პუტინის მეხოტბის გაყინული მილიონები და გაუქმებული კონცერტები - რა დაკარგა გრეგორი ლეპსმა კრემლის მხარდაჭერის გამო? "სამხედრო რომ ვიყო, ფრონტის ხაზზე ვიქნებოდი"
პუტინის რეჟიმის მხარდამჭერი ქართული წარმოშობის მომღერალი გრეგორი ლეპსი მართალია არ იმჩნევს, მაგრამ ცუდ დღეშია. ცოტა ხნის წინ მომღერალს ამერიკისა და დიდი ბრიტანეთის ბანკებში ანგარიშები გაუყინეს, რის შედეგადაც ჯამში 20 მილიონი დოლარი დაკარგა.
გუშინ ცნობილი გახდა, რომ ერთ-ერთი ყველაზე მაღალანაზღაურებადი მომღერალი რუსეთში, ისრაელში პერსონა ნონ-გრატად გამოცხადდა. ლეპსის კონცერტები, რომელიც წმინდა მიწაზე მაისში უნდა გამართულიყო გაუქმდა და ბილეთების გაყიდვა შეწყდა. ლეპსის ოფიციალურ ვებგვერდზე "აღთქმულ მიწაზე" დაგეგმილი კონცერტების შესახებ ინფორმაცია გაქრა.
კრემლის მეხოტბე ლეპსი მარტში ლუჟნიკის სტადიონზე პუტინის მიერ გამართულ კონცერტზე გამოვიდა. ყირიმის ოკუპაციის პატივსაცემად გამართულ კონცერტზე ლეპსის გარდა მღეროდნენ რუსი ვარსკვლავები - პოლინა გაგარინა, ტიმატი, ლუბე და სხვები, რომლებიც ღიად უჭერენ მხარს პუტინის რეჟიმს.
გრეგორი ლეპსის კონცერტების გაუქმების იდეა, სავარაუდოდ, ისრაელის საზოგადოებრივ ორგანიზაციებსა და აქტივისტებს ეკუთვნით, როგორც ეს კომიკოსის ნურლან საბუროვის შემთხვევაში მოხდა, რომელსაც უკრაინის ომზე ხმა არ ამოუღია. მან ასევე შეურაცხყოფა მიაყენა თავისი უადგილო ხუმრობით უკრაინელ ქალს, როდესაც სან-ფრანცისკოში კონცერტზე გამოვიდა. მაშინ საბუროვის გამოსვლები გაუქმდა ჩიკაგოსა და თელ-ავივში.
13 აპრილს გრიგორი ლეპსმა გამარჯვების მუზეუმში საქველმოქმედო კონცერტი გამართა სამხედრო მოსამსახურეებისთვის, მათი ახლობლებისთვის, მოხალისეებისთვის და სამხედრო ექიმებისთვის.
"მე ვაკეთებ მაქსიმუმს, რაც კარგად შემიძლია. ამბობენ, რომ კარგად ვმღერი. სამხედრო რომ ვიყო, ფრონტის ხაზზე ვიქნებოდი. ქირურგი რომ ვიყო, ოპერაციას გავაკეთებდი. ვინაიდან მუსიკოსი ვარ, ვმღერი ხალხისთვის, სამხედროებისთვის..." - განაცხადა მაშინ მომღერალმა.
ლეპსი იმდენად მონდომებული მხარდამჭერია კრემლის, რომ მან თავად ვლადიმერ ჟირინოვსკიც კი გააცილა უკანასკნელ გზაზე. დუმის დეპუტატს მომღერალი წითელი ვარდებით ესტუმრა.
თავისუფლად შეგვიძლია ვთქვათ, რომ თინა კანდელაკთან ერთად ლეპსი ერთ-ერთია, რომელშიც ქართველებს არ გაგვიმართლა. ცოტა ხნის წინ რუსულმა მედიამ დაწერა, რომ ლეპსს არ ეშინია მის მიმართ დაწესებული სანქციების და ქვეყნისთვის რთულ დროს საზღვარგარეთ არ გაქცეულა. უფრო მეტიც, მან როსტოვში სამხედრო ჰოსპიტალში უკრაინაში დაჭრილი ჯარისკაცებიც კი მოინახულა.
გრეგორი ლეპსი რუსეთში მაღალანაზღაურებადი მომღერალია, მისი საღამოს ღირებულება 120 ათას ევრომდეა.
მომღერალი შავ სიაში ჯერ კიდევ 2013 წელს მოხვდა, როდესაც აშშ-ს ფინანსთა სამინისტრომ სახელი ლეპსი ეგრეთ წოდებული "პოსტსაბჭოთა მაფიის“ სიაში შეიყვანა. შემდეგ კი სიაში შემავალი პირების აქტივები შეერთებულ შტატებში დაბლოკეს და ამერიკელებს აეკრძალათ მათთან საქმიანი კონტაქტები.
ლეპსს ასევე არ უშვებდნენ დიდ ბრიტანეთში. მომღერალმა საელჩოს ვიზაზე რამდენჯერმე მიმართა, მაგრამ ყოველთვის უარი ეთქვა. მომღერალი აღშფოთებული იყო იმით, რომ მისი დოკუმენტები ოთხი თვის განმავლობაში განიხილებოდა და საბოლოოდ ახსნა-განმარტების გარეშე უარით გამოუშვეს. ისრაელის გარდა ცნობილი გახდა, რომ ლეპსი პერსონა ნონ-გრატად გამოცხადდა ლიტვაში.
გრეგორი ლეპსს პრობლემები ჰქონდა ნარკოტიკებთან და სასმელთან დაკავშირებით. მას ექიმებმა აუკრძალეს თუნდაც ერთი დოზის მიღება და სასმელი. რუსეთში წარმატებული მომღერალი განსაკუთრებულად უყვარს ვლადიმერ პუტინს და ე.წ. ქურდულ სამყაროს.