"ჩვენ საკუთარ მიწაზე ვართ, არაფრის და არავის გვეშინია... დიდი ხანია მზად ვართ ყველაფრისთვის" - ვლადიმერ ზელენსკი
ჩვენი პარტნიორებისგან მხარდაჭერის მკაფიო და ეფექტინა ნაბიჯებს ველოდებით, ძალიან მნიშვნელოვანია, რომ ახლა დავინახოთ, ვინ არის ჩვენი ნამდვილი მეგობარი და პარტნიორი და ვინ გააგრძელებს რუსეთის ფედერაციის სიტყვებით დაშინებას, - ამის შესახებ უკრაინის პრეზიდენტმა ვლადიმერ ზელენსკიმ სპეციალურ მიმართვაში განაცხადა.
მისი თქმით, არსებული მდგომარეობა საფრანგეთის პრეზიდენტ ემანუელ მაკრონთან, გერმანიის კანცლერთან ოლაფ შოლცთან, აშშ-ის პრეზიდენტ აშშ-ის პრეზიდენტ ჯოზეფ ბაიდენთან, ბრიტანეთის პრემიერ-მინისტრ ბორის ჯონსონთან და ევროპული საბჭოს პრეზიდენტთან, შარლ მიშელთან განიხილა. ასევე იგეგმება სატელეფონო საუბარი თურქეთის პრეზიდენტ რეჯეფ თაიფ ერდოღანთან.
ზელენსკიმ განაცხადა, რომ უკრაინის საგარეო საქმეთა სამინისტრომ გაეროს უშიშროების საბჭოს წევრ ქვეყნებს ბუდაპეშტის მემორანდუმის საფუძველზე კონსულტაციების დაუყოვნებლივ გამართვის მოთხოვნით მიმართა. ასევე ინიცირებული გაეროს უშიშროების საბჭოს სხდომა, ეუთოს საგანგებო სხდომა და "ნორმანდიული ოთხეულის“ სამიტი.
ვლადიმერ ზელენსკიმ ხაზი გაუსვა, რომ უკრაინა სიტუაციის პოლიტიკურ-დიპლომატიური მოგვარების ერთგული რჩება და პროვოკაციებს არ ჰყვება.
"კარგად შეგვიძლია პროვოკაციებისა და აგრესორის ჯარების შემოტევის ერთმანეთისგან განსხვავება. სიმართლე ჩვენს მხარესაა და სიმართლეს ჩვენ არ დაგიმალავთ თქვენ. როგორც კი დავინახავთ სიტუაციის ცვლილებას, როგორც კი დავინახავთ რისკების ზრდას, თქვენ ამის შესახებ გაიგებთ. ქაოტური ქმედების მიზეზი ამჟამად არ არსებობს. ჩვენ ყველაფერს გავაკეთებთ, რომ ასე შევინარჩუნოთ... ჩვენ საკუთარ მიწაზე ვართ, არაფრის და არავის არ გვეშინია უკრაინა რუსეთის ფედერაციის ქმედებებს ცალსახად აფასებს როგორც ჩვენი სახელმწიფოს სუვერენიტეტისა და ტერიტორიული მთლიანობის დარღვევას", - განაცხადა ზელენსკიმ.
მისი თქმით, დონეცკისა და ლუგანსკის ოკუპირებული რეგიონების დამოუკიდებლობის აღიარება ძირს უთხრის სამშვიდობო ძალისხმევას და ანადგურებს მოლაპარაკებების ფორმატებს და ამ გადაწყვეტილებების შედეგებზე პასუხისმგებლობა რუსეთის პოლიტიკურ ხელმძღვანელობას ეკისრება.
სპეციალურ მიმართვაში ვლადიმერ ზელენსკიმ ხაზი გაუსვა, რომ უკრაინას "არაფრის და არავის არ ეშინია“.
"ჩვენ საკუთარ მიწაზე ვართ, არაფრის და არავის გვეშინია, არავისი არაფერი გვმართებს, არავის არაფერს მივცემთ და ამაში დარწმუნებული ვართ, რადგან ახლა 2014 წლის თებერვალი კი არა, 2022 წლის თებერვალია. სხვა ქვეყანა, სხვა არმია, ერთი მიზანი. ეს არის მშვიდობა, მშვიდობა უკრაინაში! დიდება უკრაინას!“ - განაცხადა ზელენსკიმ და უკრაინელებს სიმშვიდისკენ მოუწოდა.
"ჩვენ დიდი ხანია მზად ვართ ყველაფრისთვის, მაგრამ თქვენი უძილო ღამის მიზეზი არ არსებობს", - აღნიშნა ვლადიმერ ზელენსკიმ.