ბრძოლა შვილის ღიმილისთვის - "ყველა მამა ოცნებობს ბავშვის ჯანმრთელობაზე... ყოველ დღე ჩემს თავს ვეუბნებოდი, - შენ ეს უნდა შეძლო - მეთქი!"

UFC-ში ვიღაც იბრძვის დიდებისთვის, ვიღაც ფულისთვის, ზოგისთვის ეს უბრალოდ ჰობი და საყვარელი საქმეა, თუმცა მარლონ "ჩიტო“ ვერასთვის ოქტაგონზე თითოეული გამართული შეხვედრა მისი ქალიშვილისთვის ტარდებოდა. UFC-ის პირველი ეკვადორელი მებრძოლის გზა ურთულესი იყო, ის ოქტაგონზე გადიოდა "ფარით ან ფარზე“ დევიზით და თან იმაზე ფიქრობდა, რომ მის პატარა შვილს ძვირადღირებული ოპერაცია სჭირდებოდა.

მარლონი 19 წლის იყო, ხოლო მისი მეუღლე 17-ის, როდესაც შვილი - ანა პაულა შეეძინათ. ახალგაზრდა მშობლები უბედნიერესები იყვნენ, მაგრამ ექიმებმა აცნობეს, რომ გოგონას უიშვიათესი დაავადება - მებიუსის სინდრომი ჰქონდა. ეს არის ნევროლოგიური პათოლოგია, რომელიც სახის კუნთების მუშაობას არღვევს და საუბარს ართულებს. მსგავსი სინდრომით დაავადებულებს უჭირთ მიმიკის მიღება, ხშირად ელამდებიან, უჭირთ საუბარი და საყლაპავი რეფლექსებიც დაქვეითებული აქვთ.

"ჯერ კიდევ კლინიკაში ვიყავით, ახალი დაბადებული იყო, როცა ექიმმა გვაცნობა ამ საშინელების შესახებ. ძალიან მძიმე პერიოდი იყო. ამან გული გამიტეხა, ყველა მამა ოცნებობს შვილის ჯანმრთელობაზე, მაგრამ ცხოვრებაში ყველაფერი რაღაც მიზეზის გამო ხდება და ღმერთს თითოეული ჩვენგანისთვის თავისი გეგმა აქვს. ზუსტად ასეთი შემთხვევები გვხდის ძლიერად და გვაიძულებს, რომ ვიბრძოლოთ", - ყვებოდა მოგვიანებით მარლონი.

ანას კუნთების ტონუსი იმდენად დაქვეითებული ჰქონდა, რომ ბავშვს ღიმილიც არ შეეძლო, როცა წამოიზარდა კი ძლივს ლაპარაკობდა. მებიუსის სინდრომი სრულფასოვან მკურნალობას არ ექვემდებარება, მაგრამ ოპერაციამ კუნთების მდგომარეობა შესაძლოა, გააუმჯობესოს. თუმცა მსგავსი ოპერაციები ძვირია, ამიტომაც ახალგაზრდა მამამ მტკიცედ გადაწყვიტა, რომ საჭირო ფინანსებს აუცილებლად გამოიმუშავებდა.

ვერამ მიზნად დაისახა, რომ ანას ღიმილს ნებისმიერ ფასად დაუბრუნებდა. მებრძოლს ფული არ ჰქონდა, თუმცა 2014 წელს UFC-ის რეალითი შოუზე მოხვდა, გადაბარგდა კალიფორნიაში და 2014 წელს ორგანიზაციაში რეგულარული კონტრაქტიც მიიღო.

მარლონის შვილის ავადმყოფობის ისტორიით, ორგანიზაციის პრეზიდენტი დეინა უაითი დაინტერესდა. ბოსს მებრძოლისთვის კარგი სიახლე ჰქონდა.

"შენი შვილი ლას-ვეგასში საუკეთესო ექიმებთან გაივლის გამოკვლევებს. კარგი ადამიანი ხარ, მოგვწონს შენთან თანამშრომლობა და ყველაფერში დაგეხმარებით“, - უთხრა უაითმა "ჩიტოს“.

უაითმა პირობა შეასრულა, ანა საუკეთესო ექიმთან გაუშვა და შესაბამისი ხარჯებიც თავის თავზე აიღო. თუმცა გამოკვლევების შემდეგ პროგრესი არ ყოფილა. მებიუსის სინდრომი სერიოზული დაავადებაა, ოპერაციის გაკეთება კი ურთულესია და, როგორც წესი, ყველა ქირურგი არ თანხმდება.

ვერა მიხვდა, რომ სიტუაცია საკუთარ ხელში უნდა აეღო. ძლივს იპოვა ქირურგი, რომელიც ოპერაციის ჩაატარებას დათანხმდა. ოპერაცია 50-80 ათასი დოლარი ჯდებოდა, თუმცა მეორე მხრივ, შვილის მდგომარეობის გამო, სპორტზე კონცენტრირებას ვერ ახდენდა - UFC-ში გადასვლის შემდეგ, 3 ბრძოლიდან მხოლოდ ერთი მოიგო. მესამე ბრძოლა, რომელსაც დეივი გრანტის წინააღმდეგ მართავდა, ვერასთვის უმნიშვნელოვანესი იყო. თუ გაიმარჯვებდა, მიღებული ჰონორარით ოპერაციის ჩატარების შესაძლებელი იქნებოდა.

"ღვთის წყალობით, თუ ყველაფერი კარგად ჩაივლის, მინდა, რომ ბრძოლის შემდეგ შვილს ოპერაცია გავუკეთო. UFC ამაში დაგვეხმარა. მათმა ექიმმა გამოკვლევები ჩაგვიტარა, შეგვიმოწმეს ბავშვი. მაგრამ შემდეგ პაუზა აიღეს. არ ვიცი, რის გაკეთებას აპირებენ. მე დახმარებას მაინც ვთხოვ. თუ ორგანიზაცია დამთანხმდება, მთელი ცხოვრება მათი მადლიერი ვიქნები. თუ არა, არანაირი პრობლემა არ არის. UFC ყოველთვის კარგად მეპყრობოდა. ჩვენ კარგი ურთიერთობა გვაქვს. მათი დახმარებით, თუ მათ გარეშე, ოპერაციას მაინც გავუკეთებ ანას. ყველაფერს გავაკეთებ, ოღონდ მის სახეზე ღიმილი დავინახო", - აცხადებდა ვერა ბრძოლის წინ.

თუმცა მარლონმა ის შეხვედრა ვერ მოიგო...

სიტუაცია რთულდებოდა. თუ დამარცხებების სერიას გააგრძელებდა, იყო საფრთხე, რომ ის ორგანიზაციიდან გაეგდოთ.

ეკვადორელი მთლიანად გადაერთო სპორტზე და ზედიზედ რამდენიმე შეხვედრა შთამბეჭდავად მოიგო. პარალელურად ფულს აგროვებდა, სხვა მებრძოლებიც ეხმარებოდნენ. მაგალითად, ფაბრისიო ვერდუმმა, კარლოს კონდიტმა და დერეკ ბრანსონმა მებრძოლს ფინანსური მხარდაჭერა გამოუცხადეს.

2018 წელს, როგორც იქნა, ოპერაციისთვის საკმარისი თანხა მოაგროვა. ის 43 ათასი დოლარი დაჯდა (იმაზე ნაკლები, ვიდრე იგეგმებოდა), ამ თანხიდან 19 ათასი მებრძოლებმა და გულშემატკივრებმა მოაგროვეს.

ოპერაცია 10 საათი გრძელდებოდა და წარმატებით დასრულდა. როცა მარლონი პალატაში შევიდა და ოპერაციის შემდეგ შვილის სახე დაინახა, ლამის გონება დაკარგა. ოპერაცია ახალი დასრულებული იყო, შესაბამისად ბავშვს სახე ჯერ დასიებული ჰქონდა, მებრძოლს ეგონა, რომ ქირურგიული ჩარევა წარუმატებელი აღმოჩნდა და ცუდად გახდა. თუმცა ექიმებმა დაარწმუნეს, რომ დროთა განმავლობაში ანას მდგომარეობა გაუმჯობესდებოდა.

გავიდა წლები, რა თქმა უნდა, ოპერაციამ სრულად ვერ უშველა ბავშვს, თუმცა სახის კუნთების მუშაობა მნიშვნელოვნად გააუმჯობესა და რაც მთავარია, ანას გაღიმება შეუძლია. ოჯახიც გაიზარდა, მარლონს კიდევ ორი შვილი შეეძინა. ანა კი სპორტზეც დაჰყავს. მამა პატარა ქალიშვილს ჯიუ-ჯითსუს ასწავლის.

"მე ვბრძოდი ჩემი შვილის ღიმილისთვის. ნებისმიერი მშობლისთვის ურთულესია, როცა შვილს ღიმილის ფიზიკური საშუალება არ აქვს. პატარაა, მისი სამყარო წმინდა და სუფთაა, რატომ არ უნდა შეეძლოს ასეთი ემოციების გამოხატვა. ეს ჩემთვის უძლიერესი მოტივაცია იყო. ყოველ დღე ჩემს თავს ვეუბნებოდი, - შენ ეს უნდა შეძლო - მეთქი!“ ჩემი მეორე შვილი, ხოსე, პირიქით, დადის და სულ იღიმება", - ყვება მებრძოლი.

ახლა ვერას სერიოზული კარიერული აღმასვლა აქვს. 2020 წელს მან გაჰაიპებული შონ ო’მელი დაამარცხა. ორი კვირის წინ კი, ტურნირის მთავარ შეხვედრაში იბრძოლა. "ჩიტო“ ელიტარული მებრძოლი გახდა და თუ ასე გააგრძელებს, ტიტულზე ბრძოლის შანსსაც მიიღებს. აღსანიშნავია, რომ ვერა, შესაძლოა ჩვენებურ მერაბ დვალიშვილსაც შეხვდეს. ამჟამად ეკვადორელი თავისი დივიზიონის მეხუთე პოზიციაზეა, მერაბი კი - მეექვსეზე.

ორი კვირის წინ მან საკმაოდ მაღალი დონის მებრძოლი, რობ ფონტი დაამარცხა. შეხვედრის დასრულების შემდეგ, ოქტაგონზე მისი მომღიმარი შვილი ანა გამოჩნდა. თუმცა კამერების შეეშინდა და დედას ამოეფარა.

"ისეთი გრძნობა მაქვს,თითქოს, რაზეც ვოცნებობდი, ყველაფერი ამისრულდა. ბედნიერი ვარ ჩემი და ჩემი ოჯახის გამო. დედაც აქ არის. დაუჯერებელია. ერთ დღესაც აუცილებლად გავხდები ჩემპიონი და ქამარს ეკვადორში ჩავიტან, დამიჯერეთ, ასე იქნება. თუ ბევრს იშრომებთ, თქვენი ოცნებები რეალობად იქცევა“, - განაცხადა ვერამ ინტერვიუში...

ავტორი: ანრი კურტანიძე