"მოვითხოვ მოქალაქე სულხან სალაძის დახვრეტას!" - ცირა ელისაშვილი სულხან სალაძესთან დაკავშირებით ეროვნული მუზეუმის განცხადებას ეხმაურება
ხელოვნებათმცოდნე ცირა ელისაშვილი სოციალური ქსელის მეშვეობით ეხმაურება იურისტ სულხან სალაძესთან დაკავშირებით ეროვნული მუზეუმის განცხადებას. ის კულტურის სამინისტროს პოლიტიკას 37-იანი წლების საბჭოთა რეპრესიებს ადარებს.
"მოვითხოვ, მოქალაქე სულხან სალაძის დახვრეტას! სულხან სალაძე, გამოგიჭირეს, თუ არა! სირცხვილია" - წერს ხელოვნებათმცოდნე "ფეისბუქში"
ცნობისთვის, იურისტმა სულხან სალაძემ სოციალურ ქსელში დაწერა, რომ დაახლოებით ერთი თვის წინ, ეროვნული მუზეუმიდან ოფიციალურად გამოითხოვა მუზეუმის დირექტორატის სხდომის ოქმები, რაც მუზეუმმა მას დადგენილი წესის შესაბამისად მიაწოდა. სალაძის თქმით, მოგვიანებით, სხდომის ეს ოქმები ხელმისაწვდომი გახდა სხვადასხვა მედია საშუალებებისათვის, რის შემდეგაც ეროვნული მუზეუმის იმ თანამშრომლებს, რომლებმაც მასზე საჯარო ინფორმაცია გასცეს, დისციპლინური პასუხისმგებლობა დაეკისრათ.
თავის მხრივ, ეროვნულმა მუზეუმმა უპასუხა სულხან სალაძეს. მუზეუმის "ფეისბუქის" ოფიციალურ გვერდზე გამოქვეყნებული განცხადების თანახმად, სალაძის მიერ გავრცელებული ინფორმაცია სიმართლეს არ შეესაბამება.
"სინამდვილეში, მოცემულ პირებს ადმინისტრაციული სახდელი დაეკისრათ ისეთი ინფორმაციის გაცემის გამო, რომელმაც საქართველოს ერთ-ერთი რეგიონის მუზეუმში დაცული საგანძური და სხვა მნიშვნელოვანი ექსპონატები დააყენა რისკის ქვეშ.
კერძოდ, გაცემულ დოკუმენტებში, სხვებს შორის, იყო ეროვნული მუზეუმის დირექტორატის ერთ-ერთი სხდომის ოქმი, რომელიც შემდეგ მედიის მეშვეობით გასაჯაროვდა და საიდანაც ჩანს, რომ ერთ-ერთ მუზეუმს აქვს უსაფრთხოების მიმართულებით სერიოზული გამოწვევები. კერძოდ, მოცემული რეგიონის მუზეუმში, რომელიც 2004 წლიდან სსიპ საქართველოს ეროვნული მუზეუმის გაერთიანებაში შედის, დღემდე არ იყო მოგვარებული კომპიუტერული სისტემების, ვიდეოსამეთვალყურეო, დაცვის სისტემების, კვების ბლოკის, ე.წ. "იუპიესის“ პრობლემა და მუზეუმის ზონალურ ობიექტებზე გარე განათება, სიგნალიზაცია და ვიდეოსამეთვალყურეო სისტემა იყო დასამონტაჟებელი. ეს საკითხი დირექტორატის წინაშე დააყენა მოცემული მუზეუმის ახალდანიშნულმა დირექტორმა და ითხოვა ამ მრავალწლიანი პრობლემის მოგვარება.
როდესაც ეს საჯარო ინფორმაცია, რომლის გაცემაც მიზანშეწონილი არ იყო, ჩაუვარდა ხელში სულხან სალაძეს, მან ის მიაწოდა მედიას და არა მხოლოდ ეროვნული მუზეუმის თანამშრომლებმა, არამედ სულხან სალაძემაც დააყენეს სამუზეუმო ექსპონატები და საგანძური აუნაზღაურებელი ზიანის რისკის წინაშე" - ვკითხულობთ განცხადებაში.