"გამარჯობაო, ქართულად მითხრა სპიკერმა, თბილად ძალიან.." - რას იხსენებს ხათუნა სამნიძე უკრაინაში ვიზიტის შემდეგ

"რესპუბლიკური პარტიის" თავმჯდომარე, ხათუნა სამნიძე რამდენიმე დღის წინ, საქართველოს საპარლამენტო დელეგაციასთან ერთად, უკრაინაში იმყოფებოდა. ქართველმა პოლიტიკოსებმა რუსი ოკუპანტებისგან განადგურებული უკრაინული ქალაქები მოინახულეს და უკრაინელ ხალხს მიუსამძიმრეს.

ისინი რადას თავმჯდომარეს, რუსლან სტეფანჩუკს შეხვდნენ. შეხვედრის შესახებ დეპუტატი ხათუნა სამნიძე "ფეისბუქში" კიდევ ერთ ახალ პოსტსა და ისეთ ფოტოებს აქვეყნებს, რომლებიც აქამდე საზოგადოებას არ უნახავს.

ის წერს, რომ რადას სპიკერი მათ ქართულად მიესალმა:

"რა ენაზე საუბრობდითო, მკითხეთ ბევრმა...

გამარჯობაო, ქართულად მითხრა სპიკერმა, თბილად ძალიან.. მე კი ვიცი, რომ ми разом!", - წერს სამნიძე.

ცნობისთვის, საქართველოს პარლამენტის 9 დეპუტატისგან შემდგარი დელეგაცია, რომელსაც პარლამენტის თავმჯდომარე შალვა პაპუაშვილი ხელმძღვანელობდა, უკრაინაში 16 აპრილს ჩავიდა.

საქართველოს პარლამენტის თავმჯდომარის დელეგაციაში, ვიცე-სპიკერები არჩილ თალაკვაძე, დავით სერგეენკო, ლევან იოსელიანი, საპარლამენტო უმრავლესობის წევრი, ბექა ოდიშარია, ასევე სხვადასხვა პოლიტიკური ჯგუფების დეპუტატები: ანა ნაცვლიშვილი, ვახტანგ მეგრელიშვილი, ხათუნა სამნიძე და გიორგი ხოჯევანიშვილი შედიოდნენ.