"რუსეთს ცოცხალი ძალა არ ჰყოფნის, სირიელი "მებრძოლები" სახორცე მასალაა, კადიროვი "კუკლაა", არ არის მებრძოლი" - გენშტაბის ყოფილი უფროსი
რუსეთს ცოცხალი ძალა არ ჰყოფნის, სირიელი "მებრძოლები" სახორცე მასალაა - კადიროვი არის "კუკლა", კადიროვი არ არის მებრძოლი, - ამის შესახებ სამხედრო ექსპერტმა, გენშტაბის ყოფილმა უფროსმა ზაზა გოგავამ “პალიტრანიუსის“ ეთერში, გადაცემა "ნიუსრუმში“ რუსეთ-უკრაინის ომზე საუბრისას განაცხადა.
როგორც ზაზა გოგავა აღნიშნავს, რუსეთი სირიას "შიდა პოლიტიკაში გასაყიდად იყენებს". ამასთან დასძენს, რომ რუსეთს ბოლოს ვანუატუ და ტუვალუ დარჩება, საიდანაც შუბებით ჩამოიყვანენ რამდენიმე ტომის წარმომადგენელს.
"ამ წუთში რუსეთი ყველაფერს მალავს საკუთარი მოსახლეობისთვის. გამორთული აქვს სოციალური ქსელები, დაბლოკილია ინტერნეტი. პროპაგანდისტული მედიებით მოსახლეობას აწვდიან ინფორმაციას, რომ უკრაინაში თითქმის გაიმარჯვეს და სხვა სახის ოპერაცია მიმდინარეობს. ამ დროს ცოცხალი ძალა არ ჰყოფნის. იძახის, რომ სირიიდან უნდა ჩავიყვანო მებრძოლები, "კადიროველები“ დაიმატა. ამასაც კი შიდა მოხმარების რესურსი აქვს. სირიელი "მებრძოლები“, რომელიც აჩვენეს, ერთი ნახვით შემიძლია ვთქვა, რომ ბევრ მათგანს პირველად ეჭირა იარაღი ხელში.
სირიაში ბრძოლა რუსეთს არ დაუწყია. სირიაში ძირითადი გასაკეთებელი საქმე ამერიკის შეერთებულმა შტატებმა გააკეთა, მათ დაამარცხეს "ისლამური სახელმწიფოს“ მებრძოლები. თქვეს, რომ მორჩენილია აქ ჩვენი ფაზა, "ისლამური სახელმწიფო“ განადგურდა და გავიდნენ. შემდეგ შევიდა რუსეთი და თურქეთი. რუსეთს არ უწარმოებია იმ სახის ბრძოლა, რომ გამოცდილება მიეღოთ. სირიელებს გამუდმებით თავს ესხმოდნენ "ისლამური სახელმწიფოს" წარმომადგენლები, ნახეთ როგორც გადაარჩინეს თავისი ქვეყანა. რაც სირიელებს ეხება, ეს არის სახორცე მასალა, შიდა პოლიტიკაშია გასაყიდი. მოსახლეობამ რომ იკითხოს, ვინმე გვიჭერს ამ ყველაფერში მხარს საზღვარგარეთ? რა თქმა უნდა, სირია. ალბათ, ბოლოს ვანუატუ და ტუვალუ დარჩება, შუბებით რომ ჩამოიყვანონ რამდენიმე ტომის წარმომადგენელი. ამას არ ვამბობ ირონიით, ეს ასე იქნება. კადიროვი არის "კუკლა". კადიროვი არ არის მებრძოლი, რომლისაც ვინმეს უნდა ეშინოდეს. ჩვენ ეს ვნახეთ უკრაინაში პირველივე დღეს, როდესაც შეიყვანეს კადიროვის დაჯგუფება, პირველივე დღეს გაანადგურეს“,- აღნიშნავს ზაზა გოგავა.
მისივე თქმით, გამორიცხულია ბელარუსი ცოცხალი ძალით ჩაერთოს ომში. ამასთან, აღნიშნავს, რომ რუსეთი საკუთარ გეგმებს ვერ ახორციელებს და "თუ ის მაქსიმუმს მიმართავს კიევზე, მისი კრახი უფრო სწრაფად დასანახი იქნება“.
"უკრაინელებმა სწორი ტაქტიკა დაუპირისპირეს. მომქანცველი სიტუაცია რუსეთის მხარეს არის. მათი მოტივაცია ეცემა. ვერ უხსნიან ჯარისკაცებს, რატომ არის ამდენი სამოქალაქო მსხვერპლი. გინახავთ ზელენსკი, არიქა, დაგვეხმარეთ, გვშიაო? - არა. რუსეთისკენ არის მომქანცველობა. სანქციები არ ჩერდება, მას ეგონა, რომ ყველა სანქციაზე წავიდოდა და სწრაფად მოაგვარებდა. რუსეთის შეიარაღებულმა ძალებმა ვერცერთი საფეხური ვერ გაიარა სწორად. უკრაინა ამ ომში გაიმარჯვებს“,- აღნიშნავს გოგავა.