"წონასწორობა დავკარგე და შევცდი. მრცხვენია ჩემი საქციელის" - უილ სმიტის "აფეთქება" "ოსკარით" დაჯილდოების ცერემონიაზე: რას აცხადებს მსახიობი დღეს?

ოსკარის 94-ე ცერემონის გმირიც და ანტიგმირიც მსახიობი უილ სმიტი გახდა. ის ჯერ სცენაზე აიჭრა და კრის როკს სილა გააწნა, ხოლო ამ სკანდალიდან დაახლოებით ნახევარ საათში კი კარიერაში პირველი ოსკარი მიიღო. ამჯერად უილ სმიტი ძალადობის გამოვლენისთვის საჯაროდ იხდის ბოდიშს და სოციალურ ქსელში პოსტს აქვეყნებს.

"ძალადობა, როგორი ფორმისაც უნდა იყოს ის, დამღუპველია. ოსკარის ცერემონიაზე ჩემი საქციელი მიუღებელი და უპატიებელი იყო. ხუმრობა ჩემი საქმის ნაწილია, მაგრამ ჯეიდას ჯანმრთელობის მდგომარეობაზე ხუმრობა ჩემთვის ზედმეტი იყო და ამიტომაც მქონდა ასეთი ემოციური რეაგირება.

კრის, მინდა, საჯაროდ მოგიხადო ბოდიში. წონასწორობა დავკარგე და შევცდი. მე მრცხვენია ჩემი საქციელის. ეს საქციელი არ მეტყველებს იმაზე, თუ როგორი კაცი მინდა ვიყო. სიყვარულისა და სიკეთის სამყაროში ძალადობის ადგილი არ არის.

ასევე, მინდა ბოდიში მოვუხადო აკადემიას, შოუს პროდიუსერებს, დამსწრე საზოგადოებას, ყველას მსოფლიოში, ვინც უყურა ცერემონიას.

პატივისცემით უილი“- წერს მსახიობი.

• ოსკარის ცერემონიაზე მომხდარი ინციდენტის შესახებ დეტალურ ინფორმაციას გაეცანით ბმულზე: "ჩემი ცოლის სახელს შენი საძაგელი პირით ნუ ამბობ!" - სკანდალი "ოსკარის" გადაცემის ცერემონიაზე: უილ სმიტმა კრის როკს სილა გააწნა

ცნობისთვის ამერიკის კინოაკადემიამ გუშინ განცხადებაც გაავრცელა, სადაც ნათქვამი იყო, რომ აპირებენ ინციდენტი მოიკვლიონ, რის შემდეგაც გამორიცხული არ არის, რომ უილ სმიტს ოსკარი ჩამოერთვას. თავად კრის როკის თქმით, ის არ აპირებს უილს უჩივლოს.