"გამაოგნებელია, პრორუსული პარტიების მიერ პარტიული ინფრასტუქტურის თვალსა და ხელს შუა ჩამოყალიბება" - რუსული პროპაგანდის ქართველი რუპორები: რატომ არაფერი კეთდება მათ შესაჩერებლად?
რუსეთ-უკრაინის სამამულო ომის პარალელურად, რუსეთის ჰიბრიდული ომი მძვინვარებს. იმ დროს, როდესაც მთელი მსოფლიო კრემლის იმპერიალისტური ზრახვების სისრულეში მოყვანის წინააღმდეგ გაერთიანდა და ცდილობს პუტინის სისხლიანი რეჟიმი შეაჩეროს, როდესაც უკრაინის სახელმწიფოებრიობის შენარჩუნება კითხვის ნიშნის ქვეშ დადგა და ოკუპაციით გამოწვეული სისხლით ირწყვება უკრაინის მიწა, კრემლის მიერ კონტროლირებული რუსული მედიასაშუალებები ღიად უჭერენ მხარს რუსეთის აგრესიას უკრაინაში. ისინი აგრძელებენ რუსული პროპაგანდისტული მესიჯების გავრცელებას საქართველოში, მათ შორის, სოციალური ქსელების საშუალებითაც. ყველაზე უფრო სამწუხარო ისაა, რომ რუსეთს თავისი რუპორი მედიასაშუალებები ჰყავს საქართველოში, რომლებიც ამ უდიდესი გეოპოლიტიკური კრიზისისას უპრობლემოდ აგრძელებენ ფუნქციონირებას და საქართველოს მოსახლეობის გარკვეული ნაწილის "მოწამვლას".
მაგალითისათვის გამოდგება "ალტ-ინფო“ და მისი მიმდევრები, რომლებიც რუსული პროპაგანდის პირდაპირ გაგრძელებას წარმოადგენენ ჩვენს სამშობლოში და რუსეთის ფედერაციის უკრაინაში შეჭრისა და მშვიდობიან მოსახლეობაზე თავდასხმას ისე ასაღებენ, როგორც უკრაინის, კონკრეტულად, პრეზიდენტ ზელენსკის შეცდომების შედეგს, რითაც სიტყვა-სიტყვით იმეორებს პუტინის განცხადებებს.
არახალია, რომ "ალტ-ინფო", ზოგადად, პრორუსული განწყობებით და სიძულვილის ენის გამოყენებით დაკავებული მედიაპლატფორმაა. მისი დამფუძნებლები 2021 წლის 5 ივლისის ძალადობრივი აქციის ორგანიზებაში იყვნენ ჩართული, სადაც 50-ზე მეტი ჟურნალისტი დაშავდა. 2021 წლის ნოემბერში "ალტ-ინფოს" დამფუძნებლებმა ღიად პრორუსული პოლიტიკური პარტია - "კონსერვატიული მოძრაობა“ დააფუძნეს, რომელმაც ამ დრომდე მთელი საქართველოს მასშტაბით ათობით ოფისი გახსნა.
ისიც ფაქტია, რომ რეგიონებში მათ გამოჩენას არაერთგან მოჰყვა ადგილობრივი მოსახლეობის უკმაყოფილება. მაგალითად, შუახევის მუნიციპალიტეტში იმ შენობის მესაკუთრის თქმით, სადაც "კონსერვატიული მოძრაობის" ოფისი იყო, მან "ოკუპანტის მსახურებს" შენობა დააცლევინა; ასევე რამდენიმე დღის წინ, თიანეთში ამ მოძრაობის ოფისი უკრაინის დროშებით მოხატეს; 5 მარტს კი ახალციხეში "კონსერვატიული მოძრაობისადმი" უკმაყოფილება კედელზე წარწერებით გამოხატეს.
2 მარტს, მესტიელი ახალგაზრდების ორგანიზებით, მესტიაში, სეტის მოედანზე, უკრაინის სოლიდარობის აქცია გაიმართა, რომლის დროსაც ადგილობრივებმა გააპროტესტეს პრორუსული პარტიის მათ მუნიციპალიტეტში გამოჩენა. "როცა ეს ოფისი გაიხსნა, მაშინ ხალხის უმეტესობამ არ ვიცოდით თუ რომელი პარტია იყო. მას შემდეგ, რაც გაირკვა თუ ვინ იყვნენ და ამავდროულად ომი დაიწყო, ახალგაზრდების ნაწილმა გავაპროტესტეთ. შელაპარაკებაც მოგვივიდა ოფისის წარმომადგენლებთან“, - განაცხადა ნატა ჯაფარიძემ "მთის ამბებთან" , მათ პარტიისგან მოითხოვეს ბანერის ჩამოხსნა და ოფისის დაკეტვა. მათ ფართის მეპატრონესაც მიმართეს, გაეუქმებინა ქირავნობის ხელშეკრულება.
მათი გამოჩენა გააპროტესტეს ამბროლაურშიც, სადაც მოსახლეობა მათ ოფისთან შეიკრიბა, თან ჰქონდათ პლაკატები და ევროკავშირის დროშა. მათ პრორუსული პარტიის წარმომადგენლებს ქვეყნის და ერის მოღალატეები უწოდეს.
გორში კი მათი პარტიის ფასადს საღებავი შეასხეს.
ხულოში ძალადობრივ და პრორუსულ პარტიას ოფისი, გახსნის დღესვე, დაახურინეს.
- საინტერესოა რა ფინანსებით ახერხებს ეს პარტია ამდენი ოფისის გახსნას, როდესაც ოფიციალური მონაცემებით, დაფუძნებიდან 18 თებერვლის ჩათვლით, პოლიტიკური პარტიის შემოსავალი, მხოლოდ 36 675 ლარია.
ამ პარტიის გზავნილი ასეთია: ევროპული მომავალი საქართველოსთვის არ არსებობს, რუსეთთან მოკავშირეობა კი მისთვის ტერიტორიული მთლიანობის აღდგენის ერთადერთი შანსია.
"საქართველოს დემოკრატიულმა ინიციატივამ" (GDI) საქართველოს კომუნიკაციების ეროვნულ კომისიას ტელეკომპანია "ალტ-ინფოს" სამართალდამრღვევად ცნობისა და ადმინისტრაციული პასუხისმგებლობის დაკისრების მოთხოვნითაც მიმართა, მიაჩნია რა, რომ "ალტ-ინფოს" განცხადებები რუსეთის მიერ უკრაინაში ჩადენილი დანაშაულებრივი ქმედებებისა და საერთაშორისო ჰუმანიტარული სამართლის ნორმების დარღვევის გამართლებასა და კრიმინალის გაიდეალებას ემსახურება, რაც "მაუწყებლობის შესახებ" საქართველოს კანონითაა აკრძალული. ამის გარდა, სოცქსელებში გამოჩნდა რუსული პროპაგანდის მამხილებელი მოწოდებები, თუ ვიდეორგოლები, რომლებიც ბინძურ და სახიფათო კამპანიას ეწევიან. მიმდინარე საინფორმაციო ომში ადამიანებს უჭირთ მართალი და ე.წ. ფეიკნიუსის გარჩევა და ხშირად ეგებიან ანკესს. ახლახან სოციალურ ქსელებში გავრცელდა პეტიცია, რათა შეიზღუდოს ყველა რუსული პროპაგანდისტული მედიის მაუწყებლობა საქართველოში. როგორ უნდა ვებრძოლოთ რუსულ პროპაგანდას სოციალურ ქსელებში, რას ემსახურება საქართველოში პრორუსული პარტიების ოფისების გამალებული გახსნა, რატომ არ იკრძალება რუსული პროპაგანდა და უნდა ველოდოთ თუ არა საქართველოში პროვოკაციას რუსეთის მხრიდან, ამ კითხვებზე ambebi.ge-ს რესპოდენტები უპასუხებენ.
კიბერუსაფრთხოების სპეციალისტი ანდრო გოცირიძე ambebi.ge-სთან რუსული პროპაგანდის წინააღმდეგ ბრძოლის მეთოდებზე იწყებს საუბარს:
"როგორც სოციალურ ქსელებში, ისე ნებისმიერი არხით გავრცელებული რუსული პროპაგანდის წინააღმდეგ ბრძოლის ერთადერთი ქმედითი ღონისძიება სწორი ინფორმაციით მომარაგება და სტრატეგიული კომუნიკაციის გააქტიურებაა. ნებისმიერი კრიზისული ვითარება სტრატეგიული კომუნიკაციის ინტენსივობას მოითხოვს. რამდენიმე დღეა, სოციალური ქსელით, ან კერძო კომუნიკაციით ვრცელდება ინფორმაცია "ათასობით რუს მოქალაქეზე“, "ბანკომატებთან რიგებზე“, "გადავსებულ ჯავშნებზე“ და სხვა, ოფიციალური ინფორმაცია კი იგვიანებს, ან არ არსებობს. თვითდინებაზე მიშვებული პროცესი რისკის შემცველია: ოკუპირებულ ქვეყანაში რუსეთის მოქალაქეთა გაუფილტრავი ნაკადის ამგვარი შემოდინება შესაძლოა კონფლიქტური სიტუაციის მაპროვოცირებელი გახდეს.
იმისათვის, რომ მტრულად განწყობილი ქვეყნის სამსახურებმა არ გამოიყენონ პაუზა მოვლენასა და შეტყობინებას შორის, საქართველოს მოქალაქეებს ამომწურავი ინფორმაცია უნდა მიეწოდოთ თუ რა მასშტაბების მოვლენასთან გვაქვს საქმე, რამდენად ადეკვატურია შექმნილი სტრესული ვითარება და რა ნაბიჯებს დგამს, ან გადადგამს მის მიერ დაქირავებული მთავრობა ამ მიმართულებით.
სოცქსელებში გახშირდა პროვოკაციული მოწოდებები ვიდეორგოლების თუ ტექსტების სახით. ეს პროპაგანდისტული მასალა ასევე რუსული სპეცსამსახურების ხელწერას ჰგავს და საფრთხის შემცველია. მაგალითად, იყო ასეთი მოწოდება "დროა, დავიბრუნოთ აფხაზეთი". გარდა იმისა, რომ ამგვარი მოწოდებები პროვოკაციული და სახიფათოა, ოდნავ თუ ჩავეძიებით, ვნახავთ, რომ ის წმინდა რუსული ხელწერაა. 2015 წელს ინტერნეტში გავრცელდა ვიდეო, სადაც ამერიკელი ჯარისკაცი ესროდა ყურანს. აღმოჩნდა, რომ ვიდეო რუსული სამთავრობო "ტროლების ფაბრიკის" შემოქმედებაა და მასზე მსჯელობა კოორდინირებულად გააჩაღეს დაქირავებულმა ტროლებმა. ოდნავ ადრე, ქართული ჯარის ISAF მისიაში მონაწილეობისას ინტერნეტში გავრცელდა ვიდეო ჯიჰადისტური მუქარით, რომლის შექმნა/გავრცელებაში ქართველმა სამართალდამცველებმა სოხუმში მცხოვრები ვინმე ჩოკუტაევი ამხილეს. თუ დავუშვებთ, რომ ეს მხილება გამყარებულია სათანადო მასალით, მისი რუსულ სპეცსამსახურთან კავშირი აშკარაა, მიზანი კი შიშის დათესვა, დათრგუნვა და მისიაში მონაწილეობის მოწინააღმდეგეთა კონსოლიდაცია უნდა ყოფილიყო. ფაქტია, ამგვარ ტექნიკას რუსეთი ხშირად იყენებს და რუსული ხელწერით რუსეთის ან მისი მიმბაძველების მიერ მომზადებული პროპაგანდისტული მასალა საქართველოს ნებისმიერი მოქალაქისთვის საფრთხის შემცველია“.
გავრცელდა ინფორმაცია, რომ აპლიკაცია Photolab (Photolab.me), რომლის მეშვეობითაც ადამიანები საკუთარ ფოტოებს ამუშავებენ და ამით უკრაინის მხარდაჭერას გამოხატავენ, რუსული დაზვერვის პროექტია. ეჭვს აჩენს ის ფაქტიც, რომ აპლიკაცია ოკუპანტების ქვეყანაშია რეგისტრირებული.
"ნებისმიერი აპლიკაცია, რომელიც რუსეთში, ან მის მიერ კონტროლირებად სივრცეშია შექმნილი, საქართველოსთვის სარისკოა. ერთი შეხედვით ისეთი უწყინარი აპლიკაციებიც კი, როგორიცაა მაგალითად, რამდენიმე წლის წინ ფართოდ გავრცელებული აპლიკაცია მომხმარებლის ფოტოს მიხედვით სიბერის ვიზუალის მოდელირებით პირდაპირ იყო დაკავშირებული რუსეთის ფედერალური უშიშროების სამსახურთან. ახლაც მიმდინარეობს კამპანია "ფეისბუკსივრცეში", როდესაც რუსული სადაზვერვო სამსახურები აქტიურად იყენებენ აპლიკაციებს, რომლებიც საკუთარი სურათის გაზიარებას ითხოვს ნებისმიერი საბაბით. შეგროვილი ბიომეტრიული და სხვა ტიპის მონაცემების გამოყენება მრავალგვარია: ობიექტის გადაადგილების თვალთვალი, შანტაჟისა და ტერორისტული აქტისთვის ობიექტის ვიზულურ კონტროლზე გადაცემა და სხვა. მონაცემები შესაძლოა, ასევე Deep Fake-სთვის იყოს გამოყენებული. რუსეთი ამგვარ ტექნოლოგიას ხშირად იყენებს, როგორც ფეიკნიუსის შესაქმნელად. შედარებით უსაფრთხოა იმ აპლიკაციების გამოყენება, რომლებიც მონაცემთა დაცვის ევროპულ კანონმდებლობას ითვალისწინებენ, ან ამერიკული კომპანიების მიერაა შექმნილი. ზოგადად, ნებისმიერი აპლიკაცია, რომელიც რუსეთში ან მის მიერ კონტროლირებად სივრცეშია შექმნილი, საქართველოსთვის სარისკოა. მათი უმეტესობა ითხოვს წვდომას ბევრ სენსიტიურ ინფორმაციასა და ქმედებებზე“, - ამბობს ანდრო გოცირიძე.
ანდრო გოცირიძე მიიჩნევს, რომ თუკი რუსეთი საქართველოში შემოიჭრება, აგრესორი ოკუპაციის პირობებში დასაყრდენად და საოკუპაციო რეჟიმის განსახორციელებლად სწორედ იმგვარ ძალას გამოიყენებს, როგორიცაა "ალტ-ინფო“,“კონსერვატიული მოძრაობა“ და მისთანები, რომლებიც "საზოგადოებას ეროვნული, ტრადიციული ღირებულებების ამბიონიდან ესაუბრება“.
"გამაოგნებელია, მკვეთრად პრორუსული პარტიების მიერ პარტიული ინფრასტრუქტურის თვალსა და ხელს შუა ჩამოყალიბება მთელი საქართველოს მასშტაბით, ეს მართლაც განსაკუთრებულ ყურადღებას იმსახურებს. უნდა აღინიშნოს, რომ ამ პარტიას ყველა ატრიბუტი (საინფორმაციო საშუალებები, კარგად ორგანიზებული ძალადობრივი ჯგუფები, პარტიული ინფრასტრუქტურა, არადეკლარირებული ფინანსები) გააჩნია იმისათვის, რომ მაღალი ალბათობით ვივარაუდოთ მის მიერ განხორციელებული ძალადობრივი ქმედებები კრემლისათვის ხელსაყრელ დროს.
თუკი რუსეთი საქართველოში შემოიჭრება, აგრესორი ოკუპაციის პირობებში სწორედ ამგვარ ძალას გამოიყენებს დასაყრდენად და საოკუპაციო რეჟიმის დასამყარებლად. 5 ივლისი, გარდა ჟურნალისტების ტერორიზების და მოქალაქეთა ტერორიზების მცდელობისა, ერთგვარი რეპეტიციაც იყო სახელმწიფოს მოქმედებებსა და საკუთარი შესაძლებლობების გამოცდის თვალსაზრისით. სამწუხაროდ, სახელმწიფომ დაუშვა ძალადობრივი ჯგუფების მიერ დედაქალაქის ფაქტობრივი დაკავება, რამაც კიდევ უფრო გაამყარა გაუცნობიერებელ მოქალაქეთა ერთ ნაწილში მათდამი სიმპათია. სავალალოა, რომ მკვეთრად პრორუსული ორიენტაციის წარმონაქმნი იკავებს ეროვნულობის ნიშას და საზოგადოებას ეროვნული, ტრადიციული ღირებულებების ამბიონიდან ესაუბრება, სინამდვილეში კი მათი მოქმედება ქვეყნის სუვერენიტეტის დაკარგვისაკენ მიმართული ქმედითი ნაბიჯებია, რასაც სახელმწიფო ჯეროვნად ვერ უპირისპირდება.
რუსეთი საქართველოში პროვოკაციებისათვის ნებისმიერ საშუალებას იყენებს. ბოლო დროს აქტუალურია რუსეთის მოქალაქეების მასიური შემოსვლა საქართველოში. ეს პროცესი უსაფრთხოების სერიოზული რისკების შემცველია. ადეკვატური ზომები სახელმწიფოს ვალდებულებაა და ამას რუსოფობიასთან არანაირი კავშირი არ შეიძლება ჰქონდეს. ღონისძიებები რუსი ეთნოსის წინააღმდეგ კი არ ტარდება, არამედ მტრულად განწყობილი ქვეყნის მხრიდან გადმოსულ მოქალაქეთა დიდი ნაკადის დასარეგულირებლად. ამას ჩაგვრასთან და თანაც ეროვნული ნიშნით დისკრიმინაციასთან არ შეიძლება ჰქონდეს საერთო“, - აცხადებს ექსპერტი.
GIPA-ს ასოცირებული პროფესორის თენგიზ ფხალაძე ამბობს, რომ საქართველოს მიმართ საფრთხე იზრდება და რუსეთი ყველანაირად შეეცდება აქ პროვოკაციის მოწყობას. ამიტომ პირველი, რაც უნდა მოხდეს, ეს არის საინფორმაციო სივრცის ჩაკეტვა რუსული დეზინფორმაციის საშუალებებისათვის.
"დღეს ძალიან ბევრი სიბინძურე და დეზინფორმაცია იღვრება, რომლის მიზანია საზოგადოების დეზორიენტაცია, ცრუ ინფორმაციის გავრცელება იმაზე, რომ უკრაინა და საქართველო მიტოვებული იქნება მსოფლიოსაგან. მათ უნდათ, ეროვნულ სენტიმენტებზე ითამაშონ და რაღაც ისეთი ქმედების პროვოცირება მოახდინონ, რომელიც არასასურველ შედეგებს გამოიწვევს. პირველი, რაც მნიშვნელოვანია, ეს დეზინფორმაციის წყაროები, რომელიც ღიად მუშაობს და შეუზღუდავად აფრქვევს დეზინფორმაციას ქართული სახელმწიფოს წინააღმდეგ, წამლავს ჩვენს მოსახლეობას. არ მგონია, ვინმემ ხმა ამოიღოს და დაგავადანაშაულოს იმაში, რომ თავისუფალი სიტყვა იზღუდება საქართველოში. ყველასთვის ცხადია, რომ ეს არის მტრის პროპაგანდა მიმართული სახელმწიფოს და თავისუფალი სამყაროს წინააღმდეგ. ეს პროპაგანდა უნდა შეწყდეს, ეს ძალიან მნიშვნელოვანია.
რუსეთს აქვს ძალიან მკაფიო გეგმა საქართველოს წინააღმდეგ და ამას ახორციელებს. მეორე - ჩვენ არაფერს არ ვაკეთებთ იმისათვის, რომ დაფინანსების წყაროები შევზღუდოთ, ელემენტარულად, ჩავუკეტოთ და ვაზიანებთ ჩვენს ქვეყანას. ეს არის ის, რაც ახდენს ქართული სახელმწიფოს ეროზიას, ეროვნული სულისკვეთების წინააღმდეგობის ჩამოშლას და მნიშვნელოვანია, რომ წინააღმდეგობის გაწევის უნარი ჰქონდეს სახელმწიფოს არა მხოლოდ აგრესიისას, არამედ, ზოგადად, ნებისმიერი ინფორმაციული, ეკონომიკური, თუ სხვა ტიპის შემოტევების შემთხვევაში. ეს ყველაფერი ამ სულისკვეთების ჩაკვლას და მოსახლეობის სრულ დეზორიენტაციას ემსახურება. სრულიად აუხსნელია, რომ ამის წინააღმდეგ არ იდგმება ის აქტიური ეფექტური და ქმედითი ნაბიჯები, რომლებიც უნდა გადადგას ამ პროცესში ხელისუფლებამ“, - ამბობს თენგიზ ფხალაძე. მისი აზრით, მეხუთე კოლონა ძალიან აქტიურად მუშაობს საქართველოში, ამიტომ ლაპარაკი იმაზე, რომ საქართველოს საფრთხე არ ემუქრება, გულუბრყვილობაა. აქ საფრთხე აშკარაა და თუ დროზე არ მივხედეთ, გაზაფხულისთვის, საცხრამაისოდ უფრო მაღალ ხარისხში გადავა.
"რუსეთი რომ დაკავებულია უკრაინით, ეს იმას არ ნიშნავს, ჩვენ არ შემოგვიბრუნდება. პირიქით, მგონია, რომ ეს ყველაფერი ახალ ფაზაში შედის. ყურადღებამისაქცევია ის ადამიანები, რომლებიც უკონტროლოდ შემოდიან რუსეთის ფედერაციიდან, ლაპარაკია მოქალაქეებზე, რომელთა შორისაც შეიძლება ძალიან მცირე ნაწილი იყოს ისეთი, რომელიც მართლა რეჟიმს გამოექცა. მათი უდიდესი ნაწილი არის სანქციებს გამოქცეული, რათა უკეთესი სასათბურე პირობები შეიქმნას. პრობლემა იმაშია, რომ მერე ასეთი ადამიანები აფინანსებენ იმ ოპერაციებს, რომლებიც ჩვენს წინააღმდეგ ხორციელდება. ახლა გაზაფხული მოდის და თუ მანამდე რაღაც რადიკალურად არ შეიცვალა, საცხრამაისოდ ვნახავთ ძალიან დიდ პროვოკაციას. ამიტომ დროზე უნდა გამოვფხიზლდეთ და მივხვდეთ, რომ ძალიან ცუდი რაღაც მზადდება. ეს მეხუთე კოლონა ძალიან აქტიურად მუშაობს საქართველოში, ამიტომ საუბარი იმაზე, რომ საქართველოს საფრთხე არ ემუქრება, გულუბრყვილობაა. აქ საფრთხე აშკარაა და თუ დროზე არ მივხედეთ, ის უფრო მაღალ ხარისხში გადავა.
სერიოზულად ვერ შევხედავდი, რასაც ავრცელებენ, რომ უკრაინის მთავრობას საქართველოს ომში ჩათრევა უნდა. ეს საფუძველშივე არასწორია. ესეც პროპაგანდისტული ნარატივია. ომის გამოცხადებასა და სანქციების შემოღებას შორის ძალიან დიდი სხვაობაა. მსოფლიოს უამრავმა ქვეყანამ მიიღო და იღებს მონაწილეობას სანქციებში და ეს არ ნიშნავს იმას, რომ რომელიმე მათგანი რუსეთის ფედერაციასთან ომშია შესული. ორჯერ ორი ოთხია, რომ ოკუპანტი ქვეყნიდან მოქალაქეების შემოსვლა უნდა იყოს უფრო მეტად კონტროლირებადი, ვიდრე ახლაა. ოკუპანტი ქვეყნის მხრიდან ჩვენს ქვეყანაში ბიზნესი უფრო მეტად შეზღუდული უნდა იყოს, ვიდრე ახლაა და ოკუპანტ ქვეყანას რომ ეკონომიკურად არ უნდა მიება, ესეც, წესით, მარტივად გასაანალიზებელია. უკრაინაში ომიც რომ არ იყოს, ოკუპანტი ქვეყნის პროპაგანდის საშუალებები რომ უნდა შეზღუდო, ეს ცხადზე ცხადია. რუსული პროპაგანდა აუცილებლად უნდა აიკრძალოს, მაგრამ, სამწუხაროდ, ეს არ კეთდება. რაც უნდა გამამართლებელი არგუმენტი მოიფიქროს მავანმა, როდესაც საქმე ოკუპანტ ქვეყნასთან გვაქვს, რომელსაც მიზნად აქვს შენი ქვეყნის განადგურება, იმ ქვეყნის აქტივობა შენს ქვეყანაში უნდა შეიზღუდოს, ეს არის აქსიომა".
იხილეთ ასევე: