"უკრაინის დედაქალაქი კვლავ რუსეთის მთავარი სამიზნეა - თავდასხმა ნებისმიერ წამს შეიძლება განხორციელდეს" - ვიტალი კლიჩკო
კიევის მერი, ვიტალი კლიჩკო დედაქალაქის მოსახლეობას სიფრთხილის გამოჩენისკენ მოუწოდებს და აცხადებს, რომ უსაფრთხოების გარანტიას ვერავის მისცემენ.
"უსაფრთხოება ახლა მთავარი პრიორიტეტია. რა თქმა უნდა, ვიმედოვნებთ, რომ ჩვენი მეომრები დაგვიცავენ, მაგრამ რისკი ჯერ კიდევ არსებობს და ჩვენი პარტნიორების გარეშე, შეერთებული შტატებისა და ევროპის ქვეყნების გარეშე ჩვენ ვერ გადავრჩებით", - აღნიშნა კლიჩკომ.
მისი თქმით, "ეჭვგარეშეა", რომ უკრაინის დედაქალაქი კვლავ რუსეთის "მთავარი სამიზნეა". მერმა კიევში დაბრუნებულ მოსახლეობას სიფრთხილისკენ მოუწოდა.
"როგორც კიევის მერი, მე ვეუბნები ყველას, უკაცრავად, ეს თქვენი პირადი რისკია, მაგრამ გარანტიას ვერ მოგცემთ. სანამ უკრაინაში ომია გარანტიას ვერც ერთ უკრაინელს ვერ მივცემთ,“- აღნიშნა კლიჩკომ.
მისი თქმით, რუსულმა ძალებმა თავდასხმები შეიძლება "ნებისმიერ წამში“ განახორციელონ.