"როგორც იქნა კარგი ამბებია მარიუპოლიდან! თავშესაფარმა იერიშს გაუძლო" - უკრაინელი დეპუტატის ინფორმაციით, მარიუპოლში თეატრის დაბომბვისას ადამიანები, რომლებიც იქ იმალებოდნენ, გადარჩნენ
უკრაინის სახალხო დეპუტატის სერგეი ტარუტას ინფორმაციით, მარიუპოლში დრამატულ თეატრში არსებულმა თავშესაფარმა დაბომბვას გაუძლო და ადამიანები, რომლებიც იქ რუსულ ავიაიერიშებს ემალებოდნენ, გადარჩნენ.
ამის შესახებ სახალხო დეპუტატი ინფორმაციას სოციალურ ქსელში ავრცელებს.
"გაურკვევლობის საშინელი ღამის შემდეგ, ომის 22-ე დილით, როგორც იქნა კარგი ამბებია მარიუპოლიდან! თავშესაფარმა იერიშს გაუძლო. ნანგრევების გასუფთავება დაიწყეს და ადამიანები ცოცხლები გამოდიან“, - განაცხადა ტარუტამ.
რუსმა ოკუპანტებმა მარიუპოლის თეატრი გუშინ დაბომბეს, რომელშიც ბავშვები იყვნენ შეფარებული.
ამასთან, BBC ავრცელებს სატელიტით გადაღებულ სურათს, რომელზეც ჩანს, რომ თეატრის წინ და უკანა მხარეს მიწაზე დიდი თეთრი ასოებით რუსულ ენაზე გამოსახულია სიტყვა "ბავშვები“.
თეატრს, რომელიც რუსული ავიაიერიშების სამიზნე გახდა, 1000 -1200 მშვიდობიანი მოქალაქე აფარებდა თავს.