"უზდენოვი საქართველოში იყო, პრემიერს შეხვდა... მგონი, დასვენებაზე ისაუბრეს" - რას ამბობს გავრცელებული ჩანაწერის ერთ-ერთი ფიგურანტი, ევტუშენკოვი
25 აპრილს გავრცელებული ფარული სატელეფონო ჩანაწერის ერთ-ერთი სავარაუდო ფიგურანტი, რუსი ოლიგარქი ვლადიმერ ევტუშენკოვი "ფორმულასთან" კომენტარს აკეთებს და ამბობს, რომ მან ბიძინა ივანიშვილს ბოლოს დაბადების დღე მიულოცა. მისივე თქმით, ალი უზდენოვი, რომლის შესახებაც ივანიშვილს ჩანაწერში ესაუბრება, საქართველოში მართლაც იყო და პრემიერს შეხვდა.
ევტუშენკოვი ამბობს, რომ პრემიერს უზდენოვი "დასვენებასთან დაკავშირებულ საკითხებზე ესაუბრა." (შენიშვნა: ინტერვიუს და მის თარგმანს ტელეკომპანია "ფორმულა" ავრცელებს).
"ბოლოს ბიძინა ივანიშვილს მხოლოდ დაბადების დღე მივულოცე. მილიონი ჩანაწერი გავრცელებულა, არ ვიცი, მაგ ჩანაწერებიდან ბევრი ფეიკია.
ალი უზდენოვი საქართველოში იყო და პრემიერსაც შეხვდა. მე არ მახსოვს როდის, მგონი, მარტში. (მიზანი) არაფერი პოლიტიკური არ იყო, მგონი, დასვენებასთან დაკავშირებით ისაუბრეს. სჯობს, მას ჰკითხოთ, ნებისმიერ შემთხვევაში, ეს იყო რიგითი ვიზიტი.
კითხვაზე, აკავშირებს თუ არა მას რაიმე საქმიანი ურთიერთობა ბიძინა ივანიშვილთან, ევტუშენკოვი ასე პასუხობს:
"საქმიანი არა, მხოლოდ მეგობრული და არც არასდროს მქონია. ყოველთვის ვმეგობრობდით. ვილაპარაკეთ დასვენების საკითხზე“.
ჟურნალისტის კითხვას - პრემიერთან მან (ალი უზდენოვმა) დასვენების თემაზე ისაუბრა? ევტუშენკოვი პასუხობს - "ვფიქრობ, რომ კი"
ცნობისთვის, 25 აპრილს, youtube-ზე გავრცელებულ ფარულ აუდიოჩანაწერში, რომლის ავთენტურობაც დადგენილი არ არის, თითქოსდა ექსპრემიერი ბიძინა ივანიშვილი და რუსი ოლიგარქი ვლადიმერ ევტუშენკოვი საუბრობენ. ეს ის მილიარდერია, რომელიც მანამდე გავრცელებულ კიდევ ერთ ფარულ ჩანაწერში ივანიშვილს დაბადების დღეს ულოცავდა. აქვე აღვნიშნავთ, რომ არც ამ ჩანაწერის ავთენტურობაა დადგენილი.
გუშინ გავრცელებული ჩანაწერების თანახმად კი, ევტუშენკოვის წარმომადგენელი საქართველოს პრემიერ-მინისტრ ირაკლი ღარიბაშვილს შეხვდა.
გავრცელებულ ჩანაწერში ორი სატელეფონო საუბარია გაერთიანებული, რომელიც, ჩანაწერის თანახმად, მარტში შედგა და იგი youtube -ზე მომხმარებელმა cyber kmara - მ გამოაქვეყნა.
ნახეთ ასევე: