"ნაციონალური მოძრაობა“ არეგისტრირებს საკანონმდებლო ინიციატივას, რომელიც რუსეთის რეზიდენტ პირებს ქვეყნის სახელმწიფო ტენდერებში მონაწილეობას უკრძალავს
"ერთიანი ნაციონალური მოძრაობა“ პარლამენტში საკანონმდებლო ინიციატივას არეგისტრირებს, რომელიც რუსეთის რეზიდენტ ფიზიკურ და იურიდიულ პირებს ქვეყნის სახელმწიფო ტენდერებში მონაწილეობას უკრძალავს.
პარტიის ერთ-ერთი ლიდერის, ლევან ხაბეიშვილის განცხადებით, 200-მდე კომპანია რუსეთშია დარეგისტრირებული და საქართველოში ახორციელებს ეკონომიკურ საქმიანობას. მისივე თქმით, მარტივი ჭეშმარიტებაა, რომ „ჩვენი მწირი ბიუჯეტიდან თანხა რუსულ ეკონომიკაში არ უნდა მივმართოთ“.
"კანონპროექტს დღეს დავარეგისტრირებთ და გულისხმობს შემდეგს, რომ ასეულობით მილიონი ლარი, რომელსაც ასხამს "ქართული ოცნების“ ხელისუფლება რუსულ ეკონომიკაში, დარჩეს ჩვენი ქვეყნის ეკონომიკაში და მოხმარდეს ქართველ ხალხს. რუსეთში დარეგისტრირებულ კომპანიებს არ უნდა ჰქონდეთ შესაძლებლობა სახელმწიფო ტენდერებში მონაწილეობის, ამის უამრავი მაგალითია, მაგალითად სპორტულ დანადგარებს რუსეთიდან ყიდულობს დედაქალაქის მერია და სხვადასხვა მუნიციპალიტეტი, რატომ არ შეიძლება ეს თანხა მოიხმარონ ქართულმა კომპანიებმა და დარჩეს საქართველოს ეკონომიკაში. ეს იქნება ტესტი რა დამოკიდებულება აქვთ თანხასთან, რომელსაც ასხამდნენ რუსულ ეკონომიკაში. საუბარია რეზიდენტ კომპანიებზე, რომლებიც პირდაპირ რუსეთში აწარმოებენ ეკონომიკურ საქმიანობას. 200-მდე ასეთი კომპანიაა, რომელიც რუსეთშია დარეგისტრირებული და რუსეთში ახორციელებს ეკონომიკურ საქმიანობას. მარტივი ჭეშმარიტებაა, რომ ჩვენი მწირი ბიუჯეტიდან თანხა რუსულ ეკონომიკაში არ უნდა მივმართოთ“, - აღნიშნა ლევან ხაბეიშვილმა.