"რუსი ჯარისკაცები, რადიაციის გამო, ავად გახდნენ და ჩერნობილიდან გაიქცნენ... ისინი პანიკაში იყვნენ“ - რას წერს The Times
"რუსი ჯარისკაცები, რადიაციის გამო, ავად გახდნენ და ჩერნობილიდან გაიქცნენ“, - ამ სათაურით აქვეყნებს სტატიას გამოცემა The Times.
სტატიაში აღნიშნულია, რომ რუსული ჯარი ჩერნობილიდან გავიდა და კონტროლი უკრაინის ხელისუფლებას დაუბრუნა მას შემდეგ, რაც ჯარისკაცები მწვავე რადიაციული დასხივების შედეგად დაავადდნენ. რადიაცია კი მაშინ მიიღეს, როცა დაბინძურებულ ნიადაგში სანგრებს თხრიდნენ.
- უკრაინის სახელმწიფო ბირთვული კომპანიის ცნობით, ჯარისკაცებმა მიიღეს "რადიაციული დასხივების მნიშვნელოვანი დოზა“ მას შემდეგ, რაც სანგრები ე.წ. წითელ ტყეში გათხარეს.
ეს არის უაღრესად ტოქსიკური ზონა უფუნქციო ატომური სადგურის მახლობლად. მათივე ცნობით, ავადმყოფობის პირველი ნიშნების შემდეგ ჯარისკაცები პანიკაში იყვნენ.
აღნიშნულ ადგილს "წითელი ტყე" მას შემდეგ დაარქვეს, რაც ათობით კვადრატულ მეტრზე ფიჭვის ხეები, რადიაციის შედეგად, წითელი გახდა.
უკრაინის ოფიციალური პირები აცხადებენ, რომ დადასტურებული ინფორმაციით, რუსი სამხედროები ჩერნობილიდან ბელარუსისკენ ორ ნაკადად დაიძრნენ. აღსანიშნავია ისიც, რომ მათ დაუზუსტებელი რაოდენობის დატყვევებული უკრაინელი სამხედროები თან წაიყვანეს.