"ახლა რუსეთი შეეცდება, ტყვეების გაცვლასთან დაკავშირებით მოლაპარაკებები გაწელოს... ეცდება, ისინი ბევრ რამეში გამოიყენოს" - რა ელით "აზოველებს"?

"აზოვსტალი", როგორც დაუმარცხებელი უკრაინის სიმბოლო, იყო თემა, რომლის გარშემოც მსოფლიო საზოგადოების ყურადღება იმაზე მეტად იყო მიმართული, ვიდრე მთლიანად ომის მსვლელობაზე. დაჭრილი აზოველი გმირები სეპარატისტების მიერ კონტროლირებად ტერიტორიაზე და რუსეთში გადაყვანილი ასობით სამხედრო, რომელთა რუს ტყვეებში გაცვლა იგეგმება - ეს არის თემა, რომლის გარშემო კამათი არ წყდება, რადგან საზოგადოების უმეტესობა რუსეთს არ ენდობა.

გუშინ რუსეთის თავდაცვის სამინისტრომ გაავრცელა ინფორმაცია, რომ "აზოვის" პოლკის დამცველთა ბოლო, 531-კაციანი ჯგუფი დანებდა.

"მარიუპოლში "აზოვსტალის" ქარხნის ტერიტორია, სადაც მიმდინარე წლის 21 აპრილიდან აზოვის ნაცისტური ფორმირების უკრაინელი ბოევიკების ჯგუფი იყო ბლოკადაში, მთლიანად გათავისუფლდა“, - განაცხადა გენერალ-მაიორმა იგორ კონაშენკოვმა.

• ამის შემდეგ უკრაინის პრეზიდენტმა ვოლოდიმირ ზელენსკიმ აღნიშნა, რომ "აზოვსტალის" მებრძოლებს მიეცათ მკაფიო სიგნალი, რომ გამოსულიყვნენ და თავიანთი სიცოცხლე გადაერჩინათ.

"დღეს ბიჭებმა მიიღეს მკაფიო სიგნალი სამხედრო სარდლობისგან, რომ მათ შეუძლიათ გამოვიდნენ და თავიანთი სიცოცხლე გადაარჩინონ", - განუცხადა ზელენსკიმ უკრაინულ ტელეარხს.

ყოფილი ქართველი სამხედრო, (უსაფრთხოებიდან გამომდინარე მის სახელს არ ვასახელებთ) რომლის მეგობრები უკრაინაში იბრძვიან, "აზოვსტალელების" გადაწყვეტილებასა და მოსალოდნელ პროცესებზე საუბრობს:

მისი თქმით, რუსეთის ნდობა ძნელია, მაგრამ რუსები თუ ერთ ტყვეს მაინც დაუშავებენ რამეს, უკრაინელები რუს ტყვეებს საჯაროდ გაასამართლებენ და დასჯიან კიდეც.

- რა ფინალითაც არ უნდა დასრულებულიყო "აზოვსტალელების" ისტორია, მათ თანამედროვე სამხედრო ისტორიაში, უპრეცედენტო მოტივაციის, სიმტკიცისა და გამძლეობის მაგალითი აჩვენეს. ნებისმიერი სამხედროსთვის დიდი პატივია მათ რიგებში ყოფნა და მათ გვერდით ბრძოლა, მნიშვნელობა არ აქვს როგორ დასრულდება ის. მათ ეპოქა შექმნეს და დანარჩენს დრო გვიჩვენებს. იმედია, მშვიდობით დაბრუნდებიან და ეს მოლოდინი რომ არ ჰქონოდათ, ამგვარ გადაწყვეტილებას არ მიიღებდნენ. დადასტურებულად ვიცი, რომ ბრძანება მოვიდა მთავარსარდლობიდან და მათ ის შეასრულეს.

ერთ-ერთი ვერსიით, რუსებმა "აზოველებში" ტყვეების გაცვლა უკვე მოითხოვეს... სავარაუდოდ, უკრაინული მხარე, პირველ რიგში, დაჭრილებსა და ქალებს მოითხოვს. სხვა საკითხია, რამდენად შეიძლება რუსეთის ნდობა. თუმცა, თუ რომელიმე მათგანის წინააღმდეგ რუსეთი სასჯელის უკიდურეს ზომის მიღებას გაბედავს, პასუხად მთელი მსოფლიოდან ყოფილი სამხედროების უკრაინაში მობილიზებას მიიღებს - ეს იქნება შურისძიება, რადგან მათ კარგად იციან რას ნიშნავს ომში თუნდაც ღირსეული მოწინააღმდეგე და მათი ღირსების დაცვას, სწორედ უკრაინაში, რუსი ჯარისკაცების წინააღმდეგ შეეცდებიან.

ჩემი ინფორმაციით, "აზოვსტალში" სამეთაურო რგოლის გარდა, თითქმის ყველა ჩაბარდა. ქართველებიც არიან ტყვეებს შორის. ჩემი მეგობარიც მათ შორის იყო. რამდენიმე დღეა ვერ ვუკავშირდებით... მგონი, ისიც ტყვედ არის. უიმედოდ არ ვარ. არც მე და არც მისი მეგობრები. თუმცა, რამდენიმე სავარაუდო სცენარს განვიხილავთ, რომელსაც რუსეთი შეეცდება სათავისოდ გამოიყენოს. ამასთან, ერთი ეჭვი მაქვს - მეშინია, ქართველები არ გაასამართლონ. თუმცა, მათ, ან სხვებს რა უნდა ათქმევინონ, 82 დღე ალყაში იყვნენ და არავითარი ინფორმაცია არ აქვთ.

პირველ რიგში, რუსული მხარე შეეცდება, დრო გაიყვანოს და ტყვეების გაცვლასთან დაკავშირებით, მოლაპარაკებები გაწელოს. ეცდება, ტყვეები ბევრ რამეში გამოიყენოს, კერძოდ, შეეცდება, უკრაინის შეიარაღებულ ძალებს ტემპი დააგდებინოს...

- რას ფიქრობთ იმაზე, რომ რუსული მხარე მათი, როგორც სამხედრო დამნაშავეების სტატუსით ითხოვს გასამართლებას?

- ეს ნიშნავს, რომ რუსეთი მხრიდან "აზოვსტალელების" მიმართ ინტერესი. ე.წ. სტავკა დიდია და შესაძლოა, მათი თავისუფლების სანაცვლოდ, სულაც ტერიტორიების დათმობა მოითხოვონ. კარგია, რომ უკრაინული მხარე აქტიურად მუშაობს საერთაშორისო ორგანიზაციებთან ერთად, რუსეთის ნდობა არასდროს შეიძლებოდა, მაგრამ მაინც რაღაცას ნიშნავს...

რაც შეეხება რუსეთის ვარაუდს აზოვსტალელების ტყვედ ჩაბარების შემდეგ, უკრაინელ სამხედროებში მოტივაციის დაგდებასთან დაკავშირებით, არც ეს იმედი მართლდება, რადგან ეს მეთაურებზეა დამოკიდებული და კიდევ იმაზე, თუ რა ახალ შეიარაღებას მიაწვდიან მათ. სრულიად ღია ინფორმაციით, ისინი ფაქტობრივად, უწყვეტად იღებენ თანამედროვე და მაღალი სტანდარტების შეიარაღებას და შესაბამისად, არ მგონია ტემპი დააგდონ.