მიხა ხელაშვილს ეროვნული გმირის წოდება მიენიჭა - შეფიცული დიაკონის სამშობლოს შეწირული სიცოცხლე
საქართველოს ახალი ეროვნული გმირი ჰყავს. ეს წოდება პრეზიდენტმა სალომე ზურაბიშვილმა, საქართველოს თავისუფლებისთვის მებრძოლს, ქაქუცა ჩოლოყაშვილის რაზმის წევრს, სახალხო პოეტს, მიხა ხელაშვილს მიანიჭა.
ცერემონია საქართველოს პრეზიდენტის რეზიდენციაში გაიმართა.
მიხა ხელაშვილის სახელის ხსენება თითქმის საუკუნის განმავლობაში იყო აკრძალული. მისი ლექსების დიდი ნაწილი განადგურდა, მაგრამ დრომ ვერაფერი დააკლო შედევრებს, რომლებიც ხალხმა უსახელოდ, როგორც ხალხური პოეზიის მარგალიტები, ისე შემოინახა. გავიდა დრო და ამ ლექსებს მიეწერა ავტორის სახელი და გვარი, ველის პოეტი - მიხა ხელაშვილი.