"გავაგდე, როგორც უზრდელი" - თამარ ჩერგოლეიშვილი წერს, რომ დეპუტატი ნონა მამულაშვილი აქციიდან გააგდო, რას პასუხობს მამულაშვილი?
"ევროპული საქართველოს“ წარმომადგენელი და "ტაბულას" დამფუძნებელი თამარ ჩერგოლეიშვილი სოციალურ ქსელში წერს, რომ გუშინ, პარლამენტის წინ გამართული, უკირაინის მხარდამჭერი აქციიდან "ნაციონალური მოძროაბის" ერთ-ერთი ლიდერი, დეპუტატი ნონა მამულაშვილი გააგდო.
თამარ ჩერგოლეიშვილი:
"დღეს ნონა მამულაშვილი გამოცხადდა და აქციის "ჰაიჯეკინგს“ ცდილობდა - დადგა ჩვენს ფონზე და მიშაზე ლოცვებს აღავლენდა ტელევიზია "მთავარის“ დახმარებით.
(ტრადიცია ესაა - სადაც ბევრ ხალხს დაინახავენ, დგებიან და "მთავარის“ დახმარებით აქციას იპარავენ).
ცხადია მე არ დავუშვებდი, რომ ხალხისთვის მიცემული სიტყვა დამერღვია და ეს აქცია მიშაზე აქციად მექცია და გავაგდე, როგორც უზრდელი. იმედია არ გეწყინებათ. ვისაც ეწყინება, ცივი წყალი სვით', - წერს ჩერგოლეიშვილი. .
კომენტარებში ჩერგოლეიშვილს უამრავი ადამიანი გამოეხმაურა. მათ შორის "ნაციონალური მოძრაობის" ერთ-ერთმა მხარდამჭერმა დაწერა, რომ ამ დაპირისპირებით რეალურად ბიძინა ივანიშვილი ხეირობდა, რაზეც თამარმა უპასუხა:
"მე არ მოვდივარ მიშისტების აქციებზე და არ გაწუხებთ. სანამ კერპებს არ უარყოფენ და ზრდილობიანად არ მოიქცევიან, მანამდე სანიტარული კორდონი მექნება. მე არ მაინტერესებს ეგ ხალხი, ამ ქვეყნის მტრებად ვთვლი. სააკაშვილმა იქნიოს ჯვარი და იპოპულისტოს. ეგ პოპულისტების მხარეა. ჩვენ დემოკრატები ვართ. ანუ სააკაშვილის დღევანდელი იდეოლოგია ამოსაძირკვია".
თამარ ჩერგოლეიშვილის სტატუსს მალე ნონა მამულაშვილმა უპასუხა. პოლიტიკოსმა სოციალურ ქსელში სტატუსის "სქრინშოტი“ გამოაქვეყნა და დაწერა:
"მიყვარს ეს ქალი, სულ მახალისებს ხოლმე. გამაგდო თურმე შუა "ჰაიჯეკინგის“ პროცესში, უსაყვარლესია".
გუშინ საქართველოს პარლამენტის წინ "ევროპული საქართველოს", "ტაბულას" , "თავისუფლების ინსტიტუტისა“ და "ამომრჩეველთა განათლების საზოგადოების“ ორგანიზატორობით აქცია გაიმართა.