"ხარკოვში ყოველდღიურად 2000 ადამიანი ბრუნდება და ეს მაჩვენებელი დღითიდღე იზრდება" - ხარკოვის ოლქის ადმინისტრაციის ხელმძღვანელი

ადამიანები, რომლებმაც ომის დაწყების შემდეგ დატოვეს ხარკოვი, ქალაქში დაბრუნებას იწყებენ. ამის შესახებ ინფორმაციას ხარკოვის ოლქის სამხედრო ადმინისტრაციის ხელმძღვანელი ოლეგ სინეგუბოვი ავრცელებს.

"ქალაქ ხარკოვის გავლით ხალხი ბრუნდება, გუშინ ჩვენ ვესაუბრეთ ,,უკრზალიზნიცის“ ხელმძღვანელობას, ისინი საჭირო რაოდენობის სამგზავროებს ამატებენ მატარებლებს, რომლებიც მიდიან ხარკოვში ლვოვის მიმართულებით. ახლა ჩვენთან ყოველდღიურად დაახლოებით 2000 ადამიანი ბრუნდება და ეს მაჩვენებელი დღითიდღე იზრდება“, -აღნიშნა გუბერნატორმა.

მისი თქმით, მეტროში ახლა 4500 ადამიანი ცხოვრობს და ბინებთან დაკავშირებით პრობლემის მოგვარებაა საჭირო.

"მეტროში ახლა 4,5 ათასი ადამიანი ცხოვრობს. ჩვენ გვჭირდება დროებითი საცხოვრებლის უზრუნველყოფა ინფრასტრუქტურის გამართვის მიზნით“, - დასძინა სინეგუბოვმა.

ამერიკული კვლევითი ინსტიტუტის ცნობით, რუსმა სამხედროებმა, როგორც ჩანს, გადაწყვიტეს მთლიანად მიატოვონ თავიანთი პოზიციები ხარკოვის გარშემო.