"ჩემი ლამაზი დედაც წავიდა" - გივი ბერიკაშვილის მეუღლე ლეილა კაპანაძე გარდაიცვალა

ქართული კინოსა და თეატრის მსახიობის გივი ბერიკაშვილის მეუღლე ლეილა კაპანაძე გარდაიცვალა. ინფორმაციას სოციალურ ქსელში მისი ქალიშვილი, მანანა ბერიკაშვილი ავრცელებს.

"ჩემი ლამაზი დედიკოც წავიდა გივიკოსთან" - წერს მსახიობის ქალიშვილი რეჟისორი მანანა ბერიკაშვილი.

გივი ბერიკაშვილი 2017 წლის 10 აპრილს ფილტვების ანთებით გარდაიცვალა… მას შემდეგ ქალბატონი ლეილა შვილთან გადავიდა საცხოვრებლად. ორი წლის წინ მსახიობის შვილიშვილი ანო მაისურაძე mshoblebi.ge-სთან ბებიაზე ყვებოდა

- მართლა თამამად შემიძლია ვთქვა, რომ არა ლეილა, ყველას წყალი წაგვიღებდა. ეს ის ქალია, რომელმაც გივი მოიყვანა იქამადე, სადამდეც მოიყვანა. ვერავინ იტყვის, რომ ლეილას გარეშე გივი, გივი იქნებოდა... რაღაც პერიოდი, როცა პაპას როლები არ ჰქონდა და დაკავებული მსახიობი არ იყო, ძმაკაცები სთავაზობდნენ სხვა სამუშაოს, "წამოდი, სადმე იმუშავე, ოჯახი გყავს სარჩენი, დარაჯად დადექიო". გივიმაც, ვფიქრობდიო რაღაც მეღონაო, ოჯახისთვის უნდა მიმეხედაო... სწორედ ასეთ რთულ მომენტში ივაჟკაცა ბებომ.

სანამ გივის გამოუჩნდებოდა ახალი როლები და გივი გივი გახდებოდა, ლეილამ აიღო თავის თავზე მთლიანად ოჯახის რჩენა. ახლა ბებო ჩვენთან ცხოვრობს. გივის გარდაცვალების მერე ლეილა რომ არა, სხვას ბევრად გაუჭირდებოდა. ძალიან ძლიერი ქალია, მიუხედავად იმისა, რომ ფიზიკურად რაღაცები უკვე აღარ შეუძლია, შინაგანად მაინც მხნედ არის.