ილონ მასკისა და Twitter-ის "დიდი სიყვარულის" ამბავი - რატომ იყიდა მსოფლიოს ყველაზე მდიდარმა უსახლკარომ სოციალური ქსელი და დაუბრუნებს თუ არა ტრამპს მასზე წვდომას
მსოფლიოს ყველაზე მდიდარმა უსახლკარომ, ილონ მასკმა 44 მილიარდ დოლარად სოციალური ქსელი Twitter-ი იყიდა. SpaceX-ისა და Tesla-ს დამფუძნებელი ამბობს, რომ მისი მიზანია, ამ პლატფორმაზე ხელი შეუწყოს "სიტყვის თავისუფლების გაძლიერებას" და სრულად გამოიყენოს Twitter-ის შესაძლებლობები.
მედია თავდაპირველად მასკის დამოკიდებულებას აღნიშნული სოციალური ქსელის მიმართ, "უპასუხო სიყვარულს“ ადარებდა. ილონი დიდი ხანია ცდილობდა მისი აქციების ხელში ჩაგდებას, თავდაპირველად, მხოლოდ ნაწილი შეიძინა, თუმცა საბოლოოდ, მიზანს მაინც მიაღწია და საკონტროლო პაკეტის მფლობელი გახდა.
ილონ მასკს Twitter-ში უდიდესი აუდიტორია ჰყავს - 83.8 მილიონი გამომწერი. აქვეყნებს ძალიან ბევრ "ტვიტს" და მათი უმეტესობა მედიისა და საზოგადოების განხილვის საგანი ხდება. აღსანიშნავია, რომ მასკს სოციალური ქსელის ადმინისტრაციამ აუკრძალა "ტესლას" შესახებ დაეწერა, მას შემდეგ, რაც მისმა მხოლოდ ერთმა "ტვიტმა" კომპანიის აქციების ფასი მნიშვნელოვნად გაზარდა.
მაგრამ მიუხედავად ამისა, ის არასოდეს მოშორებია კლავიატურას. მასკი ამბობს, რომ სურს Twitter-ის "არაჩვეულებრივი პოტენციალის" სრული რეალიზება მოახდინოს და ნამდვილი თავისუფალი სიტყვის პლატფორმად აქციოს. მასკის თქმით, მისი მიზანი არ არის ამ პლატფორმით ფულის გამომუშავება და რომ მას განსხვავებული პრიორიტეტები აქვს.
Twitter-ის შეზღუდვებს განსაკუთრებით ამერიკელი კონსერვატორები აპროტესტებდნენ და აცხადებდნენ, რომ სოციალური ქსელი თავისი მენეჯმენტით ხელს უწყობდა ერთი კონკრეტული ფრთის პოლიტიკური შეხედულებების საზოგადოებამდე მიტანას, ხოლო განსხვავებული შეხედულებების მქონე ადამიანების ხმა დახშული იყო.
- ამის საუკეთესო მაგალითად კი ამერიკის შეერთებული შტატების ყოფილი პრეზიდენტი დონალდ ტრამპი მოჰყავდათ, რომელიც Twitter-ის აქტიური მომხმარებელი იყო და რომელსაც ამ სოციალურ ქსელზე წვდომა განუსაზღვრელი ვადით აეკრძალა.
არ არის გამორიცხული კომერციული თვალსაზრისითაც შეიცვალოს Twitter-ი და მათ შორის, შეიცვალოს გადახდის მეთოდები. საზოგადოებისთვის ცნობილია, რომ მასკი გატაცებულია კრიპტოვალუტებით და ამიტომაც, მოსალოდნელია, რომ გადახდები შესაძლებელი გახდეს მაგალითად, ბიტკოინით.
თავისი ექსცენტრიკული ხასიათის, არაორდინალური გადაწყვეტილებების, ქარიზმის გამო ილონ მასკს თაყვანისმცემელთა დიდი არმია ჰყავს. მასკი არის მსოფლიოს უმდიდრესი ადამიანი, რომელიც არ იხდის გადასახადებს, რადგანაც მისი ქონება, შემოსავლები აქციებზეა დაფუძნებული და რეალური ხელშესახები ქონება არ გააჩნია.
მოსალოდნელია, რომ მასკის Twitter-ი იქნება უფრო მრავალფეროვანი, სადაც ყველა ადამიანს ექნება შესაძლებლობა საკუთარი მოსაზრების გამოხატვის.
და ცხადია, საზოგადოებას ახლა ყველაზე მეტად აინტერესებს, დაუბრუნებს თუ არა ის წვდომას დონალდ ტრამპს ამ სოციალურ ქსელზე.
იხილეთ ასევე: