"სექსი სიცოცხლის წყარო“ - არსენ გვენეტაძის ახალი წიგნის პრეზენტაცია გაიმართა
"სექსი სიცოცხლის წყარო“ ასე ჰქვია წიგნს, რომლის სასიგნალო ეგზემპლიარის პრეზენტაცია დღეს პალიტრა მედიის ეზოში გაიმართა. წიგნის ავტორი, ორ თანაავტორთან ერთად, ცნობილი ექიმ-რეპროდუქტოლოგი, პროფესორი, არსენ გვენეტაძეა. პრაქტიკულ სახელმძღვანელოში პოპულარულ ენაზე ახსნილია სქესობრივი ცხოვრების დღევანდელი ხედვა თანამედროვე მსოფლიოში ყმაწვილობიდან-მაღალი ასაკობრივი ჯგუფის ჩათვლით.
ბატონი არსენი თანაავტორებთან, გინეკოლოგ-რეპროდუქტოლოგ ეკატერინე ჩომახიძესა და ქოუჩ, ფსიქო-სექსოლოგთან ანა ღვინიაშვილთან ერთად წიგნზე ორ წელიწადზე მეტხანს მუშაობდა.
არსენ გვენეტაძე:
- დღეს 14 თებერვალია, სიყვარულის დღე და წიგნის სასიგნალო ეგზემპლიარის წარდგენაც სპეციალურად დავამთხვიეთ. ჯერ კიდევ ფროიდი ამბობდა, ორი რამ არის მთავარი მოტივატორი ადამიანისთვის: დიადად ყოფნის სურვილი და სექსი. ამ ორიდან მოდის გამრავლებაც...
რატომ უნდათ შვილები ადამიანებს? - იმიტომ, რომ თავი კარგად იგრძნონ. "დიადად“ როგორც მშობლის სტატუსის მატარებლებმა და მშობლად ყოფნის ბედნიერება გაიზიარონ. რა სჯობია იმას, თუ ეს ყველაფერი სიყვარულით იქნება შეფუთული?!
წიგნის პრეზენტაციაზე ბატონმა არსენმა თავისი შემოქმედებიდან ლექსი წაიკითხა, რომელიც პირდაპირ ასახავს ამ გრძნობის სიღრმეს:
გაზაფხულის სიყვარულის ემოცია!
"მიყვარს სიხარული შენი,
მიყვარს სიყვარული შენი,
გაღიმება მიყვარს იისფერ, ვარდისფერი შენი...
საგაზაფხულოდ მოზიდული აფეთქებ-აყვავება მომწონს,
სიცოცხლის "ყოჩი ვარდობა",
ყოჩაღობაც და ვარდობაც,
მხიბლავს და მაოცებს,
მაბედნიერებს,მიყვარს და მაგიჟებს...
სიცოცხლის სიყვარული,შენი და ჩემი!"
არსენ გვენეტაძეს ( საერთაშორისო არტ ფსევდონიმით Dr. AG) სამედიცინო საქმიანობის გარდა, წლებია, რაც ხელოვნების სფეროში მნიშვნელოვანი წარმატებები აქვს. მისი არტ-ინსტალაციები მსოფლიოს 5 კონტინენტზე (ამერიკა, ევროპა, აზია, აფრიკა, ავსტრალია)15 სხვადასხვა ქალაქში დგას. ზაფხულში პალიტრა ჰოლდინგის შესასვლელში ბ ნი არსენის მეტალ არტ ინსტალაცია, "ბედნიერების გალაქტიკა" დაიდგა 2 მეტრამდე ზომის.
მისი მთავარი სლოგანია "არ გაჩერდე, ცხოვრება არ დაგიცდის!"
ერთი თვის წინ, კი პალიტრა მედიის ეზოში ორი მეტალ-არტი საზეიმოდ გახსნა. "სიხარულის ემოცია“ და "სიყვარულის გალაქტიკა“ ასე ჰქვია ნამუშევრებს, სადაც სიმბოლურად დღეს წიგნის სასიგნალო ეგზემპლიარის პრეზენტაცია შედგა.
წიგნი "ბედნიერების ჩუქების კვირეულის“ დროს მარტის დასაწყისში გამოვა და ილუსტრირებული იქნება ბატონი არსენის ნახატებით.
"სექსი სიცოცხლის წყარო" დაწერილია პოპულარულ ენაზე და განკუთვნილია მკითხველთა ფართო საზოგადოებისათვის, მოზარდობიდან ხანდაზმულობამდე!