კრემლის მხარდამჭერმა, ქართული წარმოშობის მომღერალმა, გრეგორი ლეპსმა სანქციების გამო 20 მილიონამდე დოლარი დაკარგა

რუსეთში მოღვაწე ქართული წარმოშობის მომღერალმა გრეგორი ლეპსმა მის მიმართ დაწესებული სანქციების გამო უდიდესი ფინანსური ზარალი განიცადა.

მომღერალს ამერიკისა და დიდი ბრიტანეთის ბანკებში ანგარიშები გაუყინეს, რის შედეგადაც ჯამში 20 მილიონი დოლარი დაკარგა. რუსული მედია წერს, რომ ლეპსი ერთ-ერთი ყველაზე მაღალანაზღაურებადი არტისტია რუსეთში. მისი საკონცერტო დირექტორი ამბობს, რომ ლეპსის შემოსავლის უდიდესი ნაწილი ამერიკისა და ბრიტანეთის ბანკებში ინახებოდა, ახლა კი მისი ანგარიშები გაყინულია. ცნობილია, რომ ლეპსი პერსონა ნონ გრატად მიიჩნიეს და მას სხვა ქვეყანაში შესვლის უფლებაც შეეზღუდა.

გრიგორი ლეპსი დიდი ხანია, რაც რუსული შოუბიზნესის ერთ-ერთი ყველაზე მაღალანაზღაურებადი მომღერალია. მისი საღამოს ღირებულება 120 ათას ევრომდეა.

რუსულ მედიაში წერენ, რომ ბოლო 20 წლის განმავლობაში ლეპსი თავისი შემოსავლის ნაწილს ამერიკულ და ლონდონის ბანკებში ინახავდა.

მომღერალი შავ სიაში ჯერ კიდევ 2013 წელს მოხვდა, როდესაც აშშ-ს ფინანსთა სამინისტრომ სახელი ლეპსი ეგრეთ წოდებული "პოსტსაბჭოთა მაფიის“ სიაში შეიყვანა. შემდეგ კი სიაში შემავალი პირების აქტივები შეერთებულ შტატებში დაბლოკეს და ამერიკელებს აეკრძალათ მათთან საქმიანი კონტაქტები.

ლეპსს ასევე არ უშვებდნენ დიდ ბრიტანეთში. მომღერალმა საელჩოს ვიზაზე რამდენჯერმე მიმართა, მაგრამ ყოველთვის უარი ეთქვა. მომღერალი აღშფოთებული იყო იმით, რომ მისი დოკუმენტები ოთხი თვის განმავლობაში განიხილებოდა და საბოლოოდ ახსნა-განმარტების გარეშე უარით გამოუშვეს.

მას შემდეგ, რაც უკრაინაში რუსეთი შეიჭრა, მომღერალი კრემლის მხარდამჭერად რჩება და რუსეთში კონცერტებს აგრძელებს.