"ასეთი რამ 15-წლიანი გამოცდილების მანძილზე არ მახსოვს... დილას რომ ვიღვიძებ, პირველ რიგში, ტელევიზორს ვრთავ" - როგორია ცნობილი ქართველების რეაქციები ომზე?
უკრაინაში რუსეთის სამხედრო აგრესია არ წყდება, რამაც მსოფლიოს დღის წესრიგი ფაქტობრივად შეცვალა. ახლა მსოფლიო საზოგადოების ყურადღება უკრაინისკენაა გადატანილი. უკრაინის მოსახლეობას თანადგომას უცხადებს სამყაროს ცივილიზებული ნაწილი.
ყველას გაოცებას იწვევს უკრაინელი ერის საოცარი გმირობა და მტერთან ბრძოლის უდრეკი პოზიცია, მხნეობა... ამ ომმა მშვიდი ძილი და მოსვენება ადამიანებს ჩვენს ქვეყანაშიც დაუკარგა...
რას ფიქრობენ რუსეთის სამხედრო აგრესიაზე და უკრაინაში არსებულ უმძიმეს ვითარებაზე, ამაზე AMBEBI.GE-მ რამდენიმე ინტერვიუ ჩაწერა.
გოგა ჩანადირი, ფოტოგრაფი:
- როდესაც რუსეთის სამხედროებმა პირველად საავადმყოფო, საბავშვო ბაღი დაბომბეს, ვიფიქრე, გამოფხიზლდებიან, ასეთ ბოროტებას აღარ ჩაიდენენ-მეთქი, მაგრამ ბოლოს მარიუპოლში სამშობიარო სახლი დაანგრიეს. როდესაც კადრში დაჭრილი ფეხმძიმე ქალი დავინახე, რომელიც დაბომბილი საავადმყოფოდან გამოდიოდა, მივხვდი, რომ ესენი კანიბალები არიან. მათ არა მხოლოდ უკრაინის ტერიტორიის განადგურება სურთ, სრულად უკრაინელი ერის. სამშობიაროებზე, ქალებზე, ბავშვებზე, მოხუცებზე?! რა საქმე აქვთ მათთან?! ასეთ თავდასხმას ახნა არ აქვს... უდანაშაულო ხალხი იხოცება... დედას შვილების დატირების საშუალებას არ აძლევენ... ჰუმანიტარულ დერეფნებს ბომბავენ...
ომსაც თავის კანონები აქვს, რომელიც ჯერ კიდევ ოდითგანვე არსებობდა. მაგრამ როდესაც ამ კანონებსაც არაფრად აგდებენ, ჩემი ემოციები ძალიან მძიმეა. რუსებს რომ ჰქონდეთ სწორი ინფორმაცია, რა ხდება უკრაინაში, ისინი ამ ომს მეტად დაგმობდნენ და გააპროტესტებდნენ. მილიონობით ადამიანი აღმოსავლეთ უკრაინაში დევნილობაშია და თუ ეს აგრესია არ შეჩერდა, დევნილთა რიცხვი უფრო გაიზრდება. საერთოდ მეჩვენება, რომ აშშ არ არის მზად იმისთვის, რომ სამხედრო მონაწილეობა მიიღოს დამპყრობელი რუსეთის წინააღმდეგ, მაგრამ მაინც მგონია, რომ კიდევ სხვა რესურსებიც არსებობს, რითაც ამ ომის შეჩერება შეიძლება. მათ უნდა იაქტიურონ მთელი მსოფლიოს მასშტაბით. მხოლოდ ევროკავშირის და აშშ-ის სანქციები არ კმარა, ამაში მთელი ცივილიზებული სამყარო უნდა ჩაერთოს. რუსეთს არ უნდა ჰქონდეს იმის განცდა, რომ მსოფლიოში ვინმე დაეხმარება...
- უკრაინელი ხალხი მხნეობას და საკუთარი მიწის, ქვეყნის დაცვის საოცარ უნარს ავლენს...
- ეს სიახლე არ არის - უკრაინამ ჯერ კიდევ მეორე მსოფლიო ომის დარტყმა მიიღო თავის თავზე. საოცარი ტრაგედია დატრიალდა, მილიონობით ადამიანი დაიღუპა... ამჯერად ნათლად ის გამოჩნდა, რომ მეტი სიმტკიცე და ერთიანობა აჩვენეს, რამაც ხელი შეუწყო ეროვნულ-სახელმწიფოებრივი ცნობიერების ჩამოყალიბებას. კარგად ვიცნობ უკრაინას, იქ ვარ მონათლული...
ზელენსკი კარგი ლიდერი აღმოჩნდა. ხანდახან მეჩვენება, რომ აქვს ცოტათი ისტერიკის მომენტები, მაგრამ ეს უფრო ომის დასაწყისში იყო, ახლა ემოციები უფრო მოთოკა, ომთან დაკავშირებით სწორად პოზიციონირებს საერთაშორისო მედიასა თუ ორგანიზაციებთან. მიუხედავად იმისა, რომ არანაირი პოლიტიკური გამოცდილება არ ჰქონდა, აღმოჩნდა, რომ ძალიან კარგი პრეზიდენტია. მის მაგალითზე ისიც გაირკვა, რომ კარგი ლიდერობისთვის მთავარია იყო საკუთარი ქვეყნის პატრიოტი. მასში რაც ყველზე მეტად მომწონს, გულწრფელი სიყვარულია იმ იდეების და ღირებულებების, რისთვისაც იბრძვის ახლა უკრაინელი ერი.
- როგორია შენი პროგნოზი?
- უკრაინა გათავისუფლდება, ის დაიბრუნებს ყირიმს, დონეცკს, ლუგანსკს. რუსეთმა მწარედ შეტოპა და ის დამარცხდება. დამარცხებული ადამიანები წართმეულ ტერიტორიებს ვერ დაიტოვებენ. რუსეთის დამარცხება კი იქნება ფაქტორი, საქართველოს ტერიტორიების დაბრუნებაზეც ვიფიქროთ, ისევე როგორც მოლდოვამ. უბრალოდ, მზად უნდა ვიყოთ, რომ დაკარგული ტერიტორიების დასაბრუნებლად ომი არ დაგვჭირდეს.
სამართალი აღდგება და ჩვენი ტერიტორიული მთლიანობაც. სავარაუდოდ პუტინს თავისი გარემოცვა მოიშორებს, ბირთვული იარაღის გამოყენების საშუალებას არავინ მისცემს. რაც არ უნდა ცხელი გონების გენერლები ჰყავდეს, ისინი ამას არ დაუშვებენ. რადგანაც ამის შედეგს ისევ უკან მიიღებენ. ის არის ჩვეულებრივი ფსიქოპათი, რომელსაც აღარ აქვს ნერვები და მისი იდეაფიქსი მხოლოდ ლიდერობაა. რეალობასაა მოწყვეტილი. ომის გაჩერებას მხოლოდ მისი მოშორება შეძლებს. მერე კი მხარეებს მოლაპარაკების საშუალება ექნებათ.
ხატია შამუგია, წამყვანი, პიარის სპეციალისტი:
- ძალიან მძიმე მდგომარეობაა, დაზაფრული და მოწყენილი ვარ. ამას განსაკუთრებით მაშინ ვგრძნობ, როდესაც რადიოში გადაცემა მიმყავს. ჩემი გადაცემა მართალია, საქმიანია და არაგასართობი, მაგრამ მაინც მოწყენილი ეთერი გამოდის. ასეთი ჩემი 15-წლანი გამოცდილების მანძილზე არ მახსოვს... დილას რომ ვიღვიძებ, პირველ რიგში, ტელევიზორს ვრთავ და არხებზე ახალ ამბებს ვეცნობი. მაგ დროს ისეთი დაძაბული ვარ, რადგან არ მინდა, გავიგო, რომ სადმე ბავშვები კიდევ დაიბომბეს... ამ ხალხს ძალიან თანავუგრძნობ...
უკრაინაში არ ვარ ნამყოფი, გადმოცემით ვიცი მათზე, ბევრი კარგი მსმენია, ისტორიული ქვეყანაა... სამსახურებრივად უკრაინელებთან პარტნიორული ურთიერთობაც მაქვს, ძალიან თბილი ხალხია და ახლა ხომ გაოგნებული ვარ მათი გამბედაობით, პატრიოტიზმით, გამძლეობით, მხნეობით. მგონია, ყველაფერს თავისი დასასრული აქვს და ველოდები, რომ დანაკარგი მეტი აღარ ექნებათ, სიკეთე გაიმარჯვებს. სიმშვიდემ უნდა დაისადგუროს.
ეს მოხდება კიდევაც, მაგრამ მინდა, მალე გამოაცხადონ, - დამთავრდა ყველაფერი, უკრაინამ გაიმარჯვა, ის ევროკავშირშია - ჩვენ ეს დაგვამშვიდებს. ვუსმენ კვალიფიციურ ექსპერტებს და ამბობენ, რომ ყველაფერი პროტოკოლის მიხედვით მიდის. ამიტომ, მჯერა, რომ მსოფლიო აუცილებლად მიიღებს იმ გადაწყვეტილებას, რაც უკრაინელი ხალხისთვის აუცილებელი და საჭირო იქნება. და არა მარტო უკრაინელი ხალხისთვის, მსოფლიო სიმშვიდისთვის. ახლა მსოფლიო ებრძვის ბოროტ ძალას, არ შეიძლება ბოროტებამ გაიმარჯვოს.
დედამიწა, კოსმოსიც ვერ იტანს ამდენ ნეგატივს... ძალიან მენანება ის ადამიანები, უდანაშაულო და მებრძოლი ხალხი, ვინც ამას შეეწირა... პრეზიდენტი ზელენსკი გამოჩენის დღიდან ძალიან მომწონს, პატივს ვცემ, იმ სფეროდან, შოუბიზნესიდანაა, რომელიც ჩემთან ახლოს არის. ნიჭიერი კაცი ყველაფერში ნიჭიერია. მერე რა, რეიგანიც მსახიობი იყო და ამერიკის ერთ-ერთი საუკეთესო პრეზიდენტი აღმოჩნდა... ზელენსკი არა მარტო უკრაინის პრეზიდენტია, მსოფლიოში მშვიდობისთვის იბრძვის. ის არის ნათელი მაგალითი როგორი აუცილებელია საზოგადოებასთან სწორი კომუნიკაცია. მინდა, უკრაინა ძალიან მალე გახდეს ევროკავშირის წევრი და შემდეგ მთელი მსოფლიო გათავისუფლდეს ამ ბოროტი ძალისგან და ბოროტებისგან, რასაც პუტინი და მისი დიქტატურა ჰქვია.
ნანიკო ხაზარაძე, ტელეწამყვანი:
- ეს ომი ძალიან განსხვავდება ყველა იმ ომისგან, რომელიც ჩემი თვალით მინახავს და საკუთარ ტყავზე მიგრძვნია. ომს პირდაპირ ეთერში ვუყურებ, თითქოს კინოთეატრში ვიჯდე. ეს ერთი შეხედვით უტრირებაა, მაგრამ ყველანი ვსხედვართ და ომს ტელევიზორის საშუალებით ვუყურებთ. ეს არის კატასტროფა. მიუხედავად იმისა, რომ მასალა გაფილტრული მოდის, ძალიან მძიმე კადრებია. ისედაც რუტინული ცხოვრება გვაქვს და ამას პარალელურად ესეც დაემატა. ეს არის პლანეტის მძიმე ომი. ფიზიკურად თუ არა, ფიქრებით, აზრებით, მენტალურად, თვალით, ყურით, ყველა სენსორით იქ ვართ. ის ადამიანები კი ვინც იქ არიან, ფსიქოლოგიურ და ფიზიკურ განსაცდელში არიან.
ხალხის შიშველი ხელებით იბრძვის, გასაოცარია მათი ასეთი ერთსულოვნება, სიმამაცე, თავდადება. ტანკებს, შიშველი ხელებით აჩერებენ, ებრძვიან იმ აგრესიას, რომელიც იქ ვითომ სიკეთის სახელით შევიდა. არის მსხვერპლი, რადგანაც უკვე ორი კვირაა ომია. სადღაც თუ წინ წაიწევს მტერი, უკრაინელები იმ წუთას იმ პოზიციებს უკან იბრუნებენ. უკრაინელების ეს შემართება, ალბათ, მტერს ფსიქოლოგიურად ტეხს.
ზელენსკი კარგი ლიდერია. ჩვეულებრივი ადამიანია, ანუ ის, რაც საეროდ პოლიტიკას მთელ მსოფლიოში აკლია. ის თვისებები, რაც აქამდე პოლიტიკაში არ არსებობდა, ზელენსკიმ შემოიტანა. თან პრეზიდენტია, თან ქმარია, მამაა, ლიდერია, ყველა ასპექტში წელში გამართული ადამიანია. რაც შეეხება პროგნოზს, ვეყრდნობი მხოლოდ იმას, რაც მესმის, რაც მიხარია და ეს არის ის, რომ რუსეთი დასუსტებულია და მას მალე კუთხეში მიაყენებენ.