწილეობდა 2008 წლის ომში, რომლის დროსაც გაგლოევის ოჯახს ტრაგედია შეემთხვა" - აცხადებენ ე.წ. უსაფრთხოების სამსახურში.

თუმცა, ადგილობრივების ცნობით, მისი მშობლები ავტოსაგზაო შემთხვევას ემსხვერპლნენ და 2008 წლის აგვისტოს ომთან კავშირი არ აქვთ...

ekhokavkaza.com-თან აღნიშნული თემის განხილვისას, რუსი პოლიტოლოგი ნიკოლაი სილაევი ამბობს, რომ ძალიან საინტერესოა, რა მოსაზრებებით არჩევს სოლოვიევი სტუმრებს.

"ის კრემლის მთავარი რუპორია და შესაბამისად, ინტერესი დიდია. კარნაუხოვმა ეს ვერსია ვითომ განსახილველად შემოაგდო, ამიტომ ძნელია გამოიცნო, რა დევს ამ ყველაფრის უკან..." - ამბობს სილაევი.

ოსი პოლიტოლოგის ირინა გაგლოევას თქმით, ეს არის ბინძური ტექნოლოგია მათგან, ვისაც ახალი პრეზიდენტის გამარჯვების გამო რევანში უნდა აიღოს.

"ამიტომ ისინი ისეთი თემის გამოყენებაზე მიდიან, რაც ჩვენი საზოგადოებისთვის მიუღებელია - ეს არის საქართველოს მიმართ დამოკიდებულება" - მიაჩნია მას.

ადგილობრივების მოსაზრებით, გაგლოევიც და ბიბილოვიც რუსული კადრებია, თუმცა საქმე ის არის, რომ ისინი ორი დაპირისპირებული კლანიდან არიან, სადაც ორივე მხარე გადარჩენისთვის იბრძვის, მთავარია, ვინ უფრო ღირსეულად...

"საქმე ის არის, რომ ბიბილოვმა წააგო და თითქოს ღირსეულად აღიარა, მაგრამ ეტყობა, ისინი არ გაჩერდნენ, ვინც მის უკან იდგა. ბიბილოვი თავდაცვის მინისტრის კლანს წარმოადგენდა, შოიგუს გუნდს კი, უკრაინის ომის გამო, ისედაც არ აქვს საქმე კარგად. ამიტომ ყველა მხარეს ძალაუფლების მორღვევას ვერ აიტანს. გაგლოევის ქართულ სპეცსამსახურებთან თანამშრომლობა აბსურდი მგონია" - წერს ადგილობრივი იანა კოკოითი.