დელეგაციები ნიკარაგუადან, ჩეჩნეთიდან და ყარაჩაი-ჩერქეზეთიდან, რუსულ და ოსურ ენებზე წარმოთქმული ფიცი - ცხინვალში ახალი მარიონეტი პრეზიდენტის "ინაუგურაცია" გაიმართა
ოკუპირებულ ცხინვალში ახალი მარიონეტი პრეზიდენტის, ალან გაგლოევის ე,წ ინაუგურაცია გაიმართა. ცერემონია ცხინვალის სახელმწიფო დრამატულ თეატრში შედგა.
ადგილობრივი სააგენტო "რესის“ ცნობით, გაგლოევმა ფიცი ე.წ. კონსტიტუციაზე რუსულ და ოსურ ენებზე დადო. ფიცის დადების შემდეგ, სცენაზე ე.წ. ცეკო-ს ხელმძღვანელი ავიდა და გაგლოევს პრეზიდენტის მოწმობა გადასცა.
ინაუგურაციას ესწრებოდნენ "სამხრეთ ოსეთის" პირველი, მესამე და მეოთხე პრეზიდენტები ლუდვიგ ჩიბიროვი, ლეონიდ თიბილოვი და ანატოლი ბიბილოვი.
ცხინვალში ინაუგურაციაზე დასასწრებად ჩავიდნენ დელეგაციები რუსეთიდან, ნიკარაგუადან, ჩეჩნეთიდან, ყარაჩაი-ჩერქეზეთიდან და ყაბარდო-ბალყარეთიდან, ასევე მას ესწრებოდნენ აფხაზეთის დე ფაქტო დესპუბლიკის, ასევე დონეცკისა და ლუგანსკის ე.წ. რესპუბლიკების პრეზიდენტები.
- "ჩემთვის უმნიშვნელოვანესი ამოცანებია კანონის დაცვა, თავისუფლების და ადამიანის უფლებების პატივისცემა, მოქალაქეთა საყოველთაო თანასწორობა“, - განაცხადა გაგლოევმა.
ცნობისთვის, ოკუპირებულ რეგიონში ე.წ. საპრეზიდენტო არჩევნების მეორე ტური 8 მაისს გაიმართა, სადაც ალან გაგლოევმა ანატოლი ბიბილოვი დაამარცხა. გაგლოევმა ხმების 56.09% მიიღო.