"გუშინ მთელი დღე ითხოვდა ფეხი გამისწორეო... არ ვიცი, როგორ ავუხსნა, რომ მეორე ფეხი აღარ აქვს" - შარტავას ქუჩაზე ავარიისას დაშავებული 8 წლის დათის დედის ემოციური პოსტი
თბილისში, შარტავას ქუჩაზე ავტოსაგზაო შემთხვევის შედეგად დაშავებული 8 წლის დათი ქოქრაშვილი ისრაელში მკურნალობას აგრძელებს. მისი ჯანმრთელობის მდგომარეობა ჯერ კიდევ რთულია, თუმცა ეტაპობრივად პროგრესი შეინიშნება.
დათის დედა, ქრისტინე მამუკაშვილი სოციალურ ქსელში ემოციურად მძიმე პოსტს აქვეყნებს.
"დათი გუშინ მთელი დღე ითხოვდა ფეხი გამისწორეო, მარჯვენა ფეხიო…რამდენჯერმე მივედი და გავუსწორე ის ერთი ცალი რაც დაგვრჩა... მიკონკრეტებს ეგ არა, მეორეო. არ ვიცი, რა გავაკეთო… რა ვუპასუხო… როგორ აუხსნა რომ მეორე ფეხი აღარ აქვს, რომ წელამდეა გადაჭრილი ჩემი პატარა. ნახევარი ბავშვი მიწევს საწოლზე და გული მისკდება რომ ვუყურებ" - წერს ქრისტინე მამუკაშვილი "ფეისბუქში".
დათი ქოქრაშვილს ავტომობილი 31 მარტს, დილით დაეჯახა. დაშავებულს საქართველოში, იაშვილის სახელობის ბავშვთა ცენტრალურ საავადმყოფოში 5 ურთულესი ოპერაცია ჩაუტარდა. მას მარჯვენა ფეხის ამპუტაცია დასჭირდა.
დათის დასახმარებლად სოციალურ ქსელში გვერდიც შეიქმნა, სადაც უამრავი ადამიანია გაერთიანებული. დახმარების მსურველებს შეუძლიათ თანხა ჩარიცხონ დათის დედის ანგარიშზე. დათის კი გამოჯანმრთელებას ვუსურვებთ.
მიმღები: ქრისტინე მამუკაშვილი, დედა
TBC ბანკის ანგარიში: #GE05TB7962745064300024
"საქართველოს ბანკის ანგარიში: #GE90BG0000000101545483