"ბლინკენის წერილის მთავარი შინაარსი რა იყო, რომ საგარეო საქმეთა მინისტრს ულოცავს თანამდებობაზე დანიშვნას... სხვანაირად როგორ შეიძლება იყოს გაგებული ეს წერილი" - პაპუაშვილი
ენტონი ბლინკენის წერილში ხაზგასმით ეწერა, რომ ამერიკის შეერთებული შტატები რჩება საქართველოს სტრატეგიული პარტნიორი. ამ წერილის მთავარი შინაარსი რა იყო, რომ საგარეო საქმეთა მინისტრს ულოცავს თანამდებობაზე დანიშვნას და მასთან თანამშრომლობას იმედებით უყურებს. სხვანაირად როგორ შეიძლება იყოს გაგებული ეს წერილი, მიკვირს, - ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს ამერიკის შეერთებული შტატების სახელმწიფო მდივნის, ენტონი ბლინკენის წერილის შეფასებისას განუცხადა.
როგორც პაპუაშვილმა აღნიშნა, საქართველო გმობს რუსეთის აგრესიას უკრაინის მიმართ და სოლიდარულია უკრაინელი ხალხის.
"საქართველო არათუ არის ამ პროცესის მონაწილე, რასაც აგრესიის დაგმობა ჰქვია, არამედ არის ინიციატორიც. როდესაც ჩვენ ვსაუბრობთ გაერო-ს რეზოლუციაზე, ჰააგის სისხლის სამართლის სასამართლოზე და სხვა ფორუმებზე, ჩვენ ვსაუბრობთ არა იმაზე, რომ რაღაცას მხარი დავუჭირეთ, არამედ ვსაუბრობთ იმაზე, რომ ჩვენ ვიყავით ინიციატორები. გაერო-ს რეზოლუციის და გადაწყვეტილების თანასპონსორები ვიყავით, ჰააგაში სისხლის სამართლის დანაშაულების სასამართლოში, სადაც დანაშაულები უნდა იქნეს გამოვლენილი, ვიყავით მიმართვის ინიციატორები, რომ გამოვლენილიყო ეს დანაშაულები. ასე რომ, საქართველო არა მხოლოდ მონაწილეობს, არამედ, პროცესის ინიციატორია. ჩვენ ჩვენი უცხოელი პარტნიორების მხრიდან მოგვისმენია აღიარება იმ წვლილისა, რომელიც საქართველოს ამ პროცესში შეაქვს“, - განაცხადა პაპუაშვილმა.
ამასთან, პაპუაშვილმა აღნიშნა, იმ პირებმა, ვისაც აქვს შენიშვნა, რომ საქართველო საკმარის ნაბიჯებს არ დგამს უკრაინის მხარდასაჭერად, ეს საკითხები წერილობით უნდა წარმოადგინოს.
"წერილობით წარმოადგინონ, რა არის ის საკითხები, რაც საქართველოს უნდა გაეკეთებინა და არ გააკეთა. ჯერჯერობით პასუხი ვერ მოვისმინეთ ამასთან დაკავშირებით, გაურბიან ამ საკითხს. არის ბევრი საუბარი, მაგრამ რეალურად არაფერი სათქმელი არ აქვთ. საქართველო აკეთებს ზუსტად ყველაფერს იმისთვის, რომ იყოს სოლიდარული უკრაინელი ხალხის. საქართველო აკეთებს იმ მაქსიმუმს, რაც შეუძლია“, - განაცხადა პაპუაშვილმა.
ცნობისთვის, ამერიკის შეერთებული შტატების სახელმწიფო მდივანი ენტონი ბლინკენი საქართველოს საგარეო საქმეთა მინისტრ ილია დარჩიაშვილისთვის გამოგზავნილ წერილში ქვეყნის ხელისუფლებას უკრაინის მხარდაჭერისკენ მოუწოდებს. ენტონი ბლინკენის განცხადებით, მაშინ, როდესაც მთელი მსოფლიომ პასუხობს უკრაინის წინააღმდეგ დაწყებულ რუსეთის არაპროვოცირებულ ომს, საქართველოს ხელისუფლებამ უნდა გადადგას ყველა შესაძლო ნაბიჯი უკრაინის დასახმარებლად და ჩადენილი ომის დანაშაულებისთვის, რუსეთის ფედერაციისთვის პასუხისმგებლობის დასაკისრებლად.
"მაშინ, როდესაც მთელი მსოფლიო პასუხობს რუსეთის ბრუტალურ და არაპროვოცირებულ ომს უკრაინის წინააღმდეგ, მე მოვუწოდებ საქართველოს ხელისუფლებას, გადადგას ყველა შესაძლო ნაბიჯი უკრაინის მხარდასაჭერად, რათა დაეკისროს რუსეთის ფედერაციას პასუხისმგებლობა მის სამხედრო დანაშაულებებზე“, - ნათქვამია ენტონი ბლინკენის მიერ გამოგზავნილ წერილში.