ჩეჩნეთის "პატარა დიქტატორის" მეგობარი და ოქტაგონის რისხვა - შვედურ-ჩეჩნური ცხოვრებით დიდ ბრძოლებში - ვინ არის ხამზატ ჩიმაევი?
2018 წელს, როცა კონორ მაკგრეგორისა და ხაბიბ ნურმაგომედოვის კონფლიქტი UFC-ის ფარგლებს გასცდა, მებრძოლების გარდა, მასში უკვე მათი მეგობრები და ახლობლები ჩაერთნენ, შესაბამისად, სიტუაცია უკიდურესად დაიძაბა. ზოგჯერ სამართალდამცავებსაც არ შეეძლოთ დაპირისპირებული მხარეების შეკავება. მაგალითად, კონორ მაკგრეგორი და მისი სამეგობრო 2018 წლის პირველ ნახევარში იმ ავტობუსს დაესხა თავს, რომელშიც ხაბიბი იმყოფებოდა. მაშინ რამდენიმე სხვა მებრძოლი დაშავდა, ფიზიკურ ტრავმებთან ერთად, ზოგმა ფსიქოლოგიური ტრავმაც მიიღო. კონორი კი დააკავეს.
მოგვიანებით, ირლანდიელი ყველა დაღესტნელს უარყოფით კონტექსტში მოიხსენიებდა და არ ერიდებოდა მათზე ცუდის თქმას.
სწორედ ამ დროს ერთი ჩეჩენი ახალგაზრდა შვედეთიდან დუბლინში მარტო გაფრინდა. მისი მიზანი იყო კონორის სადმე გამოჭერა და მერე უკვე მხოლოდ ღმერთმა იცის, რა მოხდებოდა. თუმცა ახალგაზრდა კაცი პოტენციურ ტერორისტს მიამსგავსეს და უკან შვედეთში გააბრუნეს.
"არ ვიცი, რატომ არ შემიშვეს. ჯერ აეროპორტში გამაჩერეს. მერე მითხრეს, თავისუფალი ხარო. გამოვედი აეროპორტიდან და სპეცსამსახურები დამადგნენ. 9 საათი გამაჩერეს პოლიციის შენობაში, სადაც ვვარჯიშობდი, აზიდვებს ვაკეთებდი... მერე მითხრეს, უკან შვედეთში წადიო. მეც წამოვედი".
ახალგაზრდა ჩეჩენი ხამზატ ჩიმაევი იყო, რომელიც სულ რაღაც 2 წელიწადში UFC-ის აღმოჩენა და მებრძოლებისთვის ნამდვილი კოშმარი გახდა.
2020 წელს, ორგანიზაციამ მას კონტრაქტი დაუდო და პირველი ბრძოლა ივლისში ჩაუნიშნა. ჩიმაევმა მოწინააღმდეგე 2 რაუნდში სასტიკად გაანადგურა. სულ რაღაც 10 დღეში ახალი შოუ იყო დაგეგმილი. იმჟამად პანდემიის პიკი იყო და ერთადერთი წერტილი, სადაც UFC ატარებდა თავის შოუებს, აბუ-დაბი იყო. ერთ-ერთი მებრძოლის, რის მაკკის, მოწინააღმდეგე გამოითიშა და მაკი უქმად დარჩა. საჭირო იყო მისთვის სხვა, ალტერნატიული ოპონენტის არჩევა. ორგანიზაციამ ჩიმაევის გუნდს მიმართა და ჰკითხა, დაინტერესებული ხომ არ იყვნენ ბრძოლაში მონაწილეობა 10 დღეში მიეღოთ, თანაც ერთი წონითი კატეგორიით ქვემოთ - ნახევრად საშუალო წონით კატეგორიაში. ხამზატი დათანხმდა. აღსანიშნავია, რომ წონის კლება ამ სპორტის ყველაზე რთული, არაკომფორტული და მტკივნეული პროცესია. მითუმეტეს, თუ ბრძოლა 1 დღის წინ გქონდა და საჭირო ხდება 10 დღეში უკვე ნაკლები წონით წარსდგე. ასევე გეტყვით იმასაც, რომ ნორმალურ პირობებში მებრძოლს საშუალდ 2-3 თვე უნდა, რომ ახალი შეხვედრისთვის მზად იყოს. თუმცა ჩიმაევმა წონაც ჩააბარა, ბრძოლაც გამართა და გაიმარჯვა კიდეც. თანამედროვე UFC-ის ისტორიაში, ეს იყო პირველი შემთხვევა, როდესაც სპორტსმენმა 10 დღის განმავლობაში 2-ჯერ იბრძოლა.
შემდეგი შეხვედრა 3 თვეში შედგა და ჩეჩენმა ოპონენტი 17 წამში დაანოკაუტა. 3 ბრძოლის განმავლობაში ხამზატს ჯამში მხოლოდ 2 დარტყმა მოხვდა, საპასუხოდ კი 200-მდე დარტყმა მიაყენა ოპონენტებს. ესეც შთამბეჭდავი შედეგია, რაც აქამდე არასდროს დაფიქსირებულა.
პოპულარობამ არ დააყოვნა, ასეთი ქარიზმატული და ეფექტური მებრძოლები UFC-ში უყვართ. თუმცა ჩიმაევმა არამხოლოდ UFC-ის, არამედ ჩეჩნეთის "პატარა დიქტატორის", რამზან კადიროვის ყურადღებაც მიიპყრო. კადიროვმა გროზნოში მიიწვია, სამეფო სუფრა გაუშალა, აცეკვა, თვითონაც იცეკვა და მოკლედ, ახალი მეგობარი შეიძინა.
სხვათა შორის, ზოგიერთი ვერსიის მიხედვით, ჩიმაევი თავის დროზე ჩეჩნეთიდან სწორედ კადიროვის რეჟიმს გაექცა, თუმცა თავად მებრძოლმა ეს ინფორმაცია უარყო.
ასევე საინტერესოა, რომ 2018 წლამდე, ვიდრე კონორზე "სანადიროდ“ წავიდა, შერეულ ორთაბრძოლებში ასპარეზობა სწორედ მაკგრეგორმა შთააგონა. მანამ კი შვედეთის ეროვნულ ჩემპიონატზე ჭიდაობდა და ფაქტობრივად, უმარტივესად სრული დომინირებით იგებდა ოქროს მედალს.
"2013 წელს მაკგრეგორისა და ალდოს ბრძოლას ვუყურებდი, სადაც კონორმა ალდო 13 წამში დაანოკაუტა. მაშინ ვიფიქრე, მე ამ ბიჭზე დიდი და ფიზიკურად ძლიერი ვარ, მასზე მყარი ფსიქოლოგია მაქვს, არ ვტყდები... თუ ეს ირლანდიელი იმარჯვებს და ჩემპიონი ხდება, მე რატომ ვერ გავხდები? თუ კი ის ასეთ ფულს შოულობს, მე რატომ ვერ ვიშოვი? და წავედი ამ სპორტში", - იხსენებს ჩიმაევი.
მიუხედავად იმისა, რომ თავდაპირველად ხამზატი ძლიერ მოწინააღმდეგეებს არ ხვდებოდა, მის გარშემო ისეთი მუხტი იყო, რომ ტიტულის მოგებას უმოკლეს პერიოდში უწინასწარმეტყველებდნენ. მის ბრძოლებს თუ ნახავდით, გაოცდებოდით, როგორ შეიძლება ერთ წონით კატეგორიის მებრძლებს შორის ასეთი ფიზიკური სხვაობა იყოს ძალაში. ჩიმა ოპონენტებს აფრიალებდა, ახეთქებდა, ხელში აიტაცებდა და ასეთ პოზიციაში გალიიდან ორგანიზაციის პრეზიდენტს ელაპარაკებოდა ხოლმე. მოწინააღმდეგეები შოკში იყვნენ, არავინ იცოდა ასეთი მანქანისთვის რა უნდა დაეპირისპირებინა. თუმცა...
გასულ წელს შვედ ჩეჩენს ბრძოლა ლეონ ედვარდსთან ჩაენიშნა. ის ჯერ გადაიდო, შემდეგ კი საერთოდ გაუქმდა. ჩიმაევი მიიკარგა, შემდეგ სოციალურ ქსელში დაწერა:
"ყველას მადლობას გიხდით ასეთი მხარდაჭერისთვის. ვფიქრობ, უკვე დასრულდა. ვიცი, რომ ქამარი ვერ ავიღე, მაგრამ ეს ჩემი ცხოვრების მთავარი გამარჯვება არც არასდროს ყოფილა. შესაძლოა, გწყინთ ეს განცხადება, მაგრამ ჩემი გული და სხეული მკარნახობს, რომ ეს დასასრულია..."
მოგვიანებით გაირკვა, რომ ჩეჩენ სპორტსმენს კოვიდი ჰქონდა და მისი დასრულების შემდეგ, საქმე გართულდა.
"მას კოვიდი ჰქონდა, რაც ისედაც არ გადაჰქონდა მარტივად, მაგრამ მკურნალობის ნაცვლად, დარბაზში დადიოდა, სარბენ ბილიკზე მაქსიმალური სიჩქარით ვარჯიშობდა, მერე კი ჭიდაობას იწყებდა. ნორმალური მკურნალობის ნაცვლად ვარჯიშმა მისი მდგომარეობა ასჯერ გაართულა", ამბობდა ორგანიზაციის პრეზიდენტი დეინა უაითი.
კოვიდის დასრულების შემდეგ, როგორც მისი გუნდელები ყვებოდნენ, ის თავის თავს არ ჰგავდა. უნდოდა ვარჯიში, მაგრამ ფერი არ ედო, მალე იღლებოდა, ბევრს ახველებდა. UFC-მა ელიტარული ექიმები მიავლინა, მაგრამ შედეგი არ იყო. ყველაფრის პრობლემა კი ის გახდა, რომ ვერ გააგებინეს, რაღაც პერიოდით არ ევარჯიშა. შეპყრობილივით იქცეოდა და ამას ბოლო არ უჩანდა...
სწორედ აქ, "აკადემიკოსმა დიქტატორმა" რამზან კადიროვმა, იფიქრა, რომ დროა უკვე სამედიცინო თერაპიაშიც ვცადო ბედიო... მან ჩიმაევი ჩეჩნეთში ჩამოიყვანა და საუკეთესო დასვენებით უზრუნველყო. მეტიც, დასვენების გარდა მანქანაც აჩუქა (მოგვიანებით ჩიმაევი ამ მანქანით ავარიაში მოყვა, თუმცა არ დაზიანებულა...).
"თბილი შეხვედრა გვქონდა, მის პატივსაცემად ჩეჩნური ესტრადის ვარსკვლავები მოვიწვიეთ, ცეკვის ანსამბლები. ყველაფერი მაღალ დონეზე იყო. ხამზატი იშვიათი თავმდაბლობით და წესრიგით გამოირჩევა და ამაში თავად დავრწმუნდი. მას უყვარს ჩვენი ერი და რესპუბლიკა. პატივს სცემს წინაპრების ტრადიციებს და ადათებს", - ყვებოდა რამზანი.
ჩეჩნეთში დასვენებამ ნამდვილად ხელი შეუწყო ხამზატის დაბრუნებას. მოგვიანებით მას ქირურგიული ჩარევებიც დასჭირდა და ფორმა დაიბრუნა.
2021 წელს კი მონატრებული დაბრუნება შედგა. ის ჩინელ ლი ცსინლიანს დაუპირისპირდა. ტრადიციულად, ჭიდაობით, ფეხი აუღო, ჰაერში აიტაცა, გალიასთან ახლოს მიიყვანა, მოწინააღმდეგე ჰაერში ჰყავდა შებოჭილი, თან UFC-ის პრეზიდენტს ელაპარაკებოდა, შემდეგ ლი ოქტაგონზე დაანარცხა, ზურგი აუღო და მოგუდა. ამ ბრძოლის შემდეგ, ხამზატმა განაცხადა, რომ ნებისმიერისთვის მზად არის და ყველას გაანადგურებდა.
რამდენიმე კვირის წინ, ჩიმაევი ბრაზილიელ გილბერტ „დურინიო“ ბერნს შეხვდა. უკვე პირველ რაუნდში იმდენი დარტყმა გაუშვა ჩეჩენმა, რამდენიც ჯამში ბოლო 4 შეხვედრაში არ ჰქონდა გაშვებული. "დურინიომ“ ჩიმას კარიერაში პირველი ღირსეული ბრძოლა მისცა. 3 რაუნდის განმავლობაში მებრძოლებმა ნამდვილი დაუნდობელი ჩეხვა მოაწყვეს. ორივე ახლოს იყო წაგებასთან, თუმცა აშკარად ჩანდა, რომ ჩეჩენს მებრძოლის სულისკვეთება არ აკლდა. საბოლოოდ მსაჯებმა გამარჯვება ხამზატს მისცეს. ბრძოლის შემდეგ ტრადიციულ ინტერვიუში კი განაცხადა:
"მთელი ცხოვრება ამას ველოდი, ვინმეს ვეცემე, დავესისხლიანებინე, მე მიყვარს ეს ყველაფერი, მადლობა გილბერტ, შენ ნამდვილი მებრძოლი ხარ. მაპატიე ყველაფრისთვის, მე გამოვედი, რომ ჩემი საქმე გამეკეთებინა.".
ახლა ჩიმაევი ყველაზე ახლოს არის ტიტულთან. მას მხოლოდ ერთი პოზიციაღა აშორებს. მეორე ადგილზეა ჩიმაევი, პირველზე კოლბი კოვინგტონი, ხოლო ჩემპიონი კამარუ უსმანია.
აუცილებლად უნდა აღვნიშნოთ, რომ ხამზატი კიდევ ერთი პერსპექტიული ქართველი მებრძოლის, გურამ ქუთათელაძეს უახლოესი მეგობარია. ისინი შვედეთში, პრაქტიკულად, ერთად ცხოვრობენ, ერთად ისვენებენ, ერთმანეთის ბრძოლებზე დადიან და ერთმანეთს ეხმარებიან. კოვიდის შემდეგ, როცა ჩიმა დაბრუნდა, "ინსტაგრამზე" გურამთან ვარჯიშის ფოტო დადო და ქართულად დაწერა: "გამარჯობა, ძმაო“. ის, რომ გურამსა და ხამზატს მჭიდრო მეგობრული ურთიერთობა აქვთ, ორივეს "ინსტაგრამზეც" კარგად ჩანს.
განსაკუთრებით ემოციური ჩიმაევი-ბერნსის ბრძოლის დროს ქუთათელაძის ემოციები აღმოჩნდა, რაც ვირუსულად გავრცელდა.
ავტორი: ანრი კურტანიძე