"ლუგანსკში რუსმა სამხედროებმა აზოტის მჟავის რეზერვუარს ცეცხლი გაუხსნეს" - სერგეი გაიდაი

ლუგანსკის რეგიონული სამხედრო ადმინისტრაციის ხელმძღვანელის, სერგეი გაიდაის ინფორმაციით, ლუგანსკის ოლქის ქალაქ რუბეჟნოეში, რუსმა სამხედრო ძალებმა აზოტის მჟავის რეზერვუარს ცეცხლი გაუხსნეს, - აღნიშნულის შესახებ ინფორმაციას უკრაინული მედია ავრცელებს.

გაიდაიმ მოსახლეობას მოუწოდა, არ დატოვონ თავშესაფრები და შენობებში, კარები და ფანჯრები დაკეტონ.

"აირწინაღი აზოტის მჟავას აორთქლებისგან დასაცავად გამოიყენება. გთხოვთ, სველი სახის ნიღბები მოამზადოთ", - განაცხადა გაიდაიმ.

როგორც უკრაინული მედია Ukrinform-ი იუწყება, აზოტის მჟავა საშიშია ჩასუნთქვისას, გადაყლაპვისას, კანთან და ლორწოვან გარსთან შეხებისას. სუსტმა მოწამვლამ შესაძლოა ბრონქიტი, მსუბუქი ბრონქიოლიტი, თავბრუსხვევა და ძილიანობა გამოიწვიოს. უფრო მძიმე მოწამვლამ, შესაძლოა, ფილტვის შეშუპება გამოიწვიოს.