ჩეჩნეთში კაცებს იტაცებენ, ჯერ "საიდუმლო ციხეში" მიჰყავთ, ხოლო შემდეგ, ომში "მოხალისედ" წასვლას აიძულებენ - რას აცხადებენ უფლებადამცველები
ჩეჩნების რამდენიმე უფლებადამცველ ორგანიზაციაში აცხადებენ, რომ ჩეჩნეთში მამაკაცებს იტაცებენ და შემდეგ უკრაინაში ომში ჩართვას აიძულებენ. ამის შესახებ საუბრობენ ოპოზიციურად განწყობილი ბლოგერებიც. უფლებადამცველთა თქმით, დახმარების თხოვნით მიმართეს ჩეჩნეთის მაცხოვრებლებმა და ისინი საუბრობენ, რომ კაცებს ომში "მოხალისედ" წასვლას აიძულებენ.
მათივე თქმით, გატაცებულები ჯერ "საიდუმლო ციხეში“ მიჰყავთ, სადაც მუქარის შედეგად აიძულებენ, რომ გააფორმონ ხელშეკრულება. ინფორმაციას ამის შესახებ Кавказ Реалии ავრცელებს.
- გამოცემის ცნობით, ოპოზიციური მოძრაობა 1ADAT ჩეჩნეთის სხვადასხვა რეგიონიდან ასობით გატაცებული ადამიანის შესახებ იუწყება. ადამიანის უფლებათა ასოციაცია "Vaifond"-ის განცხადებით კი, ბოლო დროს მათ მიიღეს ათობით მიმართვა ჩეჩნეთის მაცხოვრებლებისგან იმის შესახებ, რომ მათი ოჯახის წევრებს ომში წასვლას აიძულებენ.
როგორც Кавказ Реалии წერს, ომში წასვლას ასევე აიძულებენ შშმ პირებს. "ყველაფერი ამ ადამიანების ნების საწინააღმდეგოდ ხდება“, - ამბობენ ადამიანის უფლებათა დაცვის ასოციაციაში.
აღსანიშნავია, რომ ოპოზიციურად განწყობილი ბლოგერი ისლამ ბელოკიევი გატაცების ათობით დადასტურებულ შემთხვევაზე საუბრობს და ამბობს, რომ რეალურად, ასეთი შემთხვევების რაოდენობა გაცილებით მეტია და მათგან უფლებადამცველებს ძალიან ცოტა ადამიანი მიმართავს.
ყოველივეს პარალელურად, ჩეჩნეთის ლიდერი, რამზან კადიროვი რეგულარულად აქვეყნებს სოციალურ ქსელში ვიდეოებს, სადაც ნაჩვენებია თუ როგორ გზავნის ომში ე.წ. მოხალისეებს. უკრაინის უშიშროების სამსახურის მიერ გამოქვეყნებულ ერთ-ერთ ვიდეოში კი ტყვედ ჩავარდნილი ჩეჩენი ჯარისკაცი ჰყვება, თუ როგორ ცდილობდა უარი ეთქვა უკრაინის ტერიტორიაზე საომარ მოქმედებებში ჩართვაზე, მაგრამ სარდლობამ აიძულა რომ ებრძოლა.
- ნახეთ ასევე:
- "ეშმაკი ატარებს პრადას" - რა ღირს Prada-ს ფეხსაცმელი, რომელიც რამზან კადიროვს ეცვა: ბელა ჰადიდის, სელენა გომესისა და სხვა ვარსკვლავების ფავორიტი ჩექმა ჩეჩნეთის ლიდერმაც მოირგო
- სასახლე, ყვითელი ლამბორჯინი, 44 მილიონი რუბლი წლიური შემოსავალი -კადიროვი 23 წლის ქალიშვილის მდიდრული ცხოვრების ამსახველ კადრებს აქვეყნებს (ვიდეო)