"შავ სიაში" შედიოდნენ ბატიაშვილი, პეტრიაშვილი და ხიდაშელი - საზმაუს ხელმძღვანელობის მხრიდან იყო ცენზურა" - რას აცხადებენ "ახალი კვირის" სარედაქციო გუნდში?
საზოგადოებრივი მაუწყებლის გადაცემა "ახალი კვირის“ სარედაქციო გუნდის წევრების ინფორმაციით, მათ არ აქვთ შესაძლებლობა ჟურნალისტური საქმიანობა თავისუფალ გარემოში შეასრულონ.
ჟურნალისტები „შავ სიებსა“ და საზოგადოებრივ მაუწყებელზე სარედაქციო დამოუკიდებლობის პრობლემებზე საუბრობენ. როგორც საზოგადოებრივი მაუწყებლის გადაცემა "ახალი კვირის" ჟურნალისტი თამთა ჯანაძე აღნიშნავს, ხელმძღვანელობის მხრიდან იყო ცენზურის მცდელობები.
"მენეჯმენტი ცდილობდა სახელისუფლებო გუნდის წარმომადგენლების მიმართ კრიტიკული კომენტარები ან საერთოდ ამოგვეღო სიუჟეტიდან ან შეგვემოკლებინა“,- აღნიშნავს თამთა ჯანაძე.
საზოგადოებრივი მაუწყებლის პირველი არხის გადაცემა "ახალი კვირის" წამყვანის იმედა დარსალიას ინფორმაციით, არსებობდა ე.წ. შავ სია. გადაცემაზე მომუშავე ჯგუფს ეკრძალებოდა სიაში მყოფი რესპონდენტების ჩაწერა. როგორც იმედა დარსალია განმარტავს, აღნიშნულ სიაში შედიოდნენ რონდელის ფონდის ექსპერტების უმრავლესობა, განსაკუთრებით ზურა ბატიაშვილი, ალექსი პეტრიაშვილი და თინა ხიდაშელი. ამასთან, განმარტავს, რომ დაბლოკილია "ატლანტიკური საბჭოს" ქართული წარმომადგენლობა - ბათუ ქუთელია.
ამასთან, საზოგადოებრივი მაუწყებლის ჟურნალისტები - იმედა დარსალია, სოფო ზედელაშვილი და თამთა ჯანაძე სახალხო დამცველს შესაძლო დისკრიმინაციის დადგენის განაცხადით მიმართავენ.
შეგახსენებთ, რომ „საერთაშორისო გამჭვირვალობა-საქართველო“ მიმართავს სახალხო დამცველს, საზოგადოებრივი მაუწყებლის გადაცემა „ახალი კვირის“ სარედაქციო გუნდის წევრების - იმედა დარსალიას, სოფო ზედელაშვილის და თამთა ჯანაძის მიმართ შესაძლო დისკრიმინაციის და შრომით საქმიანობაში ხელის შეშლის ფაქტების გამოვლენისა და დადგენის თაობაზე.