უკრაინაში მიმდინარე ომის გაშუქებისას, 3 ჟურნალისტი დაიღუპა და 35 დაშავდა
უკრაინაში მიმდინარე ომის გაშუქებისას, სულ მცირე, 35 ჟურნალისტი დაშავდა და სამი დაიღუპა. ამის შესახებ ინფორმაციას რადას ადამიანის უფლებათა კომისარი ლუდმილა დენისოვა ავრცელებს.
მისივე განცხადებით, რუსი ოკუპანტები მათი ქმედებების ობიექტურ გაშუქებას ეწინააღმდეგებიან და აქედან გამომდინარე, ხოცავენ და ცეცხლს უხსნიან ჟურნალისტებს.
ლუდმილა დენისოვას ინფორმაციით, ჟურნალისტი ვიქტორ დუდარი მიკოლაევთან მიმდინარე საბრძოლო მოქმედებების გაშუქებისას დაიღუპა, ტელეოპერატორი ევგენი საკუნი - კიევში სარაკეტო თავდასხმას შეეწირა, ამერიკის შეერთებული შტატების მოქალაქე დოკუმენტალისტი ბრენტ რენო კი ირპენში ბლოკპოსტზე მოკლეს.
დენისოვას მონაცემებით, ოკუპანტების სამიზნეა სატელევიზიო ინფრასტრუქტურის ობიექტები, მათ შორის კიევის, ლუცკისა და რივენის სატელევიზიო ანძები.