"ემოციურად დატვირთული დღე მქონდა..." - დავით ზალკალიანი "ფეისბუქში" გამოსამშვიდობებელ პოსტს აქვეყნებს
საქართველოს საგარეო საქმეთა უკვე ყოფილი მინისტრი, დავით ზალკალიანი სოციალურ ქსელში გამოსამშვიდობებელ პოსტს აქვეყნებს, რომელსაც თან დართული აქვს ვიდეო, სადაც ზალკალიანის მინისტრობის პერიოდში უწყების მიღწევებზე და სამინისტროს მიერ განხორციელებულ მნიშვნელოვან საქმეებზეა საუბარი.
"მეგობრებო, ემოციურად დატვირთული დღე მქონდა. ვეცადე ვრცელი სამადლობელი გამეკეთებინა და შემეჯამებინა ჩემი საქმიანობა, მაგრამ, მართალი გითხრათ, ცოტა გამიჭირდა მოკლე დროში ყველაფრის ერთად თავმოყრა და როგორც ყოველთვის, ჩემი კოლეგები საგარეო საქმეთა სამინისტროს პრესის და ინფორმაციის დეპარტამენტიდან დამეხმარნენ და ასეთი შეჯამება გამოვიდა.
დიდი მადლობა საგარეო საქმეთა სამინისტროს მთლიან შემადგენლობას, გუნდს, რომელმაც ბევრი წარმატება მოუტანა ქვეყანას და დარწმუნებული ვარ მომავალშიც მნიშვნელოვან წვლილს შეიტანს საქართველოს ევროპულ ოჯახში დაბრუნებაში.
მადლობა თქვენ, ფეისბუქის მეგობრებს, მუდმივი მხარდაჭერის და სითბოსთვის, რომელსაც გამოხატავდით ჩემი და სამინისტროს საქმიანობის მიმართ.მართალია გეოგრაფიულად შორს მივიდვარ, მაგრამ თქვენთან ახლოს ვიქნები მომავალშიც და ჩვენი ქვეყნის სამსახურში ბოლომდე დავიხარჯები, ისე როგორც ამას ვაკეთებდი ჩემი 30-წლიანი დიპლომატიური კარიერის განმავლობაში.
ღმერთმა დალოცოს საქართველო!" - წერს დავით ზალკალიანი.
ცნობისთვის, დავით ზალკალიანი ამერიკის შეერთებულ შტატებში საქართველოს ელჩად დაინიშნა, ხოლო საგარეო საქმეთა მინისტრის პოსტზე მას ილია დარჩიაშვილი შეცვლის.