"ომი გაჭიანურებულ ფაზაში შედის" - რა ხდება ფრონტის ხაზზე ხერსონში, ზაპოროჟიეში, ხარკოვის ოლქში, მარიუპოლში, დონეცკსა და ლუგანსკში?
რუსი ოკუპანტები აგრძელებენ სარაკეტო დარტყმებს სამხედრო და სამოქალაქო ობიექტებზე უკრაინის მასშტაბით, - ამის შესახებ უკრაინის შეიარაღებული ძალების გენერალური შტაბის ყოველდღიური ანგარიშშია აღნიშნული.
მათივე ცნობით, რუსული ძალები აგრძელებენ უკრაინის ჯარების საარტილერიო პოზიციებისა და სამოქალაქო ინფრასტრუქტურის დაბომბვას ჩერნიგოვისა და სუმის ოლქების სასაზღვრო დასახლებებში.
"ხარკოვის მიმართულებით მტერი ორიენტირებული იყო პოზიციების შენარჩუნებასა და ჩვენი ჯარების შემდგომი წინსვლის აღკვეთაზე. აგრესორი ახორციელებს ცირკუნის, რუსკი ტიშკის, ჩერკასი ტიშკის და პიტომნიკის დასახლებების საარტილერიო დაბომბვას.
სლოვიანსკის მიმართულებით მტერი თავს ესხმის სოფელ დოვჰენკეს. გარკვეულ ტერიტორიაზე შეტევის მხარდასაჭერად განლაგებულია საარტილერიო ნაწილები.
ლოგისტიკური მხარდაჭერისა და დანაკარგების დანაყოფების შესავსებად, რუსმა აგრესორმა რუსეთის ფედერაციის ტერიტორიიდან იარაღი და სამხედრო ტექნიკა გადმოიტანა,“- აცხადებენ გენერალურ შტაბში.
მათივე ცნობით, დონეცკის მიმართულებით რუსული ძალები აგრძელებენ შეტევას ლიმანის, სევეროდონეცკის, ბახმუტის, ავდიივკასა და კურახივის მიმართულებებით.
"ლიმანის მიმართულებით მტერმა დაიწყო შეტევა დრობიშევის დასახლებაზე სრული კონტროლის დასამყარებლად და ჩრდილოეთიდან ლიმანის ბლოკირების მიზნით. ბახმუტისა და სევეროდონეცკის მიმართულებებით, აგრესორმა ლუგანსკის ოლქში შეტევის მხარდასაჭერად თხუთმეტამდე ვერტმფრენის კონცენტრირება განახორციელა,“- აცხადებენ გენშტაბში.
- მათივე ცნობით, მარიუპოლში რუსული ძალების ძალისხმევა კვლავ მიმართულია "აზოვსტალის“ ქარხნის ტერიტორიაზე უკრაინის ქვედანაყოფების ბლოკირებაზე.
"მტრის ძალისხმევა მიმართულია ჩვენი ქვედანაყოფების ბლოკირებაზე "აზოვსტალის“ ქარხნის ტერიტორიაზე. მტერი აგრძელებს საარტილერიო და საჰაერო დარტყმებს,“- აცხადებენ გენშტაბში.
მათივე ცნობით, ნოვოპავლოვსკისა და ზაპორიჟიეს მიმართულებებით რუსეთი აძლიერებს ჯგუფებს, პოლოჰი-ორიხივის მიმართულებით შეტევის განხორციელების მიზნით.
გენშტაბში აცხადებენ, რომ უკრაინელმა სამხედროებმა, ბოლო 24 საათის განმავლობაში, დონეცკსა და ლუგანსკში მტრის თორმეტი შეტევა მოიგერიეს.
"ბოლო 24 საათის განმავლობაში დონეცკისა და ლუგანსკის მიმართულებით მტრის თორმეტი შეტევა მოიგერიეს, განადგურდა სამი ტანკი, სამი საარტილერიო სისტემა, ექვსი ერთეული ჯავშანტექნიკა და შვიდი ერთეული საავტომობილო ტექნიკა,“- აცხადებენ გენშტაბში.
ასევე ვრცელდება ინფორმაცია, რომ ოკუპანტებმა სარაკეტო შეტევა მიიტანეს ლვოვის მახლობლად სამხედრო-სასწავლო ცენტრ "დესნაზე", რომლის დროსაც 8 ადამიანი დაიღუპა, 12 კი დაშავდა.
უკრაინის თავდაცვის მინისტრის, ოლექსი რეზნიკოვის განცხადებით, როგორც ჩანს, რუსეთი გრძელვადიანი ომისთვის ემზადება.
"არსებობს მრავალი მინიშნება იმისა, რომ რუსეთი გრძელვადიანი სამხედრო ოპერაციისთვის ემზადება. ომი გაჭიანურებულ ფაზაში შედის. ჩვენ უკვე ვხედავთ, როგორ იწყებენ რუსი ოკუპანტები საინჟინრო და საფორტიფიკაციო სამუშაოებს ხერსონის რაიონში, ზაპორიჟიაში, რათა საჭიროების შემთხვევაში თავდაცვაზე გადავიდნენ, - ამის შესახებ უკრაინის თავდაცვის მინისტრმა, ოლექსი რეზნიკოვმა განაცხადა.
იხილეთ ასევე: