"რასაც ბაიდენმა წუხელ ხელი მოაწერა, სჯობდა არ მოეწერა - ეს არის ცინიზმი" - ქართველი ექსპერტები პუტინის გადაწყვეტილებასა და მსოფლიო ლიდერების რეაქციებზე
ექსპერტ მამუკა არეშიძის შეფასებით, რუსეთის პრეზიდენტის მიერ ლუგანსკისა და დონეცკის ოლქების დამოუკიდებლობის აღიარების შემდეგ, ამ სიტუაციაში სახის შენარჩუნება სჭირდება არამხოლოდ მოსკოვს, არამედ ვაშინგტონსაც და ბრიუსელსაც, ჯერჯერობით კი ამ ბოლო ორმა სახე ვერ შეინარჩუნა.
როგორც მან "ინტერპრესნიუსს" განუცხადა, ვლადიმერ პუტინმა და რუსეთმა განახორციელეს ის ქმედება, რომელიც შექმნილ ვითარებაში, მათი აზრით, სახეს შეუნარჩუნებდა - არ გავიდა ფართომასშტაბიან კონფლიქტზე, მაგრამ ლოკალური კონფლიქტის მეშვეობით მოახერხა, გარკვეულწილად, თავისი ნათქვამის გატანა.
"მათ შექმნეს ძალიან საინტერესო პროცესი, რომელიც აპრობირებული იყო საქართველოში და რომელიც არ გაითვალისწინა შემდგომში არავინ, არც დასავლეთმა და არც უკრაინის ხელისუფლებამ, რომ ასეთი ნაბიჯის გადამდგმელი იყო პუტინი ანუ ის, რაც გააკეთა მან საქართველოში - ვითარების მომზადება, პროვოკაციული გარემოს შექმნა, ვითომ თავდასხმები და აფეთქებები, მასობრივი ევაკუაცია და შემდეგ ეს ნაბიჯი გადადგა.
სამწუხაროდ, დასავლეთის პოზიცია, როგორც ჩვენს შემთხვევაში იყო, ახლაც საკმაოდ ბუნდოვანია, მე კრეფსით დასავლეთს ვგულისხმობ, თორემ ამერიკის შეერთებული შტატების პოზიცია ნათელია.
განსხვავება მაინცაა ჩვენს მოვლენებსა და დღევანდელ ვითარებას შორის ის, რომ ზელენსკიმ გაითვალისწინა ჩვენი დაშვებული შეცდომა და პროვოკაციას არ წამოეგო, ჯერჯერობით, ასეა. შეტევა არ წამოიწყო ლუგანსკსა და დონეცკზე.
იცით, რომ ლუგანსკისა და დონეცკის ტერიტორიების მხოლოდ ნახევარს აკონტროლებენ სეპარატისტები, დანარჩენ ნახევარს ოფიციალური კიევი. დაახლოებით ისე, როგორც ცხინვალის შემთხვევაში და ნაწილობრივ, აფხაზეთის შემთხვევაში იყო. რუსეთს ძალიან უნდოდა ლოკალური ომი დონეცკისა და ლუგანსკის ტერიტორიაზე, რაც მას საშუალებას მისცემდა, უკეთეს შემთხვევაში, ქალაქი მარიოპოლი დაეკავებინა, რაც მას სტრატეგიული თვალსაზრისით სჭირდებოდა. მაგრამ უკრაინის დღევანდელმა ხელისუფლებამ, როგორც უკვე გითხარით და როგორც ჩანს, გაითვალისწინა რა ჩვენ მიერ დაშვებული შეცდომები, ამ ნაბიჯის გადმოდგმის საშუალება, ჯერჯერობით არ მისცა, თუმცა, დღეს და ხვალ რა იქნება, არ ვიცი. პრაქტიკულად მოსკოვში მიაჩნიათ, რომ რომ არა კრეფსითი დასავლეთის და ნატოს ხელმძღვანელების ხისტი პოზიცია, უკრაინა დათანხმდებოდა მინსკის ხელშეკრულების რეალიზაციას და არ მოხდებოდა ის, რაც მოხდა, ამას მოწმობს დიმიტრი მედვედევის განცხადებაც,“- განაცხადა არეშიძემ.
მისივე თქმით, ჩვენთვის მთავარი აღიარებები კი არაა, არამედ პარტნიორების რეაქციაა.
"ჩვენი პარტნიორების პირველი რეაქცია იყო არასწორი და მიუღებელი. იმას, რასაც ამ აღიარების შემდეგ, გუშინ ღამე ბაიდენმა მოაწერა ხელი, სჯობდა არ მოეწერა. ეს თავისთავად იგულისხმებოდა, სანქციების დაწესება ლუგანსკისა და დონეცკის სეპარატისტული რეგიონების ხელმძღვანელებისა და ამ რეგიონების მიმართ. ეს არის ცინიზმი. ყველა ელოდებოდა მასშტაბურ სანქციებს ევროკავშირის მხრიდან. ჯერჯერობით, ეს სანქციები არ ჩანს.
თუ ისევ უკან დაიხია კრეფსითმა დასავლეთმა, მაშინ პრაქტიკულად მოსკოვს ხელი აქვს გახსნილი და მომავალში ის განახორციელებს ყველა იმ ტიპის მოქმედებას, რომელიც მისთვის იქნება სასარგებლო. რუსეთს სურს საბჭოთა კავშირის აღდგენა, შეკვეცილ ფარგლებში, ბალტიისპირეთის თემას არ შეეხება ამ ეტაპზე. უკრაინისა და სამხრეთ კავკასიის შემდეგ იქნება ყაზახეთი.
ამასობაში ჩინეთი ძალიან აქტიურად ემზადება ტაივანის დასაბრუნებლად. თუ გამოჩნდა დასავლეთის სისუსტე, რაც გამოჩნდა კი არა, ჩანს, ერთი პირი არ აქვს დასავლეთს და აქედან გამომდინარე ვერ იღებს კოლექტიურ გადაწყვეტილებებს აგრესიის წინააღმდეგ, რუსეთი და ჩინეთი ყველაფერს გააკეთებენ იმისთვის, რომ უახლოეს წლებში, ძალიან შეზღუდონ ან დააკნინონ დასავლეთის ეკონომიკური თუ სამხედრო პოლიტიკური სიძლიერე.
შესაძლებელია დასავლეთის მხრიდან ეს თამაში იყოს, მაგრამ თამაშსაც თავისი წესები აქვს. ისე არ უნდა ითამაშო, რომ საბოლოო ჯამში, წაგებული აღმოჩნდე. სახის შენარჩუნება ამ სიტუაციაში სჭირდება არამხოლოდ მოსკოვს, არამედ ვაშინგტონსაც და ბრიუსელსაც, ჯერჯერობით, ამ ბოლო ორმა სახე ვერ შეინარჩუნა“, - განაცხადა არეშიძემ.
ექსპერტი თორნიკე შარაშენიძე მიიჩნევს, რომ თუ რუსეთის ქმედებებზე დასავლეთის პასუხი უკბილო სანქციებს არ გასცდება, რუსეთი მოგებული დარჩება.
მანვე აღნიშნა, რომ პუტინს არ უნდა საბჭოთა კავშირის აღდგენა და კომუნიზმის დაბრუნება, მას უნდა იმპერიის დაბრუნება კომუნიზმის გარეშე.
"მისთვის მთავარი პრობლემა არის უკრაინა, რომელიც არის მოკავშირე დასავლეთის და უნდა უკრაინის, როგორც დასავლეთის მოკავშირის მოსპობა, ეს პირდაპირ იკითხებოდა მის ტექსტში, ამიტომ მხოლოდ აღიარებით შესაძლოა საქმე არ დამთავრდეს. ახლა მინიმუმ მოითხოვს, რომ უკრაინამ დაცალოს ის ტერიტორიები. მას ყველა ვარიანტში უნდა დანარჩენი არაოკუპირებული უკრაინის ნეიტრალიზაცია, რომ იქ არ იყვნენ ამერიკელები. ის, რომ აპირებს ლუგანსკი და დონეცკი მთლიანად დაიკავოს, ეს ფაქტია.
მისთვის მნიშვნელოვანია უკრაინაში ამერიკა საერთოდ არ იყოს წარმოდგენლი და შეეცდება ამას ყველა ხერხით მიაღწიოს, მათ შორის, ომითაც. თითქმის 20 წელია ვცდილობ რუსეთის პოლიტიკის სწავლას, მაგრამ მაინც მეც ვერ ვხვდები ქმედებების ლოგიკას და ძალიან ბევრი სერიოზული რუსი კოლეგა ვიცი, რომლებიც ასევე დაბნეულები არიან იმით, რასაც პუტინი აკეთებს. ახლა, რეალურად ყველაფერი დამოკიდებულია როგორ უპასუხებენ.
თუ ეს პასუხი არ გასცდება სანქციებს, რისიც რუსეთს აშკარად არ ეშინია, ეს ყველაფერი შერჩება, მაგრამ თუ მან მოინდომა, რომ გასცდეს ლუგანსკს და დონეცკს, წავიდეს წინ და დაიწყოს სრულმასშტაბიანი ომი, მაშინ ალბათ, კისერს წაიტეხს, ვნახოთ. თუ გაჩერდა აქ, დაიკავა ლუგანსკი და დონეცკი და უბრალოდ გააგრძელა ზეწოლა უკრაინელებზე და ამას მოჰყვა მხოლოდ და მხოლოდ უკბილო სანქციები, მოგებული დარჩება, მაგრამ თუ ჩაერთო სერიოზულ ომში, წააგებს.
პუტინს საბჭოთა კავშირის აღდგენა და კომუნიზმის დაბრუნება არ უნდა, მას უნდა იმპერიის დაბრუნება კომუნიზმის გარეშე“, - განაცხადა შარაშენიძემ.