"ამ დავაში ივანიშვილი მართალი იყო... კობახიძემ ხან კიევი მობოდა, ხან - "ნაცმოძრაობა“, ხან - ევტუშენკოვი... თავისი დღევანდელი ბოდვით ბიძინა მხოლოდ დააზიანა" - გია ხუხაშვილი

2022 წლის მარტში ცნობილი გახდა, რომ საქართველოს ყოფილმა პრემიერ-მინისტრმა ბიძინა ივანიშვილმა შვეიცარიულ ბანკ Credit Suisse-თან მიმდინარე დავა მოიგო. გამოცემა Finantial Times-ი წერდა, რომ Credit Suisse-ს ივანიშვილისათვის 500 მილიონი აშშ დოლარი უნდა გადაეხადა მას შემდეგ, რაც ბერმუდის სასამართლო გადაწყვეტილებას გამოაქვეყნებდა.

9 მაისს კი გავრცელდა ინფორმაცია, რომლის მიხედვით, ბიძინა ივანიშვილი შვეიცარიულ ბანკ Credit Suisse-ს მეორედ უჩივის. ივანიშვილის მიერ დაქირავებული PR კომპანია Cision-ის მიერ გავრცელებულ ინფორმაციაში ნათქვამია, რომ Credit Suisse-ს მიერ ბენეფიციარების ინტერესების დასაცავად და საჭიროებისამებრ თანხის გაცემის უზრუნველსაყოფად დაფუძნებულ Green Vals Trust-ში ბანკმა ოპერაციები შეაყოვნა, რითაც ივანიშვილს მნიშვნელოვანი ფინანსური ზიანი მიადგა. განცხადების თანახმად, სარჩელი წარმოიშვა ბენეფიციარების აქტივების მართვასთან დაკავშირებით რწმუნებულის ვალდებულებების სერიოზული დარღვევისა და კლიენტის კანონიერი ინტერესების უგულებელყოფის შედეგად.

"2022 წლის 4 მარტს ბენეფიციარებმა მოითხოვეს თანხის გაცემა, რომელიც მეურვემ მხოლოდ 2022 წლის 4 აპრილს დაამტკიცა, რამაც ბენეფიციარებს ფინანსური ზიანი მიაყენა. მეურვემ შეფერხების დასასაბუთებლად მოიხსენია "გეოპოლიტიკური გარემო აღმოსავლეთ ევროპაში“. ბენეფიციარებს რუსეთის მიერ უკრაინაში შეჭრასთან არანაირი კავშირი არა აქვთ და რამე სანქციებს არ ექვემდებარებოდნენ.

ბიძინა ივანიშვილს, საქართველოს ყოფილ პრემიერ-მინისტრს, აქვს ორმაგი მოქალაქეობა მხოლოდ საფრანგეთთან და საქართველოსთან, არ არის და არ შეიძლება იყოს დაკავშირებული სანქცირებული ორგანიზაციებისა და პირების სიასთან. ეს ინფორმაცია ხელმისაწვდომია საჯაროდ, თუმცა რწმუნებულმა ვერ შეძლო ამ საჯაროდ ცნობილი ინფორმაციის დროული გადამოწმება და სავარაუდოდ, ბატონი ივანიშვილი ბანკისგან არა მხოლოდ დისკრიმინაციის, არამედ პოლიტიკური ზეწოლის კამპანიის მსხვერპლიცაა“, - ნათქვამია PR კომპანიის განცხადებაში.

განცხადებაში ასევე აღნიშნულია, რომ ივანიშვილის მიერ წამოწყებული გლობალური სასამართლო პროცესი Credit Suisse-ისა და მისი განყოფილებების წინააღმდეგ მრავალი წელია მიმდინარეობს და 2022 წლის 29 მარტს ბერმუდის უზენაესმა სასამართლომ სრულად დააკმაყოფილა ივანიშვილისა და მისი ოჯახის სარჩელები. სინგაპურის სასამართლო დავა კი 2022 წლის სექტემბერში დასრულდება.

პიარ კომპანიის განცხადების თანახმად, ივანიშვილის მიზანია საკითხზე საზოგადოების სათანადო ინფორმირება და უახლოეს კვირებში საერთაშორისო მედიისთვის პრესკონფერენციების სერიის მოწყობას აპირებს.

ბიძინა ივანიშვილი Credit Suisse-ს ექვსი წელი ედავებოდა და ბანკს ანგარიშიდან 500 მილიონ დოლარზე მეტის გაფლანგვასა და თაღლითობაში ადანაშაულებდა.

ივანიშვილის ბანკირი პატრიკ ლესკადრონი იყო, რომელმაც საქმის მასალების თანახმად, ივანიშვილის კუთვნილი თანხა საფონდო ბირჟაზე ერთ-ერთ კომპანიაში დააბანდა და დაკარგა. მას თაღლითობის გამო 2018 წელს ბრალი დაუდასტურდა, თუმცა Credit Suisse-ი აცხადებდა, რომ ლესკადრონი დამოუკიდებლად, ბანკისგან მალულად მოქმედებდა.

"ქართული ოცნების“ თავმჯდომარე ირაკლი კობახიძე შვეიცარული ბანკის Credit Suisse-ს მიერ ბიძინა ივანიშვილის კომპანიის ოპერაციების შეფერხებას გამოეხმაურა და აღნიშნა, რომ "როცა კონკრეტული შვეიცარიული ბანკი ერთი თვის განმავლობაში აფერხებს გადარიცხვას, ეს დამატებით კითხვებს აჩენს“.

კობახიძემ არ გამორიცხა, რომ შვეიცარიული ბანკის გადაწყვეტილება, კომპანიისთვის, 4 მარტს მოთხოვნილი თანხის გადარიცხვა მხოლოდ 4 აპრილს დაედასტურებინა, "კოორდინაციის შედეგი“ იყოს. რაც შეეხება კითხვას, რამდენად ეთანხმება საზოგადოების იმ ნაწილს, ვინც შვეიცარიული ბანკის აღნიშნული გადაწყვეტილების უკან ამერიკის შეერთებულ შტატებთან კოორდინაციას ხედავს, კობახიძე კონკრეტული პასუხისგან თავს იკავებს, თუმცა აცხადებს, რომ კოორდინაციის შესახებ კითხვები ლოგიკურია.

მისივე თქმით, თუ ვინმეს სურს, ამით ბიძინა ივანიშვილი პოლიტიკაში მოაბრუნოს, "ივანიშვილს კარგად არ იცნობს“.

„არ ვიცი, ამის მიზეზი რა უნდა იყოს, თუ ვინმეს აქვს იმის მცდელობა, რომ ბიძინა ივანიშვილი მისი ნების წინააღმდეგ შემოაბრუნოს ქართულ პოლიტიკაში იმისათვის, რომ ქვეყანა ომში ჩაერთოს, მე მგონია, რომ ეს მინიმუმ მიუღებელია და პრინციპულად არასწორია და თუ ვინმეს ასეთი მცდელობა აქვს. ვფიქრობ, ის ივანიშვილს კარგად არ იცნობს, არ ახსოვს ის თავდადება და თავგანწირვა, რაც მან გამოავლინა,“ - განაცხადა კობახიძემ.

"არ ვიცი, ამას შეგნებულად აკეთებს, თუ სიბრიყვით, მაგრამ როგორც კობახიძემ თავისი დღევანდელი ბოდვით ბიძინა დააზიანა, ამას მისი დაუძინებელი მტერიც კი ვერ მოახერხებდა…" - ამ სტატუსით გამოეხმაურა "ფეისბუკში“ პოლიტოლოგი გია ხუხაშვილი ირაკლი კობახიძის კომენტარს. რატომ შეიძლება გახდეს დამაზიანებელი კობახიძის კომენტარი, პოლიტოლოგი ამბები.გე-სთან განმარტავს:

"ეს არის სერიოზული დავა ძალიან სერიოზულ ბანკთან და როდესაც ასეთ საქმესთან დაკავშირებით რაღაცა პოლიტიკური ინსინუაციების და შეთქმულების თეორიების განვითარება ხდება, ეს მოწინააღმდეგე მხარის ადვოკატმა შეიძლება თავის სასარგებლოდ გამოიყენოს. ეს არის კერძო დავა და მიმაჩნია, რომ ამ კონკრეტულ დავაში ბიძინა ივანიშვილი მართალი იყო, ეს დაადასტურა კიდეც სასამართლომ, მაგრამ გაჩნდა რაღაც პრობლემები. ამ საქმეში ჩართულნი არიან მსოფლიო დონის იურისტები და, შესამამისად, ამ ტიპის პოლიტიკური განცხადებები დამაზიანებელია. კობახიძემ ხან კიევი მობოდა, ხან - "ნაციონალური მოძრაობა“, ხან - ევტუშენკოვი... რეები იბოდიალა, მიედ-მოედო ყველაფერს და, ბუნებრივია, როდესაც მსგავსი შეთქმულების თეორიები განვითარდება და ამ თემის პოლიტიზირება ხდება, როცა მასში პოლიტიკოსები ერთვებიან, ეს მხოლოდ აზიანებს იმას, ვისაც ვითომდა იცავენ. მეორე, ტექსტებია აბსოლუტურად გაუგებარი, კობახიძემ უკრაინის ხელისუფლებაზეც კი მობოდა და ლამის ამერიკელებს დააბრალა ეს ყველაფერი - მას ამერიკელებზე გაჭრილი ტექსტით ჰკითხეს და არ უპასუხა. როდესაც ასეთ კითხვაზე არ პასუხობ, ეს თანხმობის ნიშანია. მოკლედ, ეს იყო ერთი დიდი ბოდვა, რომელ ერთს გაუძლებ? ან რატომ უნდა უნდოდეს და ვის უნდა უნდოდეს ივანიშვილის პოლიტიკაში მობრუნება? რაზე გავაკეთო კომენტარი, ამ ბოდვაზე? ეს არის კომერციული დავა ორ სუბიექტს შორის და რა შუაშია აქ კობახიძე და პოლიტიკა, ვერ გავიგე“...

კითხვაზე, შესაძლებელია თუ არა, რომ შვეიცარული ბანკის მიერ ივანიშვილის კომპანიის ოპერაციების შეყოვნება იყოს სანქციებზე მინიშნება, პოლიტოლოგი პასუხობს, რომ ის ამის ვერანაირ საფუძველს ვერ ხედავს:

"არ ვიცი, პასუხისგან თავს შევიკავებ. მე ის ვიცი, რომ თვითონ ბანკი იყო პასუხისმგებელი იმ თაღლითობაში, რაც მის თანხებთან დაკავშირებით მიმდინარეობდა, ამაში დარწმუნებული ვარ. ჩემის აზრით, ბიძინა ივანიშვილი არსებით დავაში არის მართალი და ეს სასამართლოშიც დადასტურდა. ჩემს თავს ვერ მივცემ უფლებას ამაზე კომპეტენტურად ვიმსჯელო. სიმართლე გითხრათ, იმის იქეთ არაფერი ვიცი, მაგრამ ჩვენს ხელთ არსებული ინფორმაციით, ვერანაირ საფუძველს ვერ ვხედავ იმისას, რომ ბიძინა ივანიშვილს სანქციები დაუწესდეს“, - გვეუბნება გია ხუხაშვილი.