"მეგი, დე, ჩემო გაუსაძლისო ტკივილო.. დღეს გავიდა ერთი წელი, როცა ..." - მეგი ბაქრაძის დედის ემოციური წერილი
2021 წლის 18 მარტს კლინიკა "იმედის“ ექთანი, მეგი ბაქრაძე ახალციხეში, "ასტრაზენეკას“ ვაქცინის გაკეთების შემდეგ ცუდად გახდა და მეორე დღეს, 19 მარტს თბილისში, პირველ საუნივერსიტეტო კლინიკაში გარდაიცვალა. პაციენტის გარდაცვალების მიზეზად ანაფილაქსიური რეაქცია და ფილტვის ემბოლია დასახელდა.
- მეგის გარდაცვალებიდან უკვე ერთი წელი გავიდა. მას დედა, ირმა ტეფნაძე იხსენებს და სოციალურ ქსელში ემოციურ პოსტს აქვეყნებს:
"მეგი, დე, ჩემო გაუსაძლისო ტკივილო, დღეს გავიდა ერთი წელი როცა უკანასკნელად ნახე მამა, დედმამიშვილები, დიშვილები, ავთო ძია. შემდეგ წახვედი და გაიხურე შენი მშობლიური სახლის კარები. როცა უკანასკნელად მელაპარაკე. უკანასკნელად მითხარი, დე ძალიან მენატრებიო ნახევარი საათი ვილაპარაკეთ და მაინც არ გინდოდა, რომ ტელეფონი გამეთიშა. ნეტა, რისი თქმა გინდოდა?!
შემპირდი, რომ ხვალ დაგირეკავო, ნემსს რომ გავიკეთებო და გელოდებოდი.
დღესაც გელოდები მე ხო ყოველ დღე გირეკავ მაგრამ დუმს შენი ტელეფონი, აღარ მესმის შენი წკრიალა ხმა. როცა იაკობმა დაგვტოვა, მაშინ ყველა ჩემს გვერდით იყავით, ახლა კი მარტო ვარ და ძალიან მიჭირს, მაგრამ ასე მგონია, გულის მაგივრად ქვა მიდევს მკერდში რომ ამ ტკივილს ვუძლებ.
დედმამიშვილის სიყვარული მე არ გამომიცდია, მშობლებმაც ადრე დამტოვეს. ქმარ-შვილით ვხარობდი და ეს სიხარულიც არ დამცალდა. ღმერთმა ნათელში მიმყოფოს შენი და შენი ძამიკოს სული", - წერს სოციალურ ქსელში მეგი ბაქრაძის დედა.
ცნობისთვის, აღნიშნულ საქმესთან დაკავშირებით, ორი ექიმი, ვიოლეტა ინასარიძე, გიორგი აფციაური და ერთი მედდა, შეცვლილი ჩვენების გამო, სამსახურიდან გაათავისუფლეს და პასუხისგებაში მისცეს. ვიოლეტა ინასარიძემ ჟურნალისტებთან 20 მარტს განაცხადა, რომ მეგი ბაქრაძის ცუდად გახდომის დროს ის და რეანიმატოლოგი გიორგი აფციაური კლინიკაში იმყოფებოდნენ და პაციენტს პირველად დახმარებას უწევდნენ, თუმცა მოგვიანებით, გამოძიებასთან აღიარეს, რომ კლინიკა მეგი ბაქრაძის აცრის შემდეგ მალევე დატოვეს და მისი ცუდად გახდომის დროს, კონფერენციას ესწრებოდნენ.
სამსახურიდან გათავისუფლებულ ექიმებს ბრალი სისხლის სამართლის კოდექსის 370-ე მუხლის მეორე ნაწილით აქვთ წაყენებული და აღკვეთის ღონისძიების სახით გირაო აქვთ შეფარდებული.