"რუსეთის ქმედება დონბასში აშკარად გენოციდის პოლიტიკაა" - ვოლოდიმირ ზელენსკი
უკრაინის პრეზიდენტის, ვოლოდიმირ ზელენსკის განცხადებით, რუსეთის გაძლიერებული თავდასხმა უკრაინის დონბასის რეგიონში გენოციდის აშკარა პოლიტიკას ასახავს.
"დონბასში, ოკუპანტების თავდასხმების შედეგად რეგიონი, შესაძლოა, დაუსახლებელ ტერიტორიად იქცეს. მათ უნდათ პოპასნაიას, ბახმუტის, ლიმანის, ლისიჩანსკის და სევეროდონეცკის ფერფლად დაწვა ვოლნოვახას, მარიუპოლის მსგავსად,“- აღნიშნა ზელენსკიმ.
მისი თქმით, რუსეთის საზღვრებთან უფრო ახლოს მდებარე ქალაქებში, როგორიცაა დონეცკი და ლუგანსკი, რუსული ძალები "კრებენ ყველას, ვინც შეუძლიათ, რათა შეავსონ საოკუპაციო კონტინგენტში დაღუპულთა და დაჭრილთა ადგილები“.
"ეს ყველაფერი, მათ შორის ჩვენი ხალხის დეპორტაცია და მშვიდობიანი მოსახლეობის მასობრივი მკვლელობები, არის აშკარად გენოციდის პოლიტიკა, რომელსაც რუსეთი ახორციელებს,“ - აღნიშნა ზელენსკიმ.
მისი თქმით, რუსეთზე ზეწოლა "სიცოცხლის გადარჩენის საკითხია" და რომ რუსეთის დაშოშმინებისკენ მიმართულ ყოველ შეფერხებას, დავას ან წინადადებას კიდევ უფრო მეტი მოკლული უკრაინელი და ახალი საფრთხეები მოაქვს.