"ნიკამაც დაადასტურა, რომ გადარიცხვების, ნახატებისა და ვეტმფრენის ისტორიის უკან ივანიშვილის დაშანტაჟების მცდელობა დგას" - რას წერს ხათუნა ხოფერია?
ყოფილი პარლამენტარი ხათუნა ხოფერია სოციალურ ქსელში პოსტს აქვეყნებს, სადაც ბიძინა ივანიშვილის გარშემო ბოლო პერიოდში განვითარებულ მოვლენებზე წერს. მისი თქმით, გადარიცხვების, ნახატების და ვეტმფრენის ისტორია ტექნიკური მიზეზებით არ არის გამოწვეული და ამ ყველაფრის უკან ივანიშვილის დაშანტაჟების მცდელობა დგას.
როგორც ხოფერია წერს, მისი ეს პოზიცია ნიკა მელიას განცხადებამაც დაადასტურა, რომელიც ენმ-ს თავმჯდომარემ ამერიკელებთან შეხვედრის შემდეგ გააკეთა.
"ეჰ, ნიკანორ, ნიკანორ! რას წარმოვიდგენდი შენ თუ დაგიმოწმებდი ჩემს განცხადებაზე. უფრო სწორედ, შენ თუ დაამოწმებდი ჩემ განცხადებას.
"სააკაშვილის უკანონო პატიმრობა და ივანიშვილის წინააღმდეგ ამ ხარისხში მიმდინარე პროცესები ცალ-ცალკე მაინცდამაინც არ უნდა განვიხილოთო" - ასე ბრძანა ბლინკენის მრჩევლისგან გამოსულმა ნიკა მელიამ.
ანუ ნიკამაც დაადასტურა, რომ გადარიცხვების, ნახატების და ვეტმფრენის ისტორია ტექნიკური მიზეზებით არ არის გამოწვეული და ამ ყველაფრის უკან ივანიშვილის დაშანტაჟების მცდელობა დგას! დიახ, ივანიშვილის დაშანტაჟების მცდელობის ჩემეული ვერსიის დადასტურება ნიკანორ მელიამ სწორედ ამერიკელებთან შეხვედრის შემდეგ გააკეთა!!!
ამ შეხვედრას კი, ჩემს მიერ ნახსენები, ბაკურიანის ტრეინინგების "სასტავი" ესწრებოდა მხოლოდ! მოკლედ, რაღაცას ისევ წვალობენ და "ირჯებიან" ამერიკელები. (და არ მინდა, ახლა , ორ ამერიკაზე ლაპარაკი. 30 წელი მესმოდა ორი რუსეთის არსებობის ზღაპარი) ამერიკა ამერიკაა და უნდა გაიგოს, რომ ივანიშვილის დაშანტაჟება სამშობლოს განადგურების ხარჯზე ვერ და არ მოხდება!
არ მოაწერს ხელს ბიძინა ამ ამბავს! აქაურმა აგენტურამ კი უნდა შეიგნოს, რომ საქართველო მათი სამშობლოცაა და ეს სამშობლო, როგორც ღმერთი, ერთია, მხოლოდ ერთი!" - წერს ხოფერია.