"რუსეთის უკრაინაში შეჭრის შედეგად 25 000 კილომეტრზე მეტი გზა, რამდენიმე ასეული ხიდი და 12 აეროპორტი განადგურდა" - შმიგალი
უკრაინის პრემიერ-მინისტრის დენის შმიგალის განცხადებით, რუსეთის უკრაინაში შეჭრის შედეგად 25 000 კილომეტრზე მეტი გზა, რამდენიმე ასეული ხიდი და 12 აეროპორტი განადგურდა. ამის შესახებ უკრაინის მთავრობის მეთაურმა BBC-სთვის მიცემულ ინსტერვიუში განაცხადა.
შმიგალის თქმით, 100-ზე მეტი სასწავლო დაწესებულება, დაახლოებით 500 სამედიცინო პუნქტი და 200 საწარმო ასევე განადგურებული და დაზიანებულია.
"ეკონომიკის, დაახლოებით, 35% ახლა არ ფუნქციონირებს“,- აღნიშნა პრემიერმა.
შმიგალის ინფორმაციით 300 000 კვადრატულ კილომეტრზე მეტი ტერიტორია დანაღმული ან დაბინძურებულია ბომბებით. მისი შეფასებით, ქვეყნის შიდა პროდუქტის 30-დან 50%-მდე დაკარგულია. ბიუჯეტის თვიური დეფიციტი 5 მილიარდ დოლარს შეადგენს. სხვადასხვა შეფასებით, ინფრასტრუქტურისა და ეკონომიკის პირდაპირი ზარალი დაახლოებით, 600 მილიარდ დოლარს შეადგენს.
ქვეყნის პრემიერის თქმით, ხელისუფლებამ 50 მილიარდი დოლარი გამოყო დაუყოვნებლივი რეკონსტრუქციისთვის, სადაც ეს შესაძლებელია.
"შემდეგი ეტაპი იქნება ძირითადი ინფრასტრუქტურის აღდგენა, როგორიც არის ელექტროენერგია, წყალმომარაგება, ხიდებისა და გზების აღდგენა“,- აღნიშნა შმიგალმა.
მისი თქმით, უკვე მესამე ეტაპი იქნება „უკრაინის დიდი აღმშენებლობა“.
"ჩვენ გვსურს არა მხოლოდ აგურისა და ბეტონის აღდგენა. ჩვენ გვინდა ავაშენოთ ახალი სახელმწიფო“,- განაცხადა პრემიერმა.
დენის შმიგალის განცხადებით, უკრაინის აღდგენა მოითხოვს ფონდების მოძიებას, საერთაშორისო დახმარებასა და რუსულ ფულს.
„ჩვენ დარწმუნებულები ვართ, რომ აგრესორმა უნდა გადაიხადოს იმ განადგურებისთვის, რომელიც მან გამოიწვია“,- განაცხადა შმიგალმა.