"რა საშინელი ყოფილა, როდესაც გლოვაც არ შეგიძლია წესისამებრ..." - რას წერს ხათუნა ხოფერია უკრაინაში დაღუპულ ძმაზე?
რუს ოკუპანტებთან ბრძოლაში დაიღუპა პოლიტიკოსისა და ყოფილი პარლამენტარი ხათუნა ხოფერიას ძმა ბახვა ჩიქობავა.
სოციალურ ქსელში ხოფერია ბახვა ჩიქობას იხსენებს და წერს:
"ასე მგონია, რეალობას მოვწყდი. მოგონებებში ვცხოვრობ და მოგონებებს დავტირივარ.
54 წელი შენთან ერთად... დაწყებული პირველი სიტყვით, რომელიც დედაჩემს უთხარი ფაფის ჭამის დროს - გაგაქავ... დამთავრებული შენი ბოლო წერილით... უამრავი სიხარულით და ბედნიერებით... ჩემზე და ჩემ შვილებზე ზრუნვით. ბიჭებს რომ ვერ ვერეოდი, ვეუბნებოდი, - ბახვას ვურეკავ, მე მოვრჩი თქვენთან ჭიდაობას - თქო და... ოღონდ შენთან არ ჩამეშვა, პატარა ბავშვებივით მიყურებდნენ თვალებში. როგორ ქვემოთ, ფოტოზე, ასე იყვნენ გაშეშებულები შენთან.
რა საშინელი ყოფილა, როდესაც გლოვაც არ შეგიძლია წესისამებრ... როდესაც ტირი და იმედის სხივი გულის კუნჭულში მაინც ანათებს და... ისევ ხვდები, რომ მოგონებებს დასტირი...
რა მტკივნეული ყოფილა ეს იმედის სხივი... იქნებ... იქნებ... იქნებ...
ბახვანხულა, ბახვანხო, ბახულია, გეხვეწები რააა...
მამიდა ამბობს, - დაველოდებიო...
მე ვფიქრობ, იქნებ სჯობდეს, იმედის სხივით წავიდეს...
არ ვიცი... რეალობას მოვწყდი..."