მოძველებული ყავის აპარატები ჰორეკა სექტორში და რას კარგავს ამით მომხმარებელი
გემრიელი ყავის მომზადება ხელოვნებაა, რომლის უკანაც სიღრმისეული ცოდნა და სწორი ტექნიკა დგას. სამწუხაროდ, აღნიშნულს ბევრ რესტორანსა და კაფეში უგულებელყოფენ, რასაც ყავის მოყვარულები სასმელის დაგემოვნებისთანავე გრძნობენ.
იმისათვის, რომ ბარისტამ ამ მატონიზირებელი, გემრიელი და სასიამოვნო სასმლის საუკეთესო გემოს მიაღწიოს, მნიშვნელოვანია, მარცვლის ყავის მომზადების პროტოკოლი სწორად დაიცვას. ამისთვის კი აუცილებელია:
მოძველებული ყავის აპარატების ახლით ჩანაცვლება
საქართველოში არსებულ კაფე-რესტორნების უმრავლესობაში, ყავის მოსაამზადებელი დანადგარების ექსპლუატაციის ვადა უკვე ამოწურულია. მუდმივად განახლებად ჰორეკა ინდუსტრიაში ყავის მარცვლის ძველი აპარატები მსოფლიოს მასშტაბით თითქმის არცერთ დიდ ბრენდებს აღარ აქვს. ყველა ცდილობს გადავიდეს ახალ, თანამედროვე, მარტივად მოსახმარ აპარატებზე, რომელიც ყავის მოყვარულებს შესაძლებლობას აძლევს მუდმივად ერთნაირი, გემრიელი სასმელი მიირთვან.
აპარატის პერმანენტულად და სრულყოფილად წმენდა
ყავის აპარატის არასწორი წმენდა ან მისი სრულად უგულებელყოფა დანადგარის მექანიზმში ცხიმის დაგროვებას იწვევს, რის შედეგადაც ყავის ფილტრაცია სრულყოფილად ვერ ხდება და სასმელი არასასიამოვნო გემოს იძენს, მარცვლის აპარატი კი ხშირად გამოდის მწყობრიდან. სამწუხაროდ, ჩვენს ქვეყანაში კვების ობიექტების დიდ ნაწილში ყავა ჯერ კიდევ მოძველებული მარცვლის აპარატებით მზადდება, მათი წმენდის საჭიროება კი შესაბამისად ასმაგდება. საბოლოო ჯამში ეს ყველაფერი ყავის სხვადასხვა სასმელის გემოზე აისახება.
ყავის სწორად ჩამოფქვა და შენახვა
ყავა, გამოყენებამდე ჰერმეტულად დაცულ სივრცეში უნდა იყოს მოთავსებული, მომზადების წინ კი სწორად უნდა ჩამოიფქვას. ხარისხიანი, მაგრამ არასწორად დაფქული მარცვლისგან, შეიძლება არასასიამოვნო გემოვნური თვისებების სასმელი მივიღოთ, მიუხედავად იმისა, ყავის მომზადების მომდევნო ნაბიჯები სწორად იქნება შესრულებული თუ არა.
ამასთან, მარცვლის საფქვავის ყოველდღიური მოვლა ისევე მნიშვნელოვანია, როგორც ყავის დანადგარის გაწმენდა. თუ საფქვავი ყავის ნარჩენებისგან ყოველდღიურად სწორად არ გაიწმინდა, მექანიზმში დაგროვდება ცხიმის ნარჩენები, რაც მომავალში მარცვლის სისუფთავეზე და გემოზე მოახდენს ზეგავლენას და გამოიწვევს ბაქტერიების გამრავლებას.
რაც შეეხება ყავის შენახვას, ცნობილია, რომ ტენიანი გარემო და მზის პირდაპირი სხივები ყავის მარცვლის „მტერია“, თუმცა მისი სწორად შესანახად მხოლოდ აღნიშნული ფაქტორების გათვალისწინება არ არის საკმარისი. სასურველია, ყავის მარცვლის შეფუთვა გახსნის შემდეგ დიდხანს არ იყოს ჰაერთან კონტაქტში. დიდი ხნის წინ ჩამოფქული და არასწორად შენახული ყავა განიცდის ჟანგვას, სრულად კარგავს არომატს და უფრო მწარე გემოს იძენს, რაც მომხმარებლისთვის არასასიამოვნოა.
რძის ამომყვანის მოვლა და დროულად გასუფთავება
იმის გამო, რომ ჰორეკა სექტორი ყოველდღიურად ათასობით მომხმარებელს ემსახურება, რომელთა დიდი ნაწილიც ობიექტში სწორედ გემრიელი კაპუჩინოსა და ლატეს დასაგემოვნებლად მიდის, ბარისტები რძის ამომყვანის დროულად გასუფთავებას ვერ ასწრებენ, რადგან ხშირ შემთხვევაში ერთმანეთის მიყოლებით რამდენიმე შეკვეთის მიღება უწევთ.
ვისაც ყავის აპარატი სახლში აქვს და კაპუჩინოს ხშირი მომხმარებელია, იცის, რომ რძის ამომყვანი მისი გამოყენებისთანავე უნდა გაასუფთაოს, რადგან რძე ერთ-ერთი ყველაზე სწრაფად მალფუჭებადი პროდუქტია და შეიძლება, გაურეცხავ ჭურჭელში მეორედ ამოყვანილმა რძემ ჯანმრთელობის პრობლემებიც შეგვიქმნას.
ჩამოთვლილი რეკომენდაციები ერთი შეხედვით მარტივი გასათვალისწინებელია, თუმცა ხარჯების გამო კვების ობიექტები მათ ხშირ შემთხვევაში უგულებელყოფენ, რაც საბოლოოდ, მაინც სტუმრების კმაყოფილებასა და რესტორნისა თუ კაფეს რეპუტაციაზე აისახება.