რადიო „პალიტრამ“ საეთერო ბადე, სამაუწყებლო ტექნიკა და ვებგვერდი სრულად განაახლა

რადიო „პალიტრა“ FM103.9 2022 წლიდან როგორც ტექნიკურად, ისე საეთერო ბადით სრულად განახლდა. ერთ-ერთი ყველაზე პოპულარული რადიო მსმენელს ინფორმაციას უკვე უახლესი აპარატურით გადასცემს, იქნება ეს ულტრათანამედროვე ვიდეოკამერები, მიკროფონები თუ სხვა სამაუწყებლო ტექნიკა.

სრულად განახლდა სტუდიაც, ხოლო საეთერო ბადე უფრო მრავალფეროვანი და საინტერესო გახდა. რადიო „პალიტრის“ სამხატვრო ხელმძღვანელისა და წამყვანის კოკა კვირკველიას განმარტებით, მიმდინარეობს მედიასაშუალების გაციფრულების პროცესიც, რაც ვებგვერდზე დამატებითი ფუნქციონალებისა და ახალი მედიაპროდუქტების დამატებას გულისხმობს. მათ შორის არის პოდკასტებიც, რომლებიც მომზადდება როგორც პოლიტიკურ, ისე საზოგადოებრივ თემებზე და სხვადასხვა ინტერესის მქონე მსმენელზე იქნება გათვლილი.

„რადიოში დაინერგა ახალი ტექნიკა, რაც საშუალებას გვაძლევს, გავაკეთოთ ახალი ვიდეო პროდაქშენი, რომელიც უფრო აქტიურად იქნება სოციალურ ქსელებში და ვებგვერდებზე წარმოდგენილი. ლაივსტრიმები გადაიცემა არა სტანდარტულად, როგორც აქამდე ხდებოდა, არამედ პროფესიონალურად, რისი პრეცედენტიც უცხოეთში არსებობს და გადავწყვიტეთ, ამ მხრივ ნოვატორები ვყოფილიყავით და საქართველოშიც დაგვეტესტა. წარმოიდგინეთ, რომ ეს იქნება ტელევიზიისა და რადიოს ერთგვარი სინთეზი: სატელევიზიო ფორმატის გამოსახულება და ხარისხი, უბრალოდ სტრიმები ტელევიზიის ნაცვლად გადაიცემა სოციალურ ქსელებსა და ვებგვერდებზე,“ - განმარტა მან.

სამხატვრო ხელმძღვანელის განმარტებით, რადიო „პალიტრა“ FM103.9-ის საეთერო ბადეს „პალიტრანიუსის“ პოპულარული გადაცემები დაემატა.

„გუნდთან ერთად შევქმენით ახალი საეთერო ბადე, შემოვიტანეთ პოლიტიკის ნაწილი, „პალიტრანიუსის“ ნიუსრუმები - ეს არის ნიუსრუმი კოკა კვირკველიასთან და ნიუსრუმი ლელა ბაღდავაძესთან ერთად. ასევე, გვაქვს ახალი რეგიონული საინფორმაციო გამოშვება, რომელიც ყოველდღე 16:00 საათზე გადის და საეთერო ბადეს ასევე დავამატეთ 2-საათიანი დღის ეთერი, რომელიც შემეცნებით-გასართობ თემებს ეხება. ასევე, რადიო „პალიტრაზე“ გადის თამთა ასათიანის „ლანჩ თაიმიც“, რომელშიც პოლიტიკოსები პოლიტიკის მიღმა საკუთარ ცხოვრებაზე საუბრობენ და მისი მოსმენის საშუალება პარასკევობით 16:00 საათზე გექნებათ,“ - განმარტა კოკა კვირკველიამ.

მისივე თქმით, სამომავლოდ, საეთერო ბადე კიდევ უფრო მრავალფეროვანი გახდება. რადიო „პალიტრა“ FM103.9-ის განახლებული ვებგვერდი სატესტო რეჟიმში ფუნქციონირებს და ახალი გადაცემები და ფუნქციონალები მას ეტაპობრივად დაემატება, მათ შორის პოდკასტები, რომლებიც თემატურად შეიძლება, საეთერო ბადეშიც მოხვდეს.

„განსაკუთრებული ყურადღება დაეთმობა პოდკასტებს. ჩვენთვის პოდკასტები შედარებით ახალი ხილია და საინტერესოა, როგორ მიიღებს მას მსმენელი. ისინი ჩაიწერება საზოგადოებისთვის საინტერესო თემებზე და ვაპირებთ, ეს მიმართულება განვავითაროთ,“ - აღნიშნა რადიო „პალიტრის“ სამხატვრო ხელმძღვანელმა.

რადიო „პალიტრა“ FM103.9 2008 წლიდან მაუწყებლობს და ფარავს თბილისსა და მის შემოგარენს, ზამთრის კურორტებს - გუდაურსა და ბაკურიანს და ასევე ბორჯომსა და აჭარას. სამომავლოდ კი მისი გადაცემების მოსმენა ქუთაისში, რუსთავში, კახეთში, გორსა და ზუგდიდშიც იქნება შესაძლებელი.