"10 წელია დაოჯახებული ვარ... სოსო ჩემგან აბსოლუტურად განსხვავებულია" - ვინ არის და როგორ ცხოვრობს ჩცდ-ის მსახიობი, რომელიც მოძალადე კაცის პერსონაჟს თამაშობს
"ჩემი ცოლის დაქალების" ახალ ეპიზოდს საზოგადოებაში დიდი განხილვა მოჰყვა. სერიალის პერსონაჟი, სოსო, რომელიც კატოს პარტნიორის როლს ასრულებს, თავდაპირველად ყველას იდეალური ეგონა, თუმცა რეალურად, მისი სახით, მაყურებელმა მოძალადე კაცი ნახა.
"იდეალურმა სოსომ" ურთიერთობის დაწყებიდან მალევე დაიწყო კატოს უფლებების შეზღუდვა, მათ შორის მას იოგაზე სიარულიც აუკრძალა. ეტაპობრივად კი საქმე იქამდე მივიდა, რომ სიტყვიერი და ფიზიკური შეურაცხყოფა მიაყენა.
ჩვენს საზოგადოებაში კი, სადაც რეალურად მსგავსი არაერთი შემთხვევაა და უამრავი ქალი იტანჯება ძალადობით, რაც ზოგჯერ სიცოხლის მოსპობითაც სრულდება, გასაკვირი არ არის, რომ ეპიზოდს დიდი გამოხმაურება ჰქონდა და ამ თემაზე არაერთი პოსტი დაიწერა.
- ყურადღება მიიპყრო მსახიობმა, რომელმაც ადამიანთა დიდი ნაწილის აზრით, შთამბეჭდავად მოირგო როლი. სოსოს პერსონაჟს მსახიობი დევი ბიბილეიშვილი თამაშობს. ის მუსიკისა და დრამის ახალი თეატრის მსახიობია. როგორც ამბობს, ეს პროფესია ბავშვობიდან უნდოდა.
რამდენიმე თვის წინ, ის Ambebi.ge-სთან ინტერვიუში თავისი ცხოვრების შესახებ ჰყვებოდა. გთავაზობთ ფრაგმენტს ინტერვიუდან:
"საერთოდ ის ადამიანი ვარ, რომელიც ცხოვრებაში მუდმივად რაღაცების აღმოჩენას ვცდილობ. ჩემს საქმიანობაშიც სულ სიახლეებს ვეძებ. ექსპერიმენტებიც მიყვარს... პროფესიის გარდა ბევრი რამ მიზიდავს.
- გერმანიაში, კიოლნში ვიყავი, როდესაც დამირეკეს. ვიდეო კასტინგისთვის იქვე ჩავწერე და გამოვუგზავნე. მერე შემატყობინეს, რომ როლზე დამტკიცებული ვიყავი. ჩამოვედი თუ არა, გადაღებაზე მივედი... მალე კორონა დამემართა, მოგვიანებით - ომიკრონი. ამის გამო ფორმაში დაბრუნება ცოტა გამიჭირდა. ჯერ კიდევ ვერ ვარ სათანადო ფორმაში, რომელიც მახასიათებს, ვცდილობ, ძალები მალე აღვიდგინო და ამან საქმეზე არ იმოქმედოს.
- სერიალს როგორ აფასებთ?
- ყველა სეზონი და სერია ნანახი ნამდვილად არ მაქვს, თუმცა ამდენი წელი ეს პროექტი რომ არსებობს, მგონი, ბევრ რამეზე მეტყველებს. მას აქვს სხვადასხვა მიმართულება და ფართო სპექტრის, ჟანრობრივი განხრის პროექტია. ყველაფერს მოიცავს... ქეთი დევდარიანი ამ თემებს, ყოველდღიურსაც საინტერესოდ ეხება და სერიალს ასევე საინტერესო პერსონაჟები ჰყავს...
- თქვენი პერსონაჟი "ჩცდ"-ში გამოჩნდა თუ არა, მაშინვე ყურადღების ცენტრში მოექცა...
- სოსოს შესახებ ჯერ კიდევ ბევრი რამ არ არის გარკვეული, ანუ არ ვიცით, საბოლოო ჯამში როგორია. ამიტომ, რაც ჩანს, იმის მიხედვით ვიტყვი, დადებითი თვისებები საკმარისად აქვს. არის მიზანდასახული და ნელ-ნელა, ნაბიჯ-ნაბიჯ მიდის იქამდე, სადამდეც უნდა, რომ მივიდეს. ცოტა მძიმე კაციცაა... იცის, საზოგადოებასთან მოქცევა, მაგრამ იმის იქით სასწაულად მესაკუთრეა. რაღაც ხაზებს ავლებს და რაღაცებს აწესებს. როგორც კი ვინმეს თავისად მიიღებს, გადაწყვეტს, რომ უკვე მისია.
- როდესაც ეს პერსონაჟი შემოგთავაზეს, რა იფიქრეთ?
- ჩემგან აბსოლუტურად განსხვავებულია და უკვე საინტერესო იყო მისი თამაში. მერე ვიფიქრე, როგორი უნდა ყოფილიყო, მით უფრო, როცა გავიგე, რომ კატოს მანამდე ბევრი ქმარი ჰყავდა. ამიტომ რაღაც განსხვავებული უნდა შემექმნა. ვეძებდი რაღაცნაირ უცნაურ ტიპს. სოსო არ არის სტერეოტიპული პერსონაჟი, რომ დაინახავ და გამოიცნო, ვთქვათ, რომელი უბნიდანაა, ან როგორი ხასიათისაა.
- მსახიობი ნინო გაჩეჩილაძე, როგორ პარტნიორია?
- სერიალამდე შორიდან ვიცნობდი, მისი როლები მქონდა ნანახი. რაც შეეხება პარტნიორს, საქმის პროფესიონალია, ყოველთვის მოწოდების სიმაღლეზეა, მომზადებული და აქვე ძალიან მეგობრული ადამიანია. დიდი კომფორტია მასთან მუშაობა და მეგობრობა.
- თქვენი ოჯახის წევრები - მეუღლე და შვილი გაგვაცანით და აქვე როგორ აფასებენ თქვენს ამ როლს?
- მყავს მეუღლე სალომე ალანია და 8 წლის დემეტრე ბიბილეიშვილი. 10 წელია დაოჯახებული ვარ. მეუღლე ჟურნალისტია, მუშაობდა პროფესიით, მაგრამ ახლა ბიზნესს აკეთებს. მეუღლე მოდის ჩემს პრემიერებზე და საკმაოდ გულწრფელად მაფასებს, მეუბნება, რა მოსწონს და რა - არა. ჩვენს ურთიერთობაში ამას ვაფასებ. მისი აზრი ჩემთვის მნიშვნელოვანია. ამ სერიალსაც უყურებს, ცხადია. დემეტრეს ფეხბურთი აინტერესებს და ერთად ვუყურებთ ხოლმე. იცის, რომ სერიალში ვარ და რომ მამა არის ტელევიზორში, დიდად არ არის ჩართული.