"ცხოვრებაში პირველად ვიგრძენი შიმშილი“ - კოვიდაფეთქება ჩინეთში, საკვების პრობლემა, ერთმანეთს მოწყვეტილი მშობლები და ბავშვები: შანხაი უმკაცრეს "ლოქდაუნშია"

ჩინეთის უდიდეს ქალაქ შანხაიში კოვიდ აფეთქებაა. ქალაქი, სადაც 25 მილიონი მაცხოვრებელია, მკაცრი "ლოქდაუნის" პირობებში ცხოვრობს. ხუთშაბათის მონაცემებით, შანხაიში კოვიდით ინფიცირებულთა 20 000 შემთხვევა დაფიქსირდა. ორშაბათს ჩინეთის მთავრობამ შანხაის "ლოქდაუნი" განუსაზღვრელი ვადით გააგრძელა და მას შემდეგ, ადამიანებს სახლიდან გასვლა ეკრძალებათ, იმ შემთხვევაშიც კი, თუ მათ საკვები პროდუქტის შეძენა სურთ.

ოფიციალურმა პირებმა აღიარეს, რომ ქალაქი სირთულეების წინაშეა და რომ ისინი სიტუაციის გამოსწორებას ცდილობენ.

შანხაის მაცხოვრებლებს მხოლოდ საკვებით მომარაგების პრობლემა არ აწუხებთ, მათთვის ისიც პრობლემურია, რომ მთავრობა კოვიდით ინფიცირებულ ბავშვებს მშობლებს აშორებს და იზოლაციის ცენტრებში მარტო გადაჰყავთ.

ლოქდაუნის გამკაცრებული წესები ნიშნავს იმას, რომ მაცხოვრებლებს საკვების და წყლის გამოძახება და მთავრობისთვის ლოდინი უწევთ, რომ ბოსტნეული, ხორცი და კვერცხი სახლებში ჩამოურიგონ. ლოკდაუნის გამო, სახლში მიტანის სერვისები, მარკეტების საიტები და თავად მთავრობის დაწესებული მომარაგების სერვისიც გადაიტვირთა და ვერ ასწრებენ მილიონობით ადამიანის საკვებით მომარაგებას.

შანხაის ზოგიერთი უბნის მაცხოვრებელი იმასაც კი ჩივის, რომ მათთან პროდუქტები საერთოდ აღარ მიაქვთ.

ჩინურ სოციალურ მედია - Weibo-ში, ერთ-ერთმა მომხმარებელმა დაიჩივლა: "ცხოვრებაში პირველად ვიგრძენი შიმშილი“ , მეორე კი წერს: "გთხოვთ, რაც შეიძლება სწრაფად მოაგვაროთ მიტანის სერვისის პრობლემა".

ქალაქის მაცხოვრებლებმა კიდევ ერთი პრობლემა წამოჭრეს: საკვებზე ფასის მატება. ასევე ბევრი წუხს ხანშიშესულ ხალხზე და ისეთ ადამიანებზე, ვინც ვერ ერკვევა ტექნიკაში და არ შეუძლიათ ონლაინ საჭმლის გამოძახება.

ქალაქის წარმომადგენლებმა პასუხი გასცეს ხალხის საჩივარს და თქვეს, რომ მათ საკმარისი მარაგი აქვთ ბრინჯის, მაკარონის, მარცვლეულის, ზეთისა და ხორცის, მაგრამ დისტრიბუციაში აქვთ შეფერხება.

წყარო: BBC

მოამზადა: ანა სიბოშვილმა