მეტროში არასრულწლოვანი შშმ პირის ცემის საქმეზე დაკავებულმა პატრულ-ინსპექტორებიდან ერთ-ერთმა სასამართლო პროცესზე ბრალი აღიარა

მეტროში არასრულწლოვანი შშმ პირის ცემის საქმეზე დაკავებულმა პატრულ-ინსპექტორებიდან ერთ-ერთმა, კახა ბაკაშვილმა სასამართლო პროცესზე ბრალი აღიარა. მოსამართლე ალექსანდრე იაშვილის კითხვაზე, ცნობდა თუ არა ის წარდგენილ ბრალდებაში თავს დამნაშავედ, ბაკაშვილმა განაცხადა - "დიახ, სრულად".

რაც შეეხება ნუკრი ბაქრაძეს, რომელსაც არასრულწლოვანის ცემას ედავებიან, მან აღნიშნა, რომ დუმილის უფლებას იყენებს.

ამ წუთებში, თბილისის საქალაქო სასამართლოში აღნიშნულ საქმესთან დაკავშირებით სხდომა მიმდინარეობს. პროცესზე მტკიცებულებების დასაშვებობაზე იმსჯელებენ, ამასთან, დაკავებულების მიმართ შეფარდებული აღკვეთის ღონისძიება პატიმრობა გადაისინჯება.

ცნობისთვის, შემთხვევა 23 იანვარს მოხდა. პატრულ-ინსპექტორ ნუკრი ბაქრაძეს ბრალად ედება არაადამიანური მოპყრობა, ჩადენილი სამსახურებრივი მდგომარეობის გამოყენებით, დამნაშავისათვის წინასწარი შეცნობით არასრულწლოვანის, სხვაგვარად თავისუფლებაშეზღუდული და უმწეო მდგომარეობაში მყოფი პირის მიმართ, დანაშაული გათვალისწინებული საქართველოს სისხლის სამართლის კოდექსის 144 ტერცია მუხლის მეორე ნაწილით, რაც სასჯელის სახედ და ზომად 5-დან 10 წლამდე ვადით თავისუფლების აღკვეთას ითვალისწინებს.

პატრულ-ინსპექტორს კახა ბაკაშვილს კი ბრალად ედება სამსახურებრივი უფლებამოსილების ბოროტად გამოყენება, დანაშაული გათვალისწინებული საქართველოს სისხლის სამართლის კოდექსის 332-ე მუხლის პირველი ნაწილით.